హైదరాబాద్ వేదికగా జరుగుతున్న ప్రతిష్టాత్మక ‘భారత్ సమ్మిట్’లో తెలంగాణ ముఖ్యమంత్రి రేవంత్ రెడ్డి కీలక ప్రసంగం చేశారు. ఒకే ఆలోచనా ధోరణి కలిగిన ప్రపంచ నాయకులు, ప్రభావశీలురను ఒకే వేదికపైకి తీసుకురావడానికి ఈ సమ్మిట్ ఒక గొప్ప వేదికని ఆయన అభివర్ణించారు. భారత తొలి ప్రధాని పండిట్ జవహర్‌లాల్ నెహ్రూ జయంతి రోజున ఈ కార్యక్రమం జరగడం ఎంతో ప్రత్యేకమని పేర్కొంటూ, దేశంలో రాజ్యాంగబద్ధ ప్రజాస్వామ్య వ్యవస్థ బలోపేతం కావడానికి నెహ్రూ దార్శనికత ఎంతో దోహదపడిందని గుర్తుచేసుకున్నారు.
ప్రతినిధుల వీసాల రద్దుపై కేంద్రంపై విమర్శలు
ఈ సదస్సు కోసం 70 దేశాల నుంచి వెయ్యి మందికి పైగా ప్రతినిధులను ఆహ్వానించామని, అయితే కేంద్ర ప్రభుత్వం వారిలో చాలామందికి వీసాలను రద్దు చేసిందని సీఎం రేవంత్ రెడ్డి ఆరోపించారు. అయినప్పటికీ ప్రపంచవ్యాప్తంగా ఉన్న ప్రజాస్వామ్యవాదులు తమను గమనిస్తూనే ఉన్నారని ఆయన ధీమా వ్యక్తం చేశారు.
ప్రజాస్వామ్యం వర్సెస్ నియంతృత్వం.. రెండు శక్తుల మధ్య పోరాటం
ప్రస్తుతం ప్రపంచవ్యాప్తంగా రెండు భిన్నమైన శక్తుల మధ్య పోరాటం జరుగుతోందని సీఎం విశ్లేషించారు. ఒక శక్తి ప్రజాస్వామ్యాన్ని కాపాడాలని చూస్తుంటే, మరో శక్తి దాన్ని నాశనం చేసి నియంతృత్వాన్ని రుద్దాలని చూస్తోందని మండిపడ్డారు. తాము రాజ్యాంగం, చట్టబద్ధ పాలన, పర్యావరణ పరిరక్షణ, అందరికీ సమాన అవకాశాల కోసం కట్టుబడి ఉంటే.. ప్రత్యర్థులు మాత్రం కేవలం తమ సంపన్న మిత్రులను కాపాడుకోవడానికి, కొద్దిమంది చేతుల్లోనే అధికారాన్ని కేంద్రీకరించడానికి ప్రయత్నిస్తున్నారని విమర్శించారు. తాము చర్చలు, సంప్రదింపులను కోరుకుంటుంటే, వారు ఒకే వ్యక్తి నుంచి ఆదేశాలు రావాలని కోరుకుంటున్నారని వ్యాఖ్యానించారు. గొప్ప లక్ష్యం కోసం పోరాడుతున్న తమను ఏ శక్తీ ఆపలేదని స్పష్టం చేశారు.
రాహుల్ గాంధీ నాయకత్వంలో సామాజిక న్యాయం కోసం పోరాటం
ప్రపంచీకరణ, కోవిడ్ తర్వాత అన్ని దేశాల్లోనూ ప్రాథమిక హక్కులపై దాడులు, విద్య, ఉపాధి, వైద్యం, ద్రవ్యోల్బణం వంటి ఒకే రకమైన సమస్యలు ఎదురవుతున్నాయని సీఎం పేర్కొన్నారు. ప్రభుత్వాలు సంపన్నుల కోసం కాకుండా సామాన్య ప్రజల కోసం పనిచేయాలని పిలుపునిచ్చారు. దేశంలో ప్రతి పౌరుడి ఓటు హక్కు కోసం, దళితులు, మైనారిటీలు, ఓబీసీల సామాజిక న్యాయం కోసం రాహుల్ గాంధీ అలుపెరగని పోరాటం చేస్తున్నారని కొనియాడారు. ఆయన నాయకత్వంలో దేశాన్ని కాపాడుకునేందుకు అందరం చేతులు కలపాలని, 70 దేశాల నుంచి వచ్చిన ప్రతినిధులు ఈ ప్రజాస్వామ్య సందేశాన్ని ప్రపంచవ్యాప్తంగా తీసుకెళ్లాలని సీఎం రేవంత్ రెడ్డి పిలుపునిచ్చారు.