ODI World Cup 2027 Schedule: వన్డే వరల్డ్‌కప్ షెడ్యూల్ వచ్చేసింది.. భారత్‌ x పాకిస్థాన్‌ సమరం ఎప్పుడంటే!

ODI World Cup 2027 Schedule: క్రికెట్ అభిమానులు ఎప్పుడెప్పుడా అని కళ్లు కాయలు కాచేలా ఎదురుచూస్తున్న ఐసీసీ పురుషుల వన్డే ప్రపంచకప్ సమరానికి నగారా మోగింది. వచ్చే ఏడాది దక్షిణాఫ్రికా వేదికగా జరగనున్న మెగా టోర్నమెంట్ పూర్తి షెడ్యూల్‌ను అంతర్జాతీయ క్రికెట్ మండలి (ఐసీసీ) అధికారికంగా విడుదల చేసింది. అక్టోబర్ 7వ తేదీన కేప్‌టౌన్ మైదానంలో జరిగే హై-వోల్టేజ్ బ్లాక్‌బస్టర్ మ్యాచ్‌తో టోర్నీ స్టార్ట్ కానుంది. ఆరంభ మ్యాచ్‌లోనే భారత్, ఆస్ట్రేలియా జట్లు అమీతుమీ తేల్చుకోనుండటం టోర్నీపై అంచనాలను అమాంతం పెంచేసింది.

అక్టోబర్ 10న దాయాదుల పోరు.. షెడ్యూల్ పక్కా!
ప్రపంచవ్యాప్తంగా కోట్లాది మంది ఆసక్తిగా చూసే భారత్ – పాకిస్థాన్ మ్యాచ్‌కు ముహూర్తం ఖరారైంది. టోర్నీ ప్రారంభమైన మూడు రోజులకే, అంటే అక్టోబర్ 10న చిరకాల ప్రత్యర్థుల సమరం జరగనుంది. రౌండ్ రాబిన్ ఫార్మాట్‌లో సాగే గ్రూప్ దశలో భారత్ మొత్తం ఐదు లీగ్ మ్యాచ్‌లు ఆడనుంది:

* అక్టోబర్ 7: భారత్ vs ఆస్ట్రేలియా (కేప్‌టౌన్)

* అక్టోబర్ 10: భారత్ vs పాకిస్థాన్

* అక్టోబర్ 14: భారత్ vs అఫ్గానిస్థాన్

* అక్టోబర్ 17: భారత్ vs క్వాలిఫయర్-ఎ

* అక్టోబర్ 24: భారత్ vs జింబాబ్వే

రౌండ్ రాబిన్ నుంచి సూపర్-7 దాకా.. ఫైనల్ ఎప్పుడంటే?
టోర్నమెంట్ ఆరంభం నుంచి అక్టోబర్ 24 వరకు రౌండ్ రాబిన్ పద్ధతిలో మొత్తం 30 గ్రూప్ స్టేజ్ మ్యాచ్‌లు జరుగుతాయి. ఆ తర్వాత అసలైన వేట మొదలవుతుంది. అక్టోబర్ 25 నుంచి నవంబర్ 14 వరకు ‘సూపర్-7’ దశలో మొత్తం 21 మ్యాచ్‌లు నిర్వహిస్తారు. టోర్నీ ముగింపు దశకు వస్తే.. నవంబర్ 17న మొదటి సెమీఫైనల్, నవంబర్ 18న రెండో సెమీఫైనల్ జరగనున్నాయి. ఇక విశ్వవిజేత ఎవరో తేల్చే మహా పోరు నవంబర్ 21న జొహన్నెస్‌బర్గ్ వేదికగా జరగనుంది. తొలి మ్యాచ్‌లోనే బలమైన కంగారూలతో తలపడుతూ, ఆ వెంటనే దాయాది పాక్‌ను ఢీకొట్టేలా టీమిండియా షెడ్యూల్ ఖరారవ్వడంతో క్రీడాభిమానుల్లో ఉత్కంఠ తారస్థాయికి చేరింది.