World Cup: కేవలం 30 సెకన్ల మీటింగ్.. వరల్డ్ కప్ కొట్టిన భారత్.. సంచలన రహస్యం చెప్పిన కెప్టెన్..

2025 మహిళల వన్డే ప్రపంచకప్‌లో భారత జట్టు చారిత్రాత్మక విజయం సాధించడం వెనుక ఉన్న ఒక ఆసక్తికరమైన రహస్యాన్ని కెప్టెన్ హర్మన్‌ప్రీత్ కౌర్ తాజాగా బయటపెట్టింది. నవీ ముంబైలో బంగ్లాదేశ్‌తో జరిగిన వర్షం ప్రభావిత మ్యాచ్‌లో స్టార్ ప్లేయర్ ప్రతీకా రావల్ మడమ గాయంతో నాకౌట్ దశకు పూర్తిగా దూరమైంది. ఆ క్లిష్ట సమయంలో జట్టులోకి షఫాలీ వర్మను వైల్డ్ కార్డ్ ఎంట్రీగా తీసుకురావాలనే పెద్ద నిర్ణయాన్ని కేవలం ’30 సెకన్ల మీటింగ్’ లోనే తీసుకున్నట్లు హర్మన్ వెల్లడించింది. ప్రతీక స్థానంలో ఎవరు రావాలనే చర్చ రాగానే, జట్టు సభ్యులతో పాటు బీసీసీఐ కూడా ఏకగ్రీవంగా “షఫాలీ, షఫాలీ, షఫాలీ” అని నినదించారని ఆమె పేర్కొంది.

నిజానికి షఫాలీ వర్మ అప్పట్లో స్టాండ్‌బై ఆటగాళ్ల జాబితాలో కూడా లేదు. ఫామ్ లేమితో ప్రధాన జట్టులో చోటు కోల్పోయిన షఫాలీ, ఆ సమయంలో తీవ్ర నిరాశలో ఉంది. కానీ దేశవాళీ క్రికెట్‌లో పరుగుల వరద పారించి మళ్లీ సత్తా చాటింది. అనుకోకుండా వరల్డ్ కప్ సెమీఫైనల్, ఫైనల్ మ్యాచ్‌ల కోసం పిలుపు రావడంతో ఆమె మానసికంగా సిద్ధం కావాల్సి వచ్చింది. వైస్ కెప్టెన్ స్మృతి మంధాన సైతం షఫాలీకి వెన్నుదన్నుగా నిలిచి, ఒత్తిడి లేకుండా దేశవాళీ మ్యాచ్‌లాగే ఆడమని భరోసా ఇచ్చింది.

హెడ్ కోచ్ అమోల్ ముజుందార్ ప్రతీక గాయపడినప్పుడు తన గుండె ఆగినంత పనైందని, కానీ షఫాలీ జట్టులోకి రావడం టర్నింగ్ పాయింట్ అని చెప్పారు. అందరి నమ్మకాన్ని నిజం చేస్తూ, సౌతాఫ్రికాతో జరిగిన హై-టెన్షన్ ఫైనల్ మ్యాచ్‌లో షఫాలీ వర్మ కేవలం బ్యాట్‌తోనే కాకుండా బంతితోనూ అద్భుతాలు చేసింది. ఫైనల్లో 87 పరుగుల వీరోచిత ఇన్నింగ్స్ ఆడటంతో పాటు రెండు కీలక వికెట్లు పడగొట్టి, సొంతగడ్డపై భారత్ మొట్టమొదటి వన్డే ప్రపంచకప్ ట్రోఫీని ముద్దాడటంలో ప్రధాన పాత్ర పోషించింది. ఆనాడు అత్యంత వేగంగా తీసుకున్న ఆ ఒక్క 30 సెకన్ల నిర్ణయమే భారత క్రికెట్ చరిత్రను తిరగరాసింది.