Scotland Squad: కొత్త కోచ్‌, కొత్త ఆశలు.. టీ20 వరల్డ్‌కప్‌కు స్కాట్లాండ్ జట్టు ఇదే, టాప్ జట్లకు షాక్ ఇస్తుందా?

టీ20 వరల్డ్‌కప్ 2026కు స్కాట్లాండ్ జట్టు సిద్ధమైంది. మరికొద్ది రోజుల్లో ఆరంభమయ్యే మెగా టోర్నమెంట్‌ కోసం స్కాట్లాండ్ క్రికెట్ బోర్డు 15 మంది సభ్యులతో కూడిన జట్టును ఈరోజు అధికారికంగా ప్రకటించింది. 2007లో జరిగిన తొలి టీ20 వరల్డ్‌కప్‌లో కూడా స్కాట్లాండ్ పాల్గొనగా.. దాదాపు రెండు దశాబ్దాల తర్వాత మరోసారి సత్తా చాటేందుకు సిద్ధమవుతోంది. ఈసారి అనుభవం, యువత కలయికతో కూడిన స్క్వాడ్‌ను ఎంపిక చేసి ప్రత్యర్థులకు గట్టి పోటీ ఇవ్వాలనే లక్ష్యంతో స్కాట్లాండ్ బరిలోకి దిగుతోంది. కొత్త హెడ్ కోచ్ ఓవెన్ డాకిన్స్ మార్గదర్శకత్వంలో కెప్టెన్ రిచీ బెర్రింగ్టన్ జట్టును ముందుకు నడిపించనున్నాడు. టోర్నీ నుంచి బంగ్లాదేశ్ తప్పుకోవడంతో స్కాట్లాండ్ ఎంట్రీ ఇచ్చిన విషయం తెలిసిందే.

బ్యాటింగ్‌లో జార్జ్ మున్సీ, రిచీ బెర్రింగ్టన్ లాంటి పవర్ హిట్టర్లు కీలక పాత్ర పోషించనున్నారు. ఆల్‌రౌండర్లుగా క్రిస్ గ్రీవ్స్, మెక్‌ముల్లెన్ జట్టుకు అందుబాటులో ఉన్నారు. బౌలింగ్ విభాగంలో మార్క్ వాట్, సఫ్యాన్ షరీఫ్, బ్రాడ్లీ వీల్‌లపై స్కాట్లాండ్ భారీ ఆశలు పెట్టుకుంది. ఆఫ్ఘాన్‌లో జన్మించిన ఫాస్ట్ బౌలర్ జైనుల్లా ఇహ్సాన్ తొలిసారి స్కాట్లాండ్ జట్టుకు ఎంపికయ్యాడు. ఇటీవలే స్కాట్లాండ్ తరఫున ఆడేందుకు అర్హత సాధించిన అతడిపై టీమ్ మేనేజ్‌మెంట్ భారీ ఆశలు పెట్టుకుంది. మాజీ న్యూజిలాండ్ ఆటగాడు టామ్ బ్రూస్ కూడా స్క్వాడ్‌లో చోటు సంపాదించుకున్నాడు.

రిజర్వ్ ఆటగాళ్లుగా జాస్పర్ డేవిడ్‌సన్, జాక్ జార్విస్‌లను ఎంపిక చేయగా.. నాన్-ట్రావెలింగ్ రిజర్వ్‌లుగా మాకెంజీ జోన్స్, క్రిస్ మెక్‌బ్రైడ్, చార్లీ టియర్‌ను ఎంపిక చేశారు. ఇటీవల అంతర్జాతీయ టీ20ల్లో మెరుగైన ప్రదర్శనతో ఆకట్టుకున్న స్కాట్లాండ్, ఈ వరల్డ్‌కప్‌లో కూడా పెద్ద జట్లకు షాకులు ఇవ్వాలనే ధీమాతో ఉంది. ఈ 15 మంది స్క్వాడ్‌తో స్కాట్లాండ్ టీమ్ టోర్నమెంట్‌లో ఎలాంటి ప్రభావం చూపుతుందో చూడాలి. మెగా టోర్నమెంట్‌లో స్కాట్లాండ్ గ్రూప్ ‘సి’లో ఉంది. ఈ గ్రూప్‌లో ఇంగ్లాండ్, ఇటలీ, నేపాల్, వెస్ట్ ఇండీస్ జట్లు ఉన్నాయి. స్కాట్లాండ్ తమ తొలి మ్యాచ్ ఫిబ్రవరి 7న కోల్‌కతాలోని ఈడెన్ గార్డెన్స్ వేదికగా వెస్టిండీస్‌తో ఆడనుంది.

Also Read: T20 World Cup 2026: మెంటలెక్కించే బ్యాటింగ్‌ లైనప్‌లు.. టీ20 వరల్డ్‌కప్‌ను కొట్టేది ఈ జట్లేనా?

స్కాట్లాండ్ స్క్వాడ్‌:
రిచీ బెర్రింగ్టన్ (కెప్టెన్), టామ్ బ్రూస్, మాథ్యూ క్రాస్, బ్రాడ్లీ కరీ, ఒలివర్ డేవిడ్‌సన్, క్రిస్ గ్రీవ్స్, జైనుల్లా ఇహ్సాన్, మైకేల్ జోన్స్, మైకేల్ లీస్క్, ఫిన్లే మెక్రెత్, బ్రాండన్ మెక్‌ముల్లెన్, జార్జ్ మున్సీ, సఫ్యాన్ షరీఫ్, మార్క్ వాట్, బ్రాడ్లీ వీల్.
రిజర్వ్ ఆటగాళ్లు: జాస్పర్ డేవిడ్‌సన్, జాక్ జార్విస్‌.
నాన్-ట్రావెలింగ్ రిజర్వ్‌లు: మాకెంజీ జోన్స్, క్రిస్ మెక్‌బ్రైడ్, చార్లీ టియర్‌.