WhatsAppలో ‘Incognito AI Chat’.. యూజర్లకు మెటా బిగ్ అప్‌డేట్.!

WhatsApp Introduces Incognito AI Chat: మెటా (Meta)సంస్థ తన AI సేవల్లో మరో కీలక ఫీచర్‌ను ప్రకటించింది. ‘Incognito Chat with Meta AI’ పేరుతో తీసుకొస్తున్న ఈ కొత్త ఫీచర్‌ను మెటా తన ‘Private Processing Technology’ ఆధారంగా రూపొందించింది. AI చాట్‌లన్నీ Trusted Execution Environment (TEE) అనే ప్రత్యేక భద్రతా వ్యవస్థలో ప్రాసెస్ అవుతాయని కంపెనీ తెలిపింది. దీని వల్ల యూజర్ సంభాషణలను ఇతరులు మాత్రమే కాదు, మెటా కూడా యాక్సెస్ చేయలేదని కంపెనీ చెబుతోంది.

ఈ ఫీచర్‌లో అత్యంత ముఖ్యమైన అంశం ‘Zero Server Logs’. అంటే యూజర్ చేసిన చాట్‌లు కంపెనీ సర్వర్లలో నిల్వ ఉండవు. ప్రస్తుతం ఉన్న చాలా AI ప్లాట్‌ఫామ్‌లు చాట్ హిస్టరీని నెలల తరబడి సర్వర్లలో స్టోర్ చేస్తుండగా, మెటా మాత్రం ఈ విషయంలో భిన్నంగా వ్యవహరిస్తోంది. ‘Incognito Chat’లో చేసిన సంభాషణలు తాత్కాలికంగానే ఉంటాయి. యూజర్ సెషన్‌ను ముగించిన వెంటనే అన్ని మెసేజ్‌లు డివైస్ నుంచే పూర్తిగా తొలగిపోతాయి. దీని వల్ల వ్యక్తిగత, సున్నితమైన అంశాలపై కూడా వినియోగదారులు భయపడకుండా AIతో చర్చించే అవకాశం ఉంటుంది.

ఈ ఫీచర్ గోప్యతా స్థాయిని వాట్సాప్ లో ఇప్పటికే ఉన్న End-to-End Encryption విధానంతో పోల్చింది మెటా. అంటే యూజర్ డేటా బయట వ్యక్తులకు మాత్రమే కాదు, ప్లాట్‌ఫామ్ నిర్వహించే సంస్థకూ కనిపించదని కంపెనీ పేర్కొంది. ఈ కొత్త ‘Incognito Chat with Meta AI’ ఫీచర్‌ను రాబోయే నెలల్లో వాట్సాప్‌తో పాటు స్టాండ్‌అలోన్ Meta AI యాప్‌లో విడుదల చేయనున్నట్లు కంపెనీ తెలిపింది. అలాగే భవిష్యత్తులో ‘Side Chat with Meta AI’ అనే మరో ఫీచర్‌ను కూడా తీసుకురానున్నట్లు మెటా వెల్లడించింది.

ఇది యూజర్ ప్రస్తుతం చేస్తున్న చాట్‌ను అంతరాయం కలగకుండా, అదే సమయంలో ప్రైవేట్ AI సహాయాన్ని అందించే విధంగా పనిచేస్తుందని కంపెనీ తెలిపింది. సున్నితమైన విషయాలపై భద్రంగా AI సహాయం పొందాలనుకునే వినియోగదారుల కోసం ఈ టెక్నాలజీని అభివృద్ధి చేశామని మెటా రీసెర్చ్ విభాగం పేర్కొంది.