Vaibhav Sooryavanshi: వైభవ్ “New Chapter” పోస్ట్ వైరల్.. ఈ సంకేతం అదేనా..?

Vaibhav Sooryavanshi: టీమ్ ఇండియా తరఫున అరంగేట్రం కోసం ఎదురుచూస్తున్న 15 ఏళ్ల యువ బ్యాటర్ వైభవ్ సూర్యవంశీ మరోసారి వార్తల్లో నిలిచాడు. శనివారం మాంచెస్టర్‌లో ఇంగ్లాండ్‌తో జరిగే రెండో టీ20 మ్యాచ్‌కు ముందు అతడు తన ఇన్‌స్టాగ్రామ్ స్టోరీలో చేసిన “New Chapter” పోస్ట్ సోషల్ మీడియాలో విపరీతమైన చర్చకు దారితీసింది. ఈ పోస్ట్ టీమ్ ఇండియాలో అరంగేట్రానికి సంకేతమా? లేక కొత్త బ్యాట్ స్పాన్సర్‌షిప్ ఒప్పందానికి సూచనా? అనే సందేహాలు అభిమానుల్లో నెలకొన్నాయి.

శుక్రవారం రాత్రి వైభవ్ తన ఇన్‌స్టాగ్రామ్ స్టోరీలో బ్యాట్‌ను పైకెత్తి సంబరాలు చేసుకుంటున్న ఫొటోను షేర్ చేశాడు. ఆ చిత్రంపై “New Chapter” అనే రెండు పదాలు మాత్రమే ఉండటంతో దాని వెనుక అసలు ఉద్దేశం ఏమిటన్నది చర్చనీయాంశమైంది. అధికారికంగా ఎలాంటి వివరణ ఇవ్వకపోవడంతో అభిమానులు తమదైన రీతిలో అర్థాలు వెతుకుతున్నారు. మరోవైపు.. ఈ పోస్ట్‌కు ముందు టీమ్ ఇండియా బౌలింగ్ కోచ్ మోర్నే మోర్కెల్ చేసిన వ్యాఖ్యలు కూడా ఆసక్తిని మరింత పెంచాయి. మాంచెస్టర్‌లో మీడియాతో మాట్లాడిన ఆయన, సంజు సామ్సన్, అభిషేక్ శర్మ వంటి ఆటగాళ్ల స్థానాలను తొందరగా మార్చే ఆలోచన లేదని స్పష్టం చేశారు. టీ20 ప్రపంచకప్ గెలిచిన జట్టుపై విశ్వాసం కొనసాగుతుందని చెప్పడంతో రెండో టీ20లో వైభవ్‌కు అవకాశం దక్కకపోవచ్చనే అభిప్రాయాలు వ్యక్తమయ్యాయి.

అయితే అదే రోజు రాత్రి వైభవ్ చేసిన “New Chapter” పోస్ట్ కొత్త ఊహాగానాలకు తెరలేపింది. పలువురు అభిమానులు దీనిని అతని అంతర్జాతీయ అరంగేట్రానికి సంకేతంగా భావిస్తుండగా, మరికొందరు ఇది కొత్త స్పాన్సర్‌షిప్ ఒప్పందానికి సంబంధించిన ప్రకటన కావచ్చని అంటున్నారు. ఇటీవల వైభవ్ ‘హీరో’ స్టిక్కర్ ఉన్న బ్యాట్‌తో కనిపించడం కూడా ఈ చర్చకు మరింత ఊతమిచ్చింది. ఇంతకు ముందు అతడు ఎస్‌ఎస్ బ్రాండ్ బ్యాట్‌ను ఉపయోగించేవాడు. దీంతో “New Chapter” అనేది కొత్త బ్యాట్ స్పాన్సర్‌తో కుదిరిన ఒప్పందానికి సంబంధించిన సంకేతమనే అభిప్రాయాలు కూడా వినిపిస్తున్నాయి.

అయితే ఇప్పటివరకు వైభవ్ సూర్యవంశీ ఈ పోస్ట్‌కు సంబంధించి ఎలాంటి వివరణ ఇవ్వలేదు. అలాగే టీమ్ ఇండియా మేనేజ్‌మెంట్ కూడా దీనిపై స్పందించలేదు. దీంతో ఈ పోస్ట్ వెనుక అసలు ఉద్దేశం ఏమిటనేది ప్రస్తుతానికి సస్పెన్స్‌గానే మిగిలింది. ఇప్పుడు అందరి దృష్టి శనివారం మాంచెస్టర్‌లో జరిగే రెండో టీ20 మ్యాచ్‌పై ఉంది. ఆ మ్యాచ్‌లో వైభవ్‌కు అవకాశం లభిస్తే “New Chapter” అనే పదాలకు కొత్త అర్థం లభించే అవకాశం ఉంది. ఒకవేళ అవకాశం రాకపోతే, ఈ వైరల్ పోస్ట్ వెనుక మరో కథ ఉందని చెప్పవచ్చు.