Shikhar Dhawan Vs Shubman Gill : ప్రిన్స్ వర్సెస్ గబ్బర్.. ఇద్దరిలో ఇండియాకి ఎవరు బెస్ట్ ఓపెనర్? గణాంకాలు ఏం చెబుతున్నాయి?

Shikhar Dhawan Vs Shubman Gill : ఒకప్పుడు భారత వన్డే జట్టుకు శిఖర్ ధావన్ ఓ నమ్మకమైన ఓపెనింగ్ బ్యాటర్. ప్రత్యర్థి ఎవరైనా సరే దూకుడైన ఆటతో జట్టుకు బలమైన పునాది వేయడం అతని ప్రత్యేకత. ఇప్పుడు అదే బాధ్యతను మరో యువ ఆటగాడు భుజాన వేసుకున్నాడు. ఆ ఆటగాడే శుభ్‌మన్ గిల్. తాజాగా ఆఫ్ఘానిస్థాన్‌తో జరిగిన తొలి వన్డేలో అజేయ అర్ధశతకంతో జట్టుకు విజయాన్ని అందించిన గిల్, తన కెరీర్ ప్రారంభ దశలోనే ఎన్నో రికార్డులను అందుకుంటూ ముందుకు సాగుతున్నాడు. ఈ నేపథ్యంలో వన్డేల్లో ఓపెనర్‌గా తొలి 57 ఇన్నింగ్స్ తర్వాత గిల్ ప్రదర్శన ఎలా ఉందో, అదే దశలో శిఖర్ ధావన్ గణాంకాలు ఎలా ఉన్నాయో పరిశీలిస్తే ఆసక్తికరమైన చిత్రమే కనిపిస్తోంది.

ధర్మశాలలో జరిగిన తొలి వన్డేలో భారత జట్టు ఏడు వికెట్ల తేడాతో ఆఫ్ఘానిస్థాన్‌ను ఓడించింది. వర్షం కారణంగా 25 ఓవర్లకు కుదించిన ఈ మ్యాచ్‌లో ముందుగా బ్యాటింగ్ చేసిన ఆఫ్ఘానిస్థాన్ 194 పరుగులు చేసింది. రహ్మానుల్లా గుర్బాజ్ అద్భుత సెంచరీతో ఆకట్టుకున్నప్పటికీ భారత బౌలర్లు మ్యాచ్‌పై పట్టువిడవలేదు. అరంగేట్ర ఆటగాళ్లు గుర్నూర్ బ్రార్, హర్ష్ దూబే తలో మూడు వికెట్లు తీసి జట్టుకు కీలక విజయాన్ని అందించారు. అనంతరం లక్ష్య ఛేదనలో కెప్టెన్ శుభ్‌మన్ గిల్ 66 బంతుల్లో 84 పరుగులతో అజేయంగా నిలిచి ప్లేయర్ ఆఫ్ ది మ్యాచ్ అవార్డు అందుకున్నాడు. ఇషాన్ కిషన్ 34, కేఎల్ రాహుల్ 39 పరుగులతో మంచి సహకారం అందించారు.

వన్డేల్లో ఓపెనర్‌గా ఇప్పటివరకు 57 ఇన్నింగ్స్ ఆడిన గిల్ 2,771 పరుగులు సాధించాడు. అతని సగటు 57.72 కాగా స్ట్రైక్ రేట్ 99.35గా ఉంది. ముఖ్యంగా న్యూజిలాండ్‌పై 13 ఇన్నింగ్స్‌లో 742 పరుగులు చేసి 74.20 సగటును నమోదు చేశాడు. శ్రీలంకపై తొమ్మిది ఇన్నింగ్స్‌లో 402 పరుగులు సాధించి 50.25 సగటుతో రాణించాడు. మరోవైపు ఇదే 57 ఇన్నింగ్స్ దశలో శిఖర్ ధావన్ 2,428 పరుగులు చేశాడు. అతని సగటు 44.96 కాగా స్ట్రైక్ రేట్ 90.69. వెస్టిండీస్‌పై 523 పరుగులు, శ్రీలంకపై 500 పరుగులు సాధించినప్పటికీ గిల్‌తో పోలిస్తే సగటు, స్ట్రైక్ రేట్ పరంగా వెనుకబడ్డాడు.

సెంచరీల విషయానికి వస్తే ధావన్ స్వల్ప ఆధిక్యంలో ఉన్నాడు. తొలి 57 ఓపెనింగ్ ఇన్నింగ్స్‌లో ధావన్ ఎనిమిది సెంచరీలు, 12 అర్ధశతకాలు నమోదు చేశాడు. గిల్ మాత్రం ఏడు సెంచరీలు, 17 అర్ధశతకాలతో నిలిచాడు. అయితే గిల్ పేరిట ఉన్న అత్యుత్తమ స్కోరు మరింత ప్రత్యేకం. 2023 జనవరిలో హైదరాబాద్‌లో న్యూజిలాండ్‌పై అతను 149 బంతుల్లో 208 పరుగులు చేసి డబుల్ సెంచరీ నమోదు చేశాడు. అదే ఏడాది తిరువనంతపురంలో శ్రీలంకపై 116 పరుగులతో మరో అద్భుత ఇన్నింగ్స్ ఆడాడు. ధావన్ విషయానికి వస్తే 2015 ప్రపంచకప్‌లో దక్షిణాఫ్రికాపై 137 పరుగులు, 2013లో ఆస్ట్రేలియాపై 100 పరుగులతో గుర్తుండిపోయే ఇన్నింగ్స్‌లు ఆడాడు.

జట్టు విజయాల్లో ఇద్దరి పాత్రను పరిశీలిస్తే గిల్ ప్రభావం మరింత స్పష్టంగా కనిపిస్తుంది. భారత జట్టు గెలిచిన 40 మ్యాచ్‌లలో గిల్ 2,299 పరుగులు చేసి 71.84 సగటును నమోదు చేశాడు. ఆ ఇన్నింగ్స్‌లలో ఆరు సెంచరీలు, 15 అర్ధశతకాలు ఉన్నాయి. ఓడిన మ్యాచ్‌ల్లో మాత్రం అతని సగటు 29.84కి పడిపోయింది. ధావన్ కూడా విజయాల్లో కీలక పాత్ర పోషించాడు. భారత జట్టు గెలిచిన 36 మ్యాచ్‌లలో అతను 1,973 పరుగులు చేసి 58.02 సగటును నమోదు చేశాడు. అయితే ఓటముల్లో అతని సగటు 22.50 మాత్రమే.

మొత్తంగా చూస్తే తొలి 57 వన్డే ఓపెనింగ్ ఇన్నింగ్స్‌ల తర్వాత గిల్ గణాంకాలు ధావన్ కంటే మెరుగ్గా కనిపిస్తున్నాయి. సెంచరీల సంఖ్యలో ధావన్ ముందున్నా, పరుగులు, సగటు, స్ట్రైక్ రేట్, మ్యాచ్‌లపై చూపుతున్న ప్రభావం పరంగా గిల్ ఆధిక్యాన్ని చాటుతున్నాడు. ఇంకా కెరీర్ ప్రారంభ దశలోనే ఉన్న గిల్ ఇదే స్థాయిలో కొనసాగితే భారత వన్డే క్రికెట్‌లో అత్యుత్తమ ఓపెనర్ల జాబితాలో మరింత ఎత్తుకు చేరే అవకాశాలు స్పష్టంగా కనిపిస్తున్నాయి.