WhatsApp New Feature: వాట్సాప్ తన వినియోగదారుల కోసం ఎప్పటికప్పుడు సరికొత్త ఫీచర్స్ తీసుకు వస్తూనే ఉంది.. ఇక, వినియోగదారుల అనుభవాన్ని మరింత మెరుగుపరిచేందుకు వాట్సాప్ కొత్త బర్త్డే రిమైండర్ ఫీచర్ను అభివృద్ధి చేస్తోంది. ఈ ఫీచర్ ద్వారా కాంటాక్ట్ లిస్ట్లో ఉన్న వారి రాబోయే పుట్టినరోజుల గురించి యాప్లోనే నోటిఫికేషన్లు అందుతాయి. దీంతో ప్రత్యేకంగా క్యాలెండర్ యాప్లను ఉపయోగించాల్సిన అవసరం ఉండదు.
నివేదిక ప్రకారం, వాట్సాప్ ఇప్పటికే ఆండ్రాయిడ్ బీటా వెర్షన్ 2.24.12.25 అప్డేట్లో ఇలాంటి ఫీచర్ను ప్రవేశపెట్టింది.. వాట్సాప్ కొంతమంది వినియోగదారుల నుండి పుట్టిన తేదీలను సేకరించడం ప్రారంభించింది. ఈ సమాచారం ఇతర వినియోగదారులకు కనిపించదని ఆ సంస్థ పేర్కొంది. ఒకసారి నమోదు చేసిన తర్వాత, పుట్టిన సంవత్సరాన్ని మార్చడం సాధ్యం కాదు. ప్రారంభంలో, ఈ డేటాను కేవలం చట్టపరమైన నిబంధనల పాటింపు కోసం మాత్రమే ఉపయోగించారు. అమెరికాలోని పలు రాష్ట్రాలు ఆన్లైన్ సేవలు తమ వినియోగదారుల వయస్సును ధృవీకరించాలని చట్టాలను అమలు చేశాయి.
ఇప్పటికే కొన్ని బీటా వెర్షన్లలో వాట్సాప్ వినియోగదారులను వారి పుట్టిన తేదీ, పుట్టిన సంవత్సరాన్ని నమోదు చేయమని కోరుతోంది. ప్రారంభంలో ఈ సమాచారం చట్టపరమైన నిబంధనల అమలు కోసం సేకరించినప్పటికీ, ఇప్పుడు అదే డేటాను బర్త్డే రిమైండర్ల కోసం వినియోగించనుంది. వాట్సాప్లో ప్రత్యేక ‘బర్త్డేస్’ విభాగాన్ని ఏర్పాటు చేయనున్నారు. ఇందులో వినియోగదారులు తమ కాంటాక్ట్ల రాబోయే పుట్టినరోజులను ఒకేచోట చూడగలుగుతారు. అయితే సంబంధిత వ్యక్తి తన పుట్టిన తేదీని వాట్సాప్లో నమోదు చేసినప్పుడే ఈ రిమైండర్లు కనిపిస్తాయి.
ప్రస్తుతం ఈ ఫీచర్ అభివృద్ధి దశలో ఉంది. భవిష్యత్తులో దీనితో పాటు ప్రైవసీ నియంత్రణలు కూడా అందుబాటులోకి రానున్నాయి. వాటి ద్వారా వినియోగదారులు తమ పుట్టినరోజు వివరాలను ఎవరికి చూపించాలనేది స్వయంగా నిర్ణయించుకోవచ్చు. కాగా, ఇప్పటికే ఫేస్బుక్ లాంటి సోషల్ మీడియాలో యాప్స్లో బర్త్డే రిమైండర్స్ ఉండగా.. ఇప్పుడు వాట్సాప్ కూడా దీనిని అమలు చేసేందుకు సన్నహాలు చేస్తోంది..