Daniel Vettori: “పక్కా ప్లాన్‌తో దిగుతున్నాం”.. పంజాబ్ జోరుకు బ్రేక్ వేసేందుకు SRH కోచ్ మాస్టార్ ప్లాన్!

Daniel Vettori: ఐపీఎల్ 2026 సీజన్‌లో భాగంగా పంజాబ్ కింగ్స్ (PBKS)తో జరగనున్న కీలక పోరుకు ముందు సన్‌రైజర్స్ హైదరాబాద్ (SRH) హెడ్ కోచ్ డానియల్ వెట్టోరి ఆసక్తికర వ్యాఖ్యలు చేశారు. ఇరు జట్లు దూకుడుగా ఆడే నైజం ఉన్నవేనని, ఈ మ్యాచ్‌లో ఓపెనింగ్ జోడీల ప్రదర్శనే గెలుపోటములను శాసిస్తుందని అభిప్రాయం వ్యక్తం చేశారు. మ్యాచ్‌కు ముందు జరిగిన ప్రెస్ కాన్ఫరెన్స్‌లో వెట్టోరి జట్టు వ్యూహాలను పంచుకున్నారు. పక్కా ప్లాన్‌తో దిగుతున్నాం రంగంలోకి దిగుతున్నట్లు స్పష్టం చేశారు.

పంజాబ్ కింగ్స్ ఓడిపోయిన గత మ్యాచ్‌లను విశ్లేషిస్తే, ఓపెనర్లు విఫలమైనప్పుడే ఆ జట్టు ఒత్తిడిలోకి వెళ్లినట్లు కనిపిస్తోందని వెట్టోరి పేర్కొన్నారు. “పంజాబ్ ఓపెనింగ్ జోడీ చాలా ప్రమాదకరమైనది. మా జట్టులో ట్రావిస్ హెడ్, అభిషేక్ శర్మ ఎలాగైతే మెరుపు ఆరంభాన్ని ఇస్తారో, పంజాబ్‌కు సైతం ఓపెనర్లు అలాగే కీలకం. అందుకే ఆ ఇద్దరు బ్యాటర్లను వీలైనంత త్వరగా కట్టడి చేయడంపైనే మేము దృష్టి సారిస్తున్నాం” అని వెల్లడించారు. పంజాబ్ జట్టు బ్యాటింగ్ శైలి దాదాపు తమ జట్టు లాగే ఉంటుందని, బ్యాటింగ్‌లో చాలా అగ్రెసివ్‌గా ఉంటూ బౌలింగ్‌లో లోపాలను కవర్ చేసుకునే ప్రయత్నం చేస్తారని వెట్టోరి విశ్లేషించారు.

ఈ మ్యాచ్ భారీ స్కోర్లకు వేదికయ్యే అవకాశం ఉందని, ఇలాంటి హై-ప్రెజర్ గేమ్‌లో ఏ జట్టు బౌలర్లు ఒత్తిడిని సమర్థవంతంగా ఎదుర్కొంటారో వారే విజేతలుగా నిలుస్తారని వెట్టోరి ఆశాభావం వ్యక్తం చేశారు. గత పది మ్యాచ్‌ల్లో ఎనిమిది సార్లు తమ బ్యాటింగ్ యూనిట్ అద్భుతంగా రాణించిందని, గతంలో జరిగిన పొరపాట్లను పక్కన పెట్టి మళ్లీ అదే జోరును కొనసాగిస్తామని ధీమా వ్యక్తం చేశారు. ఐపీఎల్ వంటి వేగవంతమైన టోర్నీల్లో ఓటమి గురించి ఎక్కువ ఆలోచించకుండా, తర్వాతి మ్యాచ్‌పై దృష్టి పెట్టడమే ముఖ్యమని హితవు పలికారు.

ఇక, ప్రస్తుతం పాయింట్ల పట్టికలో పంజాబ్ కింగ్స్ 9 మ్యాచ్‌ల్లో 6 విజయాలతో (13 పాయింట్లు) అగ్రస్థానంలో కొనసాగుతోంది. మరోవైపు సన్‌రైజర్స్ హైదరాబాద్ 10 మ్యాచ్‌ల్లో 6 విజయాలు, 4 ఓటములతో (12 పాయింట్లు) మూడో స్థానంలో ఉంది. ఈ మ్యాచ్‌లో గెలిస్తే సన్‌రైజర్స్ తన స్థానాన్ని మరింత పదిలం చేసుకోవడమే కాకుండా పట్టికలో అగ్రస్థానానికి చేరుకునే అవకాశం ఉంటుంది. ఈ నేపథ్యంలో ఇరు జట్ల మధ్య పోరు హోరాహోరీగా సాగడం ఖాయంగా కనిపిస్తోంది.