Telangana RERA : పశ్చిమ ఆసియాలో నెలకొన్న యుద్ధ పరిస్థితుల ప్రభావం భారత రియల్ ఎస్టేట్ రంగాన్ని కూడా తాకింది. అంతర్జాతీయంగా చోటుచేసుకున్న ఈ ఉద్రిక్తతల కారణంగా నిర్మాణ సామగ్రి కొరత ఏర్పడటమే కాకుండా సరఫరా గొలుసులు (సప్లై చైన్) తీవ్రంగా దెబ్బతిన్నాయి. దీంతో నిర్మాణాలు అనుకున్న సమయానికి పూర్తికాక జాప్యం జరుగుతుండటాన్ని గమనించిన కేంద్ర గృహనిర్మాణ , పట్టణ వ్యవహారాల మంత్రిత్వ శాఖ కీలక అడ్వైజరీని విడుదల చేసింది. ఈ అనూహ్య పరిస్థితులను ‘ఫోర్స్ మేజ్యూర్’ (Force Majeure)గా ಪರಿగణించాలని సూచించిన కేంద్రం, RERA చట్టంలోని సెక్షన్-6 ప్రకారం అర్హత కలిగిన ప్రాజెక్టులకు నాలుగు నెలల పాటు రిజిస్ట్రేషన్ గడువును పొడిగించాలని రాష్ట్ర RERA అథారిటీలకు స్పష్టం చేసింది.
కేంద్ర ప్రభుత్వ సూచనలకు అనుగుణంగా, గృహ కొనుగోలుదారుల ప్రయోజనాలను కాపాడటంతో పాటు ప్రాజెక్టులను సజావుగా పూర్తి చేయాలనే లక్ష్యంతో తెలంగాణ RERA (T-RERA) కీలక నిర్ణయం తీసుకుంది. ఫిబ్రవరి 28, 2026 లేదా ఆ తర్వాత పూర్తికావాల్సిన అన్ని తెలంగాణ RERA నమోదిత రియల్ ఎస్టేట్ ప్రాజెక్టులకు నాలుగు నెలల గడువు పొడిగింపును వర్తింపజేస్తున్నట్లు ప్రకటించింది. ఈ నిర్ణయం వల్ల బిల్డర్లకు నిర్మాణ పనులను పూర్తి చేయడానికి అదనపు సమయం లభించడమే కాకుండా, కొనుగోలుదారులకు తమ ఇళ్ల నిర్మాణ నాణ్యత దెబ్బతినకుండా సకాలంలో అందే అవకాశం కలుగుతుంది. దీనికోసం డెవలపర్లు విడివిడిగా దరఖాస్తు చేసుకోవాల్సిన అవసరం లేకుండా, సంబంధిత RERA అథారిటీలే సాధారణ ఉత్తర్వుల (General Orders) ద్వారా ఈ గడువు పొడిగింపును అమలు చేయనున్నాయి.