Football Club: 41 సెల్ఫ్ గోల్స్ వేశారు.. జీవితకాల నిషేధానికి గురయ్యారు

ఉత్కంఠభరితంగా సాగే ఫుట్‌బాల్ ఆటలో అప్పుడప్పుడు సెల్ఫ్ గోల్స్ పడడం సహజం. ఎలాగైనా తమ కోర్టులో ప్రత్యర్థులు గోల్ వేయకూడదన్న ఆతృతలో, పొరపాటుగా తామే సెల్ఫ్ గోల్స్ వేసేస్తుంటారు. ఒక్కోసారి ఈ ఇన్సిడెంట్స్ చాలా ఫన్నీగా అనిపిస్తాయి. కాకపోతే.. ఇలాంటి సెల్ఫ్ గోల్స్ అనేవి మహా అయితే ఒకట్రెండు నమోదైన దాఖలాలున్నాయి. కానీ, 41 సెల్ఫ్ గోల్స్ నమోదవ్వడం మీరెప్పుడైనా చూశారా?

సౌతాఫ్రికాకు చెందిన సామీ మైటీబర్డ్స్ అనే ఫుల్‌బాల్ క్లబ్ ఆ పని చేసింది. దీంతో, జీవితకాల నిషేధానికి గురైంది. మ్యాచ్ ఫిక్సింగ్‌కు పాల్పడినట్లు తేలడంతో, ఆ క్లబ్‌పై లైఫ్‌టైమ్ బ్యాన్ విధించారు. ఆ క్లబ్‌లో ఉన్న నాలుగు టీమ్‌లకూ ఈ నిషేధం వర్తించనుంది. ఇటీవల సామీ మైటీబర్డ్స్, మతియాసి టీమ్స్ మధ్య ఫుట్‌బాల్ మ్యాచ్ నిర్వహించారు. ఇందులో 59-1 గోల్స్ తేడాతో సామీ మైటీబర్డ్స్ ఘోర పరాజయం చవిచూసింది. అయితే, ఇందులో 41 గోల్స్ సామీ మైటీబర్డ్స్ సెల్ఫ్ గోల్స్ ఉన్నాయి. నిబంధనల ప్రకారం.. సెల్ఫ్ గోల్ చేస్తే, అది ప్రత్యర్థి ఖాతాలోకి వెళ్తుంది. ఈ నేపథ్యంలోనే ఆ 41 సెల్ఫ్ గోల్స్ మతియాసి ఖాతాలోకి వెళ్లిపోయాయి.

ఒకట్రెండైతే ఓకే గానీ, మరీ 41 సెల్ఫ్ గోల్స్ కొట్టడమేంటా? అని విచారించారు. ఈ క్రమంలోనే మ్యాచ్ ఫిక్సింగ్‌కు పాల్పడినట్టు తేలింది. సామీ మైటీబర్డ్స్‌ జట్టులో ప్లేయర్‌ నెం-2 10 గోల్స్‌, ప్లేయర్‌ నెంబర్‌-5 20 గోల్స్‌, మరొక ప్లేయర్‌ 11 గోల్స్.. సెల్ఫ్‌ గోల్స్‌ కొట్టినట్లు వెల్లడైంది. ఉద్దేశ పూర్వకంగానే మ్యాచ్‌ ఫిక్సింగ్‌కు పాల్పడినట్లు తేలడంతో.. సౌతాఫ్రికా లోయర్‌ డివిజన్‌లోని నాలుగు క్లబ్స్‌పై లైఫ్‌టైమ్ బ్యాన్ విధించడం జరిగింది.