Virat Kohli – Rohit Sharma: 2027 వరల్డ్‌కప్‌కు ముందు రోహిత్-విరాట్‌పై కైఫ్ కీలక వ్యాఖ్యలు

Virat Kohli – Rohit Sharma: టీమిండియా స్టార్‌ ప్లేయర్స్‌ రోహిత్‌ శర్మ, విరాట్‌ కోహ్లీ ఎప్పుడూ ప్రత్యేకమే.. అయితే, వీరి రిటైర్మెంట్‌పై ఎప్పటి నుంచి చర్చ జరుగుతుండగా.. వెస్టిండీస్‌తో ఇటీవల జరిగిన సిరీస్‌తో సూపర్‌ ఫామ్‌ చూపించారు.. మూడు వన్డేల సిరీస్‌లో భారత జట్టు 2-1తో సిరీస్‌ను కైవసం చేసుకుంది. తొలి రెండు మ్యాచ్‌ల్లో విజయం సాధించిన టీమిండియా.. మూడో వన్డేలో వెస్టిండీస్ చేతిలో ఓటమి పాలైంది. అయితే సిరీస్‌లో సీనియర్ బ్యాటర్లు రోహిత్ శర్మ, విరాట్ కోహ్లీ చూపించిన ప్రదర్శన ప్రత్యేకంగా నిలిచింది.

తొలి వన్డేలో విరాట్ కోహ్లీ అజేయంగా 139 పరుగులు చేయగా.. రెండో వన్డేలో రోహిత్ శర్మ 101 పరుగులతో సెంచరీ సాధించాడు. మూడో వన్డేలోనూ రోహిత్ 92 పరుగులతో రాణించాడు. దీంతో సీనియర్ ఆటగాళ్లపై ఇటీవల వచ్చిన విమర్శలకు వారి ప్రదర్శన సమాధానంగా నిలిచిందని మాజీ భారత క్రికెటర్ మహ్మద్ కైఫ్ అభిప్రాయపడ్డారు. తన యూట్యూబ్ ఛానల్‌లో మాట్లాడిన కైఫ్.. రోహిత్, విరాట్ తమపై పెట్టుకున్న అంచనాలు, విమర్శలను తప్పని నిరూపించారని పేర్కొన్నారు. 2027 వన్డే ప్రపంచకప్‌కు ముందు ఈ ఇద్దరు తమ సత్తాను మరోసారి చాటుకున్నారని అన్నారు. వారి ఎంపికపై ప్రశ్నలు లేవనెత్తిన వారికి తాజా ప్రదర్శనతో సమాధానం లభించిందని కైఫ్ వ్యాఖ్యానించారు.

ఇదే సందర్భంలో కైఫ్ మరో సీనియర్ ఆటగాడు మహ్మద్ షమీని కూడా ప్రస్తావించారు. షమీకి తగినంతగా అవకాశాలు ఇచ్చి, అతడిపై నమ్మకం ఉంచి ఉంటే అతను కూడా ఇదే విధంగా రాణించేవాడని అభిప్రాయపడ్డారు. ప్రస్తుతం షమీ లాంటి నైపుణ్యం ఉన్న బౌలర్లు జట్టులో తక్కువగా ఉన్న సమయంలో అతడికి ఎందుకు అవకాశం ఇవ్వడం లేదని ప్రశ్నించారు. రోహిత్, విరాట్ విషయంలో జట్టు మేనేజ్‌మెంట్ అనుసరించిన ఆలోచన సరైనదైతే వారు ఇప్పటికీ జట్టులో కొనసాగేవారని కైఫ్ అన్నారు. అదే పరిస్థితి షమీకి కూడా వర్తిస్తుందని పేర్కొన్నారు. ప్రస్తుత ఫామ్‌ను పరిశీలిస్తే షమీని జట్టులోకి తీసుకోవాల్సిన అవసరం ఉందని సూచించారు.

వన్డే ప్రపంచకప్‌లలో షమీ గతంలో అద్భుత ప్రదర్శన చేసిన విషయాన్ని కూడా కైఫ్ ప్రస్తావించారు. 2027 వన్డే ప్రపంచకప్‌ను దృష్టిలో పెట్టుకుని సీనియర్ ఆటగాళ్ల అనుభవం, ఫామ్‌ను జట్టు మేనేజ్‌మెంట్ పరిగణనలోకి తీసుకోవాల్సిన అవసరం ఉందనే అభిప్రాయం వ్యక్తమవుతోంది. వెస్టిండీస్ సిరీస్‌లో రోహిత్, విరాట్ ప్రదర్శనతో పాటు షమీపై కైఫ్ చేసిన వ్యాఖ్యలు ప్రస్తుతం చర్చనీయాంశంగా మారాయి. మొత్తంగా.. తమ ఫామ్‌పై విమర్శలు వచ్చినప్పుడల్లా.. ఇలా బ్యాట్‌తో సమాధానం చెప్పడం రోహిత్‌కు, కింగ్‌ కోహ్లీకి కొత్తమేకాదు..