Smartphone Restart Benefits: స్మార్ట్‌ఫోన్‌ను రీస్టార్ట్ చేయాలా?.. టెక్ నిపుణులు చెబుతున్న సీక్రెట్స్..

Smartphone Restart Benefits: చాలా మంది స్మార్ట్‌ఫోన్ వినియోగదారులు ఫోన్‌లో సమస్య వచ్చినప్పుడే రీస్టార్ట్ చేస్తుంటారు. కానీ టెక్నాలజీ నిపుణుల అభిప్రాయం ప్రకారం, ఫోన్ సజావుగా పనిచేస్తున్నప్పటికీ వారానికి కనీసం ఒక్కసారైనా రీస్టార్ట్ చేయడం మంచి అలవాటు. ఇది ఫోన్ పనితీరును మెరుగుపరచడమే కాకుండా భద్రతను కూడా పెంచుతుంది. ఈ రోజుల్లో స్మార్ట్‌ఫోన్‌లు నిరంతరం ఆన్‌లోనే ఉంటాయి. బ్యాక్‌గ్రౌండ్‌లో అనేక యాప్‌లు, సిస్టమ్ సర్వీసులు, నోటిఫికేషన్‌లు నిరంతరం పనిచేస్తూ RAM, ప్రాసెసర్‌పై అదనపు భారం పెడతాయి. ఫోన్‌ను రీస్టార్ట్ చేయడం వల్ల ఈ అనవసరమైన ప్రాసెస్‌లు పూర్తిగా మూసివేయబడి RAM ఖాళీ అవుతుంది. దీంతో ఫోన్ మరింత వేగంగా, సాఫీగా పనిచేస్తుంది.

చాలా సందర్భాల్లో యాప్‌లు హ్యాంగ్ కావడం, చిన్న సాంకేతిక లోపాలు లేదా సిస్టమ్ స్పందించకపోవడం వంటి సమస్యలు కేవలం ఒక్కసారి రీస్టార్ట్ చేయడం ద్వారా పరిష్కారమవుతాయి. అందుకే కస్టమర్ సపోర్ట్ కూడా మొదట ఫోన్‌ను రీస్టార్ట్ చేయాలని సూచిస్తుంది.

రీస్టార్ట్‌తో బ్యాటరీ లైఫ్‌ టైమ్‌ తగ్గుతుందా..?

రీస్టార్ట్ చేయడం వల్ల బ్యాటరీ జీవితకాలం తగ్గుతుందనే అభిప్రాయం సరైనది కాదని నిపుణులు చెబుతున్నారు. వాస్తవానికి, బ్యాక్‌గ్రౌండ్‌లో నడుస్తున్న అనవసరమైన యాప్‌లు మూసివేయబడటం వల్ల ప్రాసెసర్‌పై భారం తగ్గి బ్యాటరీ వినియోగం కూడా కొంత మేర తగ్గే అవకాశం ఉంటుంది.

ఫోన్‌ భద్రతకు రీస్టార్ట్‌ మార్గం..!

పనితీరుతో పాటు భద్రత పరంగా కూడా రీస్టార్ట్ చేయడం ఉపయోగకరమే. మెమరీలో నడుస్తున్న కొన్ని అనుమానాస్పద ప్రాసెస్‌లను నిలిపివేయడంలో ఇది సహాయపడుతుంది. అందుకే గూగుల్, ఆపిల్ వంటి సంస్థలు కూడా కొన్ని రోజుల పాటు లాక్‌లో ఉన్న ఫోన్‌లను ఆటోమేటిక్‌గా రీస్టార్ట్ చేసే ఫీచర్‌ను తమ ఆపరేటింగ్ సిస్టమ్‌లలో అందుబాటులోకి తీసుకొచ్చాయి.

కనీసం వారానికి ఒకసారైనా రీస్టార్ట్..!

ప్రత్యేకించి రెండు లేదా మూడు సంవత్సరాల పాత ఫోన్‌లు ఉపయోగిస్తున్నవారు, స్టోరేజ్ దాదాపు నిండిపోయిన వారు లేదా రోజంతా సోషల్ మీడియా, గేమింగ్, బ్యాంకింగ్, కెమెరా యాప్‌లను ఎక్కువగా ఉపయోగించే వారు వారానికి ఒకసారి ఫోన్‌ను రీస్టార్ట్ చేయడం వల్ల మంచి ఫలితాలను పొందవచ్చు.

ప్రతిరోజూ రీస్టార్ట్‌ అవసరమా?

ప్రతిరోజూ స్మార్ట్‌ఫోన్‌ను రీస్టార్ట్ చేయాల్సిన అవసరం లేదు. దానివల్ల చెప్పుకోదగ్గ అదనపు ప్రయోజనం ఏమీ ఉండదు. సగటు వినియోగదారునికి వారానికి ఒకసారి పునఃప్రారంభించడం సరిపోతుందని చాలామంది టెక్‌ నిపుణులు అంగీకరిస్తున్నారు. మీ ఫోన్ ఇప్పటికే సజావుగా పనిచేస్తున్నప్పటికీ, వారానికి ఒకసారి దాన్ని రీస్టార్ట్ చేయడం మంచి అలవాటుగానే చెబుతున్నారు..

ఆటో రీస్టార్ట్ ఫీచర్ కూడా ఉంది.

చాలా ఆండ్రాయిడ్ స్మార్ట్‌ఫోన్‌లు, ముఖ్యంగా శాంసంగ్, ఆటో-రీస్టార్ట్ లేదా ఆటో-ఆప్టిమైజేషన్ ఫీచర్‌ను అందిస్తాయి. దీనివల్ల, మీ ఫోన్‌ను రాత్రిపూట ఒక నిర్దిష్ట సమయంలో ఆటోమేటిక్‌గా రీస్టార్ట్ అయ్యేలా మీరు సెట్ చేసుకోవచ్చు, తద్వారా దానిని రీస్టార్ట్ చేయాలని గుర్తుంచుకోవాల్సిన అవసరం ఉండదు. మీ ఫోన్‌లో ఈ ఫీచర్ ఉంటే, వారానికి ఒకసారి రాత్రిపూట ఇది జరిగేలా మీరు సెట్ చేసుకోవచ్చు అంటున్నారు టెక్‌ నిపుణులు..