Travis Head: SRH ఫ్యాన్స్‌కు షాక్.. ట్రావిస్ హెడ్ బ్యాటింగ్‌లో ఇంత మార్పా..? గణాంకాలు ఏం చెబుతున్నాయి?

గత ఏడాది ఐపీఎల్‌లో ట్రావిస్ హెడ్ అంటే ప్రత్యర్థి బౌలర్లకు వెన్నులో వణుకు పుట్టేది. క్రీజులోకి వచ్చాడంటే చాలు, తొలి బంతి నుంచే బాదుడు మొదలుపెట్టేవాడు. అభిషేక్ శర్మతో కలిసి అతను ఇచ్చే మెరుపు ఆరంభాలు సన్ రైజర్స్ భారీ స్కోర్లకు పునాది వేసేవి. కానీ, ఈ ఏడాది పరిస్థితి మారింది. హెడ్ బ్యాట్ నుంచి ఆశించిన స్థాయిలో పరుగులు రావడం లేదు. ఆ పాత వేగం, ఆ పాత జోరు కనిపించడం లేదు. చిన్న పిల్లలు ఆటలో ఎలాగైతే తడబడతారో, ఇప్పుడు హెడ్ కూడా అలాగే క్రీజులో ఇబ్బంది పడుతున్నట్లు కనిపిస్తోంది. కేవలం 20 పరుగులు దాటడానికే అతను కష్టపడుతుండటం చూస్తుంటే, అసలు సన్ రైజర్స్ ప్లాన్ ఎక్కడ దెబ్బతింటోంది? అనే అనుమానం కలుగుతోంది.

ఆరంభంలో అదరగొట్టి.. ఆపై తడబడి

చెన్నై సూపర్‌ కింగ్స్‌తో జరిగిన మ్యాచ్‌లో సన్ రైజర్స్ ఆరంభం చూస్తే అంతా బాగున్నట్లే అనిపించింది. పవర్‌ప్లే ముగియకముందే స్కోరు బోర్డు మీద 75 పరుగులు ఉన్నాయి. అభిషేక్ శర్మ సిక్సర్లతో చెలరేగిపోతుంటే, హెడ్ మాత్రం కాస్త నెమ్మదిగా ఆడాడు. అభిషేక్ ధాటికి చెన్నై బౌలర్లు అయోమయంలో పడ్డారు. కానీ పవర్‌ప్లే ఆఖరి బంతికి హెడ్ అనవసరమైన షాట్ ఆడి అవుట్ అయ్యాడు. అక్కడే మ్యాచ్ మలుపు తిరిగింది. ఒక వికెట్ పడగానే వెంటనే మరో వికెట్ పడటం SRHకు ఈ సీజన్‌లో ఒక అలవాటుగా మారింది. హెడ్ అవుట్ అయిన వెంటనే ఇషాన్ కిషన్ కూడా అవుట్ అవ్వడం జట్టును కష్టాల్లోకి నెట్టింది.

పడిపోతున్న గణాంకాలు

గత సీజన్‌తో పోలిస్తే ట్రావిస్ హెడ్ ఆట తీరులో స్పష్టమైన మార్పు వచ్చింది. 2024లో అతని స్ట్రైక్ రేట్ 182 ఉండగా, ఇప్పుడు అది 150కి పడిపోయింది. అంతకుముందు అతను 41 సగటుతో పరుగులు చేస్తే, ఇప్పుడు కేవలం 23 సగటుకు పరిమితమయ్యాడు. గత ఏడాది అతను ఎన్నో అర్ధ సెంచరీలు సాధించాడు, కానీ ఈ ఏడాది ఇప్పటివరకు ఒక్కటి మాత్రమే చేయగలిగాడు. డాట్ బాల్స్ శాతం కూడా పెరిగిపోయింది. ఇది జట్టుపై ఒత్తిడిని పెంచుతోంది.

Also Read:Diapers on Buffaloes: పిల్లలకే కాదు.. బర్రెలకు కూడా డైపర్స్.. ఎక్కడంటే.

క్లాసెన్ నెమ్మదిగా ఆడుతున్నాడా?
జట్టులో మరో కీలక ఆటగాడు హెన్రిచ్ క్లాసెన్. సాధారణంగా ఇతను కూడా సిక్సర్ల కింగ్. కానీ ఈ సీజన్‌లో క్లాసెన్ స్ట్రైక్ రేట్ 144 మాత్రమే ఉంది. దీనిపై క్లాసెన్ స్పందిస్తూ.. “నేను క్రీజులోకి వచ్చేసరికి వరుసగా వికెట్లు పడిపోతున్నాయి. అలాంటప్పుడు నేను కూడా దూకుడుగా ఆడి వికెట్ పారేసుకుంటే జట్టు పరిస్థితి ఏంటి? అందుకే బాధ్యతగా నెమ్మదిగా ఆడుతున్నాను” అని తన నిర్ణయాన్ని సమర్థించుకున్నాడు. ఆరెంజ్ క్యాప్ అతని దగ్గరే ఉన్నా, జట్టు అవసరాల కోసం అతను తన సహజ సిద్ధమైన ఆటను మార్చుకోవాల్సి వస్తోంది.

చెన్నై మీద ఎలాగోలా 10 పరుగుల తేడాతో గెలిచినా, సన్ రైజర్స్‌లో ఇంకా ఎన్నో లోపాలు ఉన్నాయి. ముఖ్యంగా హెడ్, అభిషేక్ లాంటి ఓపెనర్లు క్రీజులో ఎక్కువ సేపు ఉండి, ఒకేసారి వికెట్లు పడకుండా చూసుకోవాలి. జట్టులోని ప్రధాన ఆటగాళ్లు తమ పాత ఫామ్‌ను అందిపుచ్చుకుంటేనే హైదరాబాద్ జట్టు ప్లేఆఫ్స్ ఆశలు సజీవంగా ఉంటాయి. లేదంటే మెరుపు ఆరంభాలు ఉన్నా, చివరకు ఓటములు తప్పవు.