Ishan Kishan T20 Rankings: 64 నుంచి 2కు.. ఇషాన్ కిషన్ సూపర్ కంబ్యాక్!

అంతర్జాతీయ క్రికెట్ మండలి (ఐసీసీ) టీ20 ర్యాంకింగ్స్‌ తాజాగా విడుదల చేసింది. భారత యువ వికెట్ కీపర్ బ్యాటర్ ఇషాన్ కిషన్ టీ20 బ్యాటింగ్ ర్యాంకింగ్స్‌లో అద్భుతమైన కంబ్యాక్‌తో అందరినీ ఆశ్చర్యానికి గురిచేశాడు. కొద్ది కాలం క్రితం వరకూ ఐసీసీ ర్యాంకింగ్స్‌లో 64వ స్థానంలో ఉన్న కిషన్.. ఇప్పుడు ఏకంగా రెండో స్థానానికి (871 పాయింట్లు) ఎగబాకి తన ప్రతిభను నిరూపించాడు.

టీ20 ప్రపంచ కప్‌ 2026 ముందు న్యూజీలాండ్‌తో జరిగిన టీ20 సిరీస్‌కు ముందు ఇషాన్ కిషన్ ఐసీసీ ర్యాంకింగ్స్‌లో 64వ స్థానంలో ఉన్నాడు. అయితే ఆ సిరీస్‌లో అద్భుతమైన బ్యాటింగ్ ప్రదర్శనతో కీలక ఇన్నింగ్స్‌లు ఆడాడు. 5వ టీ20లో కివీస్‌పై 43 బంతుల్లో 103 పరుగులు చేశాడు. సిరీస్ ముగిసే సరికి ఐసీసీ ర్యాంకింగ్స్‌లో 32వ స్థానానికి చేరుకున్నాడు. టీ20 ప్రపంచ కప్‌ 2026లో కిషన్ రెచ్చిపోయాడు. ప్రపంచ కప్‌లో 35.22 సగటుతో 317 పరుగులు చేశాడు. న్యూజిలాండ్‌తో జరిగిన మ్యాచ్‌లో 25 బంతుల్లో 54 పరుగులు చేశాడు. ఈ ప్రదర్శనతో తాజాగా విడుదలైన ఐసీసీ టీ20 బ్యాటింగ్ ర్యాంకింగ్స్‌లో రెండో స్థానంలో నిలిచాడు.

Also Read: AP Ministers Ratings: మంత్రులకు సీఎం చంద్రబాబు రేటింగ్స్.. అచ్చెన్నాయుడు ఫస్ట్, అనిత లాస్ట్!

64వ స్థానం నుంచి రెండో స్థానానికి రావడం ఇషాన్ కిషన్ కెరీర్‌లో గొప్ప కంబ్యాక్‌గా నిలిచింది. కిషన్ దూకుడు బ్యాటింగ్, భారీ షాట్లతో టీమ్ ఇండియాకు కీలక ఆటగాడిగా మారాడు. ముఖ్యంగా పవర్‌ప్లేలో వేగంగా పరుగులు చేయడం అతని ప్రత్యేకత. ఈ ప్రదర్శనతో ప్రపంచ క్రికెట్‌లో అతని స్థానం మరింత బలపడింది. ఇదే ఫామ్ కొనసాగిస్తే రాబోయే మ్యాచ్‌ల్లో కిషన్ ఐసీసీ టీ20 బ్యాటింగ్ ర్యాంకింగ్స్‌లో మొదటి స్థానాన్ని కూడా అందుకునే అవకాశం ఉంది.