OnePlus Realme Merger: విలీనం కానున్న వన్‌ప్లస్, రియల్‌మీ..!?

వన్ ప్లస్ సంస్థ తన సోదర సంస్థ అయిన రియల్‌మీతో కలిసిపోబోతోంది అంటూ వస్తున్న వార్తలను వన్ ప్లస్ ఖండించింది. గత కొద్ది రోజులుగా సోషల్ మీడియాలో వన్ ప్లస్ , రియల్‌మీ కంపెనీలు ఒకే బ్రాండ్‌గా మారిపోతున్నాయని ప్రచారం జరిగింది. చైనాకు చెందిన ఒక సమాచారకర్త ద్వారా ఈ వార్త బయటకు వచ్చింది. ఈ రెండు కంపెనీలు తమ మార్కెటింగ్, సాఫ్ట్‌వేర్ , వస్తువుల తయారీ విభాగాలను ఒక్కటి చేయబోతున్నారని, దీనికి వన్ ప్లస్ చైనా అధ్యక్షుడు నాయకత్వం వహిస్తారని ఆ వార్తల సారాంశం.

ఈ వార్తలపై వన్ ప్లస్ స్పందిస్తూ.. “భారతదేశంలో మా వ్యాపారం ఎప్పటిలాగే సాగుతోంది. అన్ని పనులు ప్రణాళిక ప్రకారమే జరుగుతున్నాయి. ఇలాంటి ఆధారాలు లేని వార్తలను నమ్మవద్దు, మీడియా కూడా వీటిని ప్రచారం చేయవద్దు” అని కోరింది. అయితే.. రియల్‌మీ సంస్థ మాత్రం ఈ విషయంపై స్పందించడానికి నిరాకరించింది.

ప్రస్తుతానికి వన్ ప్లస్ ఎక్కడికీ వెళ్లడం లేదు. ఇటీవల వన్ ప్లస్ నోర్డ్ 6 సిరీస్ ఫోన్లను కూడా విడుదల చేసింది. అటు రియల్‌మీ కూడా తన కొత్త మోడళ్లను మార్కెట్లోకి తీసుకువస్తూనే ఉంది. భారతదేశ స్మార్ట్‌ఫోన్ మార్కెట్లో ప్రస్తుతం తీవ్రమైన పోటీ ఉంది. సామ్ సంగ్, వివో , ఒప్పో వంటి కంపెనీల నుంచి వన్ ప్లస్ గట్టి పోటీని ఎదుర్కొంటోంది. అందుకే ఇలాంటి విలీనం వార్తలు ప్రాధాన్యత సంతరించుకున్నాయి. వన్ ప్లస్ ఎప్పుడూ నాణ్యతకు, వేగానికి ప్రాధాన్యత ఇస్తుంది, రియల్‌మీ తక్కువ ధరలో ఎక్కువ ఫీచర్లు ఇచ్చే ఫోన్లతో యువతను ఆకట్టుకుంటోంది. ప్రస్తుతానికి అయితే ఈ రెండు కంపెనీలు విడివిడిగానే తమ ప్రయాణాన్ని కొనసాగించనున్నాయి.