పాతబస్తీలోని ఓ సివిల్ వివాదంలో తలదూర్చి, సెటిల్‌మెంట్ పేరిట భారీగా లంచం డిమాండ్ చేసిన మీర్చౌక్ పోలీస్ స్టేషన్ ఇన్‌స్పెక్టర్ కొండల్‌రావుతో పాటు ఓ కానిస్టేబుల్‌ను అవినీతి నిరోధక శాఖ (ఏసీబీ) అధికారులు రెడ్‌హ్యాండెడ్‌గా పట్టుకున్నారు. బాధితుడి నుంచి రూ. 3 లక్షల లంచం తీసుకుంటుండగా అధికారులు వలపన్ని పట్టుకున్నారు.
రూ. 10 లక్షల డిమాండ్.. రూ. 6 లక్షలకు ఒప్పందం
పోలీసు వర్గాలు, ఏసీబీ తెలిపిన వివరాల ప్రకారం.. పాతబస్తీ పరిధిలోని ఓ స్థలానికి సంబంధించిన సివిల్ వివాదంలో ఇన్‌స్పెక్టర్ కొండల్‌రావు జోక్యం చేసుకున్నారు. ఈ వ్యవహారాన్ని అనుకూలంగా పరిష్కరించేందుకు బాధితుడి నుంచి తొలుత రూ. 10 లక్షలు డిమాండ్ చేశారు. బాధితుడు అంత మొత్తం ఇవ్వలేనని వేడుకోవడంతో, చివరికి రూ. 6 లక్షలకు బేరం కుదుర్చుకున్నారు. ఇందులో భాగంగా మొదటి విడతగా (టోకెన్ అమౌంట్) రూ. 3 లక్షలు వెంటనే చెల్లించాలని ఆదేశించారు.
షాపులో డబ్బులు తీసుకుంటుండగా పట్టివేత
బాధితుడు ఇన్‌స్పెక్టర్ వేధింపులు తాళలేక ఏసీబీ అధికారులను ఆశ్రయించాడు. పక్కా ప్రణాళిక రచించిన అధికారులు మంగళవారం రంగంలోకి దిగారు. మీర్చౌక్ పరిధిలోని ఓ దుకాణంలో బాధితుడు రూ. 3 లక్షల నగదును ఇన్‌స్పెక్టర్ సూచన మేరకు అందిస్తుండగా, అప్పటికే మాటువేసిన ఏసీబీ అధికారులు దాడి చేసి రెడ్‌హ్యాండెడ్‌గా పట్టుకున్నారు. ఈ ఘటనతో సంబంధమున్న ఇన్‌స్పెక్టర్ కొండల్‌రావుతో పాటు ఒక కానిస్టేబుల్‌ను అధికారులు తక్షణమే అదుపులోకి తీసుకున్నారు. అనంతరం పాతబస్తీలోని మీర్చౌక్ పోలీస్ స్టేషన్‌లో ఏసీబీ బృందాలు విస్తృతంగా సోదాలు చేపట్టాయి. కేసు నమోదు చేసిన అధికారులు, నిందితులను ఏసీబీ ప్రత్యేక న్యాయస్థానంలో హాజరుపరచనున్నట్లు వెల్లడించారు. ఈ దాడితో పోలీస్ శాఖలో ఒక్కసారిగా కలకలం రేగింది.