WhatsApp New Feature: వాట్సాప్ వినియోగదారులకు గుడ్‌న్యూస్‌.. మరో స్మార్ట్ ఫీచర్.. మరింత భద్రత..

WhatsApp New Feature: వాట్సాప్ వినియోగదారుల గోప్యతను మరింత బలోపేతం చేసే దిశగా మెటా మరో కొత్త ఫీచర్‌ను అందుబాటులోకి తీసుకొస్తోంది. ‘సైడ్ చాట్’ (Side Chat) పేరుతో వస్తున్న ఈ కొత్త ఫీచర్ ద్వారా వినియోగదారులు మెటా ఏఐ సహాయాన్ని పూర్తిగా ప్రైవేట్‌గా పొందే అవకాశం ఉంటుంది. గత నెలలో మెటా సీఈవో మార్క్ జుకర్‌బర్గ్ పరిచయం చేసిన ఇంకగ్నిటో చాట్ ఫీచర్‌కు ఇది మరింత విస్తరించిన రూపంగా భావిస్తున్నారు.

వాబెటాఇన్ఫో (WABetaInfo) వెల్లడించిన వివరాల ప్రకారం, సైడ్ చాట్ ఫీచర్ ద్వారా వినియోగదారులు తమ వ్యక్తిగత సంభాషణలపై మెటా ఏఐను సంప్రదించవచ్చు. ఈ ప్రక్రియలో చాట్ వివరాలు బయటకు లీక్ కాకుండా ప్రత్యేక భద్రతా వ్యవస్థను అమలు చేశారు. ప్రస్తుతం ఈ ఫీచర్‌ను కొంతమంది ఎంపిక చేసిన వినియోగదారులకు మాత్రమే అందుబాటులో ఉంచగా, త్వరలోనే ప్రపంచవ్యాప్తంగా మరింత మందికి అందించే అవకాశం ఉంది.

గోప్యతకు అత్యధిక ప్రాధాన్యం

మెటా ఏఐతో సంభాషించే సమయంలో తమ వ్యక్తిగత సమాచారం బయటకు వెళ్లిపోతుందనే ఆందోళన చాలా మందిలో ఉంటుంది. అలాంటి సందేహాలకు పరిష్కారంగా ఇంకగ్నిటో చాట్‌ను అందుబాటులోకి తీసుకువచ్చిన మెటా, ఇప్పుడు సైడ్ చాట్ ద్వారా మరింత మెరుగైన ప్రైవసీ రక్షణను అందిస్తోంది. ఈ ఫీచర్ పూర్తిగా ప్రైవేట్ ప్రాసెసింగ్ సాంకేతికతపై పనిచేస్తుంది. దీంతో వినియోగదారుల సందేశాలు, చాట్ వివరాలు పూర్తిగా గోప్యంగానే ఉంటాయి.

సైడ్ చాట్‌ను ఎలా ఉపయోగించాలి?

వాట్సాప్‌లో ఈ ఫీచర్‌ను ఉపయోగించడం చాలా సులభం. చాట్‌ల పక్కన ‘Ask Privately’ అనే కొత్త ఆప్షన్ కనిపిస్తుంది. దానిపై క్లిక్ చేయడం లేదా చాట్ స్క్రీన్‌పై ఎడమవైపుకు స్వైప్ చేయడం ద్వారా ప్రత్యేక సైడ్ ప్యానెల్ తెరుచుకుంటుంది. అక్కడి నుంచే వినియోగదారులు మెటా ఏఐతో వ్యక్తిగతంగా సంభాషించవచ్చు.

ఆకర్షణీయమైన డార్క్ ఇంటర్‌ఫేస్

సైడ్ చాట్ ప్రత్యేకమైన డార్క్ థీమ్‌తో రూపొందించబడింది. ఇది ఇంకగ్నిటో చాట్ తరహాలోనే కనిపించే ప్రత్యేక ఇంటర్‌ఫేస్‌ను కలిగి ఉంటుంది. అంతేకాకుండా ఇందులో వెబ్ సెర్చ్ సౌకర్యం కూడా అందుబాటులో ఉంటుంది. అవసరమైన సమాచారాన్ని వెతుక్కోవడంతో పాటు, చాట్ గోప్యతకు ఎలాంటి భంగం కలగకుండా మెటా ఈ ఫీచర్‌ను రూపొందించింది.

త్వరలో అందరికీ అందుబాటులోకి

ప్రస్తుతం సైడ్ చాట్ ఫీచర్‌ను పరీక్షల దశలో ఎంపిక చేసిన వినియోగదారులకు మాత్రమే అందిస్తున్నారు. పరీక్షలు విజయవంతమైతే, రాబోయే రోజుల్లో ప్రపంచవ్యాప్తంగా అన్ని వాట్సాప్ వినియోగదారులకు ఈ కొత్త ఫీచర్‌ను అందుబాటులోకి తీసుకురానున్నట్లు తెలుస్తోంది.