SRH vs KKR IPL 2026: అరుదైన రికార్డు సాధించిన సునీల్ నరైన్.. ఐపీఎల్ చరిత్రలోనే తొలి ఆటగాడిగా..

ఐపీఎల్ 2026లో భాగంగా ఆదివారం కోల్‌కతా నైట్ రైడర్స్ (KKR), సన్ రైజర్స్ హైదరాబాద్ (SRH) జట్ల మధ్య జరిగిన మ్యాచ్‌లో సునీల్ నరైన్ అరుదైన చరిత్ర సృష్టించారు. ఈ మ్యాచ్‌లో రెండు వికెట్లు పడగొట్టడం ద్వారా ఐపీఎల్ చరిత్రలో 200 వికెట్ల మైలురాయిని దాటిన తొలి విదేశీ క్రికెటర్‌గా నరైన్ రికార్డు పుటల్లోకి ఎక్కారు. కేవలం ఒకే జట్టు (KKR) తరపున ఆడుతూ ఈ ఘనత సాధించిన ఏకైక బౌలర్‌గా కూడా ఆయన నిలిచారు. ఈ క్రమంలో జస్ప్రీత్ బుమ్రా (186), లసిత్ మలింగ (170) వంటి దిగ్గజాలను ఆయన అధిగమించారు.

ఈ మ్యాచ్‌కు ముందు 199 వికెట్లతో ఉన్న నరైన్, తన నాలుగు ఓవర్ల కోటాలో 31 పరుగులు ఇచ్చి 2 వికెట్లు తీయడం ద్వారా మొత్తం 201 వికెట్లకు చేరుకున్నారు. సలీల్ అరోరాను క్లీన్ బౌల్డ్ చేయడం ద్వారా తన 200వ వికెట్‌ను సాధించిన నరైన్, అదే ఓవర్ చివరి బంతికి ప్రమాదకరమైన ఇషాన్ కిషన్ (42)ను కూడా అవుట్ చేసి సన్ రైజర్స్ పతనాన్ని శాసించారు. ప్రస్తుతం ఐపీఎల్ చరిత్రలో అత్యధిక వికెట్లు తీసిన బౌలర్ల జాబితాలో యుజ్వేంద్ర చాహల్ (228), భువనేశ్వర్ కుమార్ (215) తర్వాత నరైన్ మూడో స్థానంలో కొనసాగుతున్నారు.

A special delivery to reach a special milestone 🤌

🎥 Sunil Narine picks his 200th #TATAIPL wicket with an unplayable delivery 🫡

Updates ▶️ https://t.co/muersQO7at#KhelBindaas | #SRHvKKR | @KKRiders pic.twitter.com/HTud7IBAq4

— IndianPremierLeague (@IPL) May 3, 2026

సన్ రైజర్స్ హైదరాబాద్ బ్యాటింగ్ వైఫల్యం..
మరోవైపు, పటిష్టమైన బ్యాటింగ్ లైనప్ ఉన్న సన్ రైజర్స్ హైదరాబాద్ ఈ మ్యాచ్‌లో ఘోరంగా విఫలమైంది. టాస్ గెలిచి బ్యాటింగ్ ఎంచుకున్న హైదరాబాద్‌కు ఓపెనర్ ట్రావిస్ హెడ్ (28 బంతుల్లో 61) మెరుపు ఇన్నింగ్స్‌తో అద్భుతమైన ఆరంభాన్ని ఇచ్చారు. ఒక దశలో 9 ఓవర్లలోనే 100 పరుగుల మార్కును దాటిన హైదరాబాద్, ఆ తర్వాత కేకేఆర్ బౌలర్ల ధాటికి పేకమేడలా కూలిపోయింది. 105/1తో పటిష్టంగా ఉన్న జట్టు, ఒక్కసారిగా తడబడి కేవలం 51 పరుగుల వ్యవధిలోనే మిగిలిన 9 వికెట్లు కోల్పోయింది.

ఐపీఎల్ 2026 సీజన్‌లో సన్ రైజర్స్ హైదరాబాద్ ఆల్-అవుట్ అవ్వడం ఇదే తొలిసారి. వరుణ్ చక్రవర్తి మూడు వికెట్లతో హైదరాబాద్ వెన్ను విరిచగా, సునీల్ నరైన్ రెండు కీలక వికెట్లతో మద్దతునిచ్చారు. అభిషేక్ శర్మ (15), హెన్రిచ్ క్లాసెన్ (11), కెప్టెన్ పాట్ కమిన్స్ (10) వంటి ప్రధాన బ్యాటర్లు నిరాశపరిచారు. ఫలితంగా 19 ఓవర్లలోనే 165 పరుగులకు హైదరాబాద్ కుప్పకూలింది. ఈ అద్భుత బౌలింగ్ ప్రదర్శనతో కేకేఆర్ మ్యాచ్‌పై పూర్తి పట్టు సాధించింది.