Ishan Kishan Run Out Video Goes Viral: భారత్, ఇంగ్లండ్ మధ్య జరిగిన తొలి టీ20 మ్యాచ్లో భారత వికెట్కీపర్ బ్యాటర్ ఇషాన్ కిషన్ నిరాశపరిచాడు. మ్యాచ్కు ముందు అంతర్జాతీయ టీ20 బ్యాటర్ల ర్యాంకింగ్స్లో ప్రపంచ నంబర్-1 స్థానాన్ని అందుకున్న ఇషాన్.. తొలి టీ20లో మాత్రం ఖాతా కూడా తెరవలేకపోయాడు. కేవలం రెండు బంతులు ఎదుర్కొన్న అతడు రనౌట్ రూపంలో డకౌట్గా వెనుదిరిగాడు. ఈ రనౌట్కు సంబంధించిన వీడియో ప్రస్తుతం సోషల్ మీడియాలో వైరల్గా మారింది.
ఇన్నింగ్స్ ఆరంభంలోనే సంజు శాంసన్ పెవిలియన్ చేరాడు. మూడో స్థానములో ఇషాన్ కిషన్ క్రీజులోకి వచ్చాడు. సాకిబ్ మహమూద్ వేసిన రెండో ఓవర్ చివరి బంతిని లెగ్ సైడ్ షాట్ ఆడి.. పరుగు తీసేందుకు ప్రయత్నించాడు. పరుగు అవకాశం లేదని భావించిన అభిషేక్ శర్మ.. వెంటనే నిరాకరించాడు. అప్పటికే పిచ్ మధ్యలోకి వచ్చిన ఇషాన్.. వెనక్కి వెళ్లే ప్రయత్నం చేశాడు. కానీ అప్పటికే వికెట్ కీపర్ జోష్ బట్లర్ రనౌట్ చేశాడు. దాంతో అభిషేక్ కోపంగా ‘క్యా కర్ రహా హై?’ (ఏం చేస్తున్నావ్?) అని అరిచాడు. ఆ మాటలు స్టంప్ మైక్లో రికార్డు అయ్యాయి. ఆ వీడియో సోషల్ మీడియాలో వైరల్ అయింది.
భారత క్రికెట్ దిగ్గజం సునీల్ గవాస్కర్ ఈ రనౌట్పై తన అభిప్రాయాన్ని వెల్లడించాడు. కామెంట్రీ సందర్భంగా మాట్లాడుతూ.. ‘ఈ ఫార్మాట్లో బ్యాటర్లు వీలైనంత త్వరగా ఖాతా తెరవాలని అనుకోవడం సహజం. కానీ ఈ రనౌట్లో అభిషేక్ శర్మ తప్పు ఏమాత్రం లేదు. పూర్తి బాధ్యత ఇషాన్ కిషన్దే. పరుగు కోసం తొందరపడ్డాడు’ అని స్పష్టం చేశాడు. అభిమానులు కూడా ఈ రనౌట్పై భిన్నాభిప్రాయాలు వ్యక్తం చేస్తున్నారు. ‘ఇషాన్ కిషన్.. కాస్త చూసుకోవాలి కదా’, ‘ఇషాన్ బ్రో.. తొందర పడ్డావ్’ అంటూ కామెంట్స్ చేస్తున్నారు.
ఇక మ్యాచ్ విషయానికి వస్తే.. తొలుత బ్యాటింగ్ చేసిన భారత్ నిర్ణీత 20 ఓవర్లలో 7 వికెట్ల నష్టానికి 189 పరుగులు చేసింది. కెప్టెన్ శ్రేయస్ అయ్యర్ 47 బంతుల్లో 68 పరుగులు చేశాడు. అభిషేక్ శర్మ 24 బంతుల్లోనే 59 పరుగులు చేసి ఇంగ్లండ్ బౌలర్లపై విరుచుకుపడ్డాడు. ఇన్నింగ్స్ చివర్లో శివమ్ దూబే 21 బంతుల్లో 42 పరుగులతో అజేయంగా నిలిచి భారత్కు భారీ స్కోరు అందించాడు. అయితే ఇంగ్లండ్ ఇన్నింగ్స్ ప్రారంభమయ్యే సమయానికి భారీ వర్షం కురవడంతో మ్యాచ్ను కొనసాగించడం సాధ్యపడలేదు. అంపైర్లు చాలా సేపు వేచి చూసినా వర్షం తగ్గకపోవడంతో చివరకు మ్యాచ్ను రద్దు చేశారు.
Another Disappointing start for Team India.
Sanju Samson again fails to score.
Followed by a run out of in-form Ishan Kishan.Not the Start we imagined.#ENGvINDpic.twitter.com/y9H3qfFIh7
— TheFakeFakeer (@TheFakeFakeer) July 1, 2026