Virat Kohli: ఏ వన్డే మ్యాచ్ జరిగినా..? ఏ వన్డే సిరీస్ వస్తున్నా..? వెంటనే రోహిత్ శర్మ కెరీర్తో పాటు.. విరాట్ కోహ్లీ ఫ్యూచర్పై కూడా చర్చ జరుగుతుంది.. ఇప్పుడు భారత్-వెస్టిండీస్ సిరీస్ ముందు కూడా మరోసారి ఆ చర్చ తెరపైకి వచ్చింది.. అయితే, తన భవిష్యత్పై సంచలన ప్రకటన చేశారు టీమిండియా స్టార్ బ్యాటర్ కింగ్ కోహ్లీ.. 2027లో జరగనున్న వన్డే ప్రపంచకప్ తనకు భారత జట్టు తరఫున చివరి ప్రపంచకప్ అవుతుందని వెల్లడించాడు. ప్రస్తుతం వెస్టిండీస్తో జరగనున్న వన్డే సిరీస్కు ముందు కోహ్లీ చేసిన ఈ వ్యాఖ్యలు క్రికెట్ అభిమానుల్లో ఆసక్తికరంగా మారాయి.. ఇదే సమయంలో.. విరాట్ కోహ్లీ ఫ్యాన్స్ను నిరాశ పరిచే విధంగా ఉన్నాయి..
భారత్, వెస్టిండీస్ జట్లు మల్టీ ఫార్మాట్ వైట్బాల్ సిరీస్లో తలపడనున్నాయి. ఇందులో మూడు వన్డేలు, ఐదు టీ20 మ్యాచ్లు జరగనున్నాయి. తొలి వన్డే సెప్టెంబర్ 27న తిరువనంతపురంలో జరగనుంది. ఈ సిరీస్ ద్వారా సీనియర్ బ్యాటర్లు విరాట్ కోహ్లీ, రోహిత్ శర్మ మరోసారి వన్డేల్లో భారత్ తరఫున బరిలోకి దిగనున్నారు. 2027 వన్డే ప్రపంచకప్కు ఈ సిరీస్ కీలక సన్నాహకంగా మారనుంది. ఈ నేపథ్యంలో కోహ్లీ తన లక్ష్యాన్ని స్పష్టం చేశాడు. 50 ఓవర్ల ప్రపంచకప్లో ఉండే తీవ్రత మరే ఫార్మాట్లోనూ ఉండదని పేర్కొన్నాడు. ఒకే రోజులో దాదాపు రెండున్నర టీ20 మ్యాచ్లు ఆడినంత తీవ్రతతో, సుదీర్ఘ టోర్నీలో సుమారు పది మ్యాచ్లు ఆడాల్సి ఉంటుందని వివరించాడు.
విదేశీ పరిస్థితుల్లో జరిగే ప్రపంచకప్ ఆటగాళ్ల నుంచి మరింత ఎఫర్ట్ కోరుకుంటుందని కోహ్లీ చెప్పాడు. 2027 ప్రపంచకప్ తనకు భారత్ తరఫున చివరిదని, అందుకే తనకు అదే పెద్ద ప్రేరణగా నిలుస్తోందని పేర్కొన్నాడు. ప్రపంచకప్ గెలవడమే తన ప్రధాన లక్ష్యమని, అందుకోసం తనవంతుగా పూర్తిస్థాయిలో సిద్ధంగా ఉన్నానని వెల్లడించాడు.. ఇక భారత్, వెస్టిండీస్ మధ్య తొలి వన్డే సెప్టెంబర్ 27న జరగనుండగా.. రెండో వన్డే సెప్టెంబర్ 30న, మూడో వన్డే అక్టోబర్ 3న జరగనున్నాయి. ఈ సిరీస్లో భారత్ మంచి ఆరంభం కోసం ప్రయత్నించనుంది.
మరోవైపు వెస్టిండీస్కు కూడా ఈ సిరీస్ కీలకమే. 2027 ప్రారంభంలో వన్డే ప్రపంచకప్ క్వాలిఫయర్స్ ఆడాల్సి ఉండటంతో, ఆ జట్టు కూడా తమ ఆటతీరును మెరుగుపరుచుకోవాలని చూస్తోంది. దీంతో భారత్-వెస్టిండీస్ వన్డే సిరీస్ ఇరు జట్లకు ప్రపంచకప్ సన్నాహకంగా మారనుంది. ఏదేమైనా.. కింగ్ కోహ్లీ ఉన్నాడంటే.. టీమిండియాకు ఉన్న ధైర్యమే వేరు.. ఫ్యాన్స్లో ఉండే నమ్మకం కూడా అలాంటిదే.. ఒంటి చేత్తో ఎన్నో మ్యాచ్లు గెలిపించిన కింగ్ కోహ్లీ.. 2027 వరల్డ్ కప్ తర్వాత జట్టుకు దూరం అవుతారంటేనే.. ఫ్యాన్స్ జీర్ణించుకోలేని విషయం..