IND vs SL 2nd Test: 33 ఏళ్ల సారాంశ్ జైన్ అరంగేట్రం.. కుల్‌దీప్‌ యాదవ్‌ ఆడకపోవడానికి కారణం ఫామ్ కాదు!

IND Playing XI vs SL 2nd Test: కొలంబోలోని సిన్హలీస్ స్పోర్ట్స్ క్లబ్ వేదికగా భారత్, శ్రీలంక మధ్య రెండో టెస్ట్ మ్యాచ్ ఆరంభమయింది. ఈ టెస్టులో టాస్ గెలిచిన టీమిండియా కెప్టెన్ శుభ్‌మన్ గిల్ బ్యాటింగ్ ఎంచుకున్నాడు. తొలి టెస్టులో 165 పరుగుల తేడాతో ఘన విజయం సాధించిన భారత్.. రెండో టెస్టులోనూ గెలిచి సిరీస్‌ను క్లీన్‌స్వీప్ చేయాలనే పట్టుదలతో బరిలోకి దిగింది. అయితే భారత్ ప్లేయింగ్ 11పై ముందునుంచి వస్తున్న వార్తలే నిజమయ్యాయి. సీనియర్ ప్లేయర్ కుల్‌దీప్‌ యాదవ్‌ స్థానంలో 33 ఏళ్ల సారాంశ్ జైన్ అరంగేట్రం చేశాడు.

టాస్ అనంతరం భారత కెప్టెన్ శుభ్‌మన్ గిల్ మాట్లాడుతూ.. ‘గాలెతో పోలిస్తే కొలంబో పిచ్ బ్యాటింగ్‌కు మరింత అనుకూలంగా కనిపిస్తోంది. గాలె పిచ్ కూడా చాలా బాగుండేది. కానీ ఆట సాగుతున్న కొద్దీ కొంచెం నెమ్మదించి, బంతి తిరగడం మొదలైంది. ఈ పిచ్ కూడా అలాగే ఉంటుందని ఆశిస్తున్నాం. మొదటి రెండు, మూడు రోజులు బ్యాటింగ్‌కు అనుకూలంగా ఉంటుందని అనుకుంటున్నా. మ్యాచ్ సాగేకొద్దీ పిచ్ కొంత నెమ్మదించి, స్పిన్నర్లకు టర్న్‌ లభించే అవకాశం ఉంది’ అని చెప్పాడు.

రెండో టెస్టులో టీమిండియా ఒక కీలక మార్పుతో బరిలోకి దిగింది. సీనియర్ స్పిన్నర్ కుల్దీప్ యాదవ్‌ ఈ మ్యాచ్‌కు దూరమయ్యాడు. కుల్దీప్‌కు ఇన్ఫెక్షన్‌ రావడంతో అతడిని తుది జట్టులోకి తీసుకోలేదని కెప్టెన్ శుభ్‌మన్ గిల్‌ వెల్లడించాడు. కుల్దీప్ స్థానంలో 33 ఏళ్ల సారంశ్ జైన్ టెస్టు క్రికెట్‌లో భారత తరఫున అరంగేట్రం చేశాడు. దేశవాళీ క్రికెట్‌లో మంచి ప్రదర్శనతో గుర్తింపు పొందిన సారంశ్‌కు ఇప్పుడు అంతర్జాతీయ స్థాయిలో తన సత్తా నిరూపించుకునే అవకాశం లభించింది. అతడి అరంగేట్రంతో భారత జట్టు బౌలింగ్ మరింత బలపడింది. శ్రీలంక రెండు మార్పులు చేసింది. కమిల్ మిశ్రా అరంగేట్రం చేశాడు. లనే దినేష్ చండిమాల్‌ ప్లేస్‌లో పసిందు సూరియబండారా వచ్చాడు.

తుది జట్లు:
భారత్: యశస్వి జైస్వాల్, కేఎల్ రాహుల్, దేవదత్ పడిక్కల్, శుభ్‌మన్ గిల్ (కెప్టెన్), రిషభ్ పంత్ (వికెట్ కీపర్), రవీంద్ర జడేజా, ధ్రువ్ జురెల్, సారాంశ్‌ జైన్, మానవ్ సుతార్, మహ్మద్ సిరాజ్, ప్రసిద్ధ్‌ కృష్ణ.
శ్రీలంక: లాహిరు ఉదారా, కమిల్ మిషారా, పసిందు సూరియబండారా, కమిందు మెండిస్, ధనంజయ డిసిల్వా (కెప్టెన్), సోనాల్ దినుష, నిరోషన్ డిక్వెల్లా (వికెట్ కీపర్), కేశర నువాంత, ప్రభాత్ జయసూర్య, లాహిరు కుమార, అసిత ఫెర్నాండో.