Cheetah 2 Pro, Cheetah 2 Ultra launch: అమెజ్ఫిట్ (Amazfit) భారత మార్కెట్లో కొత్తగా హై-పర్ఫార్మెన్స్ స్మార్ట్వాచ్ లైన Cheetah 2 Pro, Cheetah 2 Ultraలను అధికారికంగా లాంచ్ చేసింది. ముఖ్యంగా ప్రొఫెషనల్ రన్నర్లు, మారథాన్ అథ్లెట్లు, ట్రైల్ రన్నింగ్ చేసే వారి అవసరాలను దృష్టిలో ఉంచుకుని ఈ రెండు వాచ్ లను రూపొందించింది. అధునాతన GPS, AI ఆధారిత ట్రైనింగ్ ప్లాన్లు, ఎక్కువ రోజులు బ్యాటరీ లైఫ్, టైటానియం బాడీ వంటి ప్రీమియం ఫీచర్లు వీటిలో ఉన్నాయి.
Amazfit Cheetah 2 Pro:
Amazfit Cheetah 2 Pro ప్రధానంగా రోడ్ మారథాన్ల కోసం సిద్ధమవుతున్న రన్నర్లను లక్ష్యంగా చేసుకుని రూపొందించబడింది. ఈ స్మార్ట్వాచ్లో Zepp Coach ద్వారా 3K రేసుల నుంచి పూర్తి మారథాన్ వరకు వ్యక్తిగతీకరించిన ట్రైనింగ్ ప్లాన్లు అందుబాటులో ఉంటాయి. అలాగే ట్రైనింగ్ పీక్స్, స్త్రవా, రున్న, ఇంటెర్వల్స్.ఐసీయూ వంటి ప్రముఖ ఫిట్నెస్ ప్లాట్ఫారమ్లతో ఇంటిగ్రేషన్ సపోర్ట్ కూడా ఉంది.
ఈ వాచ్లో Grade 5 Titanium ఫ్రేమ్, Sapphire గ్లాస్ ప్రొటెక్షన్తో కూడిన 1.32 అంగుళాల AMOLED డిస్ప్లేను అందించారు. 3000 నిట్స్ వరకు పీక్ బ్రైట్నెస్ ఉండటంతో ఎండలో కూడా స్పష్టమైన విజిబిలిటీ లభిస్తుంది. అలాగే తెల్లవారుజామున లేదా రాత్రి సమయంలో పరుగులు తీసే వారికి డ్యూయల్ మోడ్ ఫ్లాష్లైట్ సౌకర్యం కూడా ఉంది. రన్నింగ్ పవర్, లాక్టేట్ థ్రెషోల్డ్, పేసింగ్, గైట్ ట్రాకింగ్, ఫినిషింగ్ టైమ్ ప్రిడిక్షన్ వంటి అధునాతన ఫీచర్లు ఇందులో ఉన్నాయి. HRV, VO2 Max, నిద్ర నాణ్యత, అలసట స్థాయిలు వంటి ఆరోగ్య సంబంధిత వివరాలను Zepp యాప్ ద్వారా విశ్లేషించుకోవచ్చు.
డ్యూయల్-బ్యాండ్, మల్టీ-శాటిలైట్ GPS వ్యవస్థను ఉపయోగించడం వల్ల మార్గాలను అత్యంత ఖచ్చితంగా ట్రాక్ చేయగలదు. 540mAh బ్యాటరీతో సాధారణ వినియోగంలో 20 రోజుల వరకు, హెవీ యూజ్లో 10 రోజుల వరకు బ్యాటరీ బ్యాకప్ లభిస్తుంది. Accurate GPS మోడ్లో 31 గంటల వరకు పనిచేస్తుంది.
Amazfit Cheetah 2 Ultra:
Cheetah 2 అల్ట్రా మోడల్ ప్రత్యేకంగా ట్రైల్ రన్నింగ్, పర్వత ప్రాంతాల్లో సుదూర పరుగులు చేసే వారి కోసం రూపొందించబడింది. కఠినమైన వాతావరణ పరిస్థితులను తట్టుకునేలా Grade 5 Titanium బెజెల్, ఫ్రేమ్, బ్యాక్ కవర్తో దీనిని తయారు చేశారు. ఈ వాచ్లో 1.5 అంగుళాల AMOLED డిస్ప్లేను అందించారు. 3000 నిట్స్ బ్రైట్నెస్తో పాటు పూర్తి రంగుల టోపోగ్రాఫిక్, కాంటూర్ మ్యాప్స్ను ఆఫ్లైన్లో స్టోర్ చేసుకునే సౌకర్యం ఉంది. అడవులు, కొండ ప్రాంతాల్లో కూడా ఖచ్చితమైన నావిగేషన్ అందించేందుకు డ్యూయల్-ఫ్రీక్వెన్సీ GPS, 6 శాటిలైట్ పొజిషనింగ్ సిస్టమ్లను ఉపయోగించారు.
బయో ఛార్జ్ ఎనర్జీ మానిటరింగ్, గ్రౌండ్ కాంటాక్ట్ టైమ్, పోష్చర్ ట్రాకింగ్, రన్నింగ్ పవర్, లాక్టేట్ థ్రెషోల్డ్ వంటి ఫీచర్లతో ట్రైనింగ్ విశ్లేషణను మరింత మెరుగుపరిచారు. 64GB అంతర్గత స్టోరేజ్ అందించడంతో మ్యాప్స్తో పాటు 100 గంటలకు పైగా ఆడియో కంటెంట్ను స్టోర్ చేసుకోవచ్చు. 780mAh బ్యాటరీతో సాధారణ వినియోగంలో 30 రోజుల వరకు బ్యాటరీ లైఫ్ అందుతుంది. Accurate GPS మోడ్లో 60 గంటల వరకు పనిచేయగలదు. ట్రైల్ రన్నింగ్ మోడ్లో కూడా దీర్ఘకాలిక పనితీరును అందించేలా దీనిని రూపొందించారు.
ధరలు:
Amazfit Cheetah 2 Pro ధర రూ. 41,999గా నిర్ణయించారు. ఇది టైటానియం కలర్లో అందుబాటులో ఉంటుంది. అలాగే Amazfit Cheetah 2 Ultra ధర రూ. 54,999. ఇది బ్లాక్ సిలికాన్ స్ట్రాప్తో వస్తుంది. అదనంగా గ్రీన్ నైలాన్ స్ట్రాప్ను విడిగా కొనుగోలు చేయవచ్చు. ఈ రెండు స్మార్ట్వాచ్లు ప్రస్తుతం Amazfit India అధికారిక ఆన్లైన్ స్టోర్, అమెజాన్ తో పాటు ఎంపిక చేసిన ఆఫ్లైన్ స్టోర్లలో కూడా అమ్మకాలకు అందుబాటులో ఉన్నాయి.