Australian Cricketer: 15 ఏళ్ల బాలికపై అత్యాచారం.. ఆస్ట్రేలియా క్రికెటర్‌కు జీవితకాల జైలు శిక్ష!

Aaron Summers Australian Cricketer Faces Jail: 15 ఏళ్ల బాలికపై అత్యాచారం, అసభ్యకరమైన విషయాలకు ప్రేరేపించిన కేసులో ఆస్ట్రేలియా మాజీ క్రికెటర్ ఆరోన్ సమ్మర్స్ దోషిగా తేలాడు. ఈ కేసులో అతడికి ఆగస్టులో కోర్టు శిక్షను ఖరారు చేయనుంది. ఈ విషయాన్ని ఆస్ట్రేలియా మీడియా ‘ది కాన్‌బెర్రా టైమ్స్’ వెల్లడించింది. ఈ రెండు కేసులలో తాను దోషి అని స్వయంగా సమ్మర్స్ అంగీకరించడం ఇప్పుడు సంచలనంగా మారింది. ఒకప్పుడు ప్రపంచంలోనే ఫాస్టెస్ట్ పేసర్లలో ఒకరిగా గుర్తింపు పొందిన సమ్మర్స్.. ఇప్పుడు అత్యాచార కేసుల్లో చిక్కుకుని జైలు శిక్షను ఎదుర్కొనే పరిస్థితికి చేరుకున్నాడు.

ది కాన్‌బెర్రా టైమ్స్ కథనం ప్రకారం.. 2018 జనవరిలో బిగ్ బాష్ లీగ్ (బీబీఎల్)లో హోబార్ట్ హరికేన్స్ జట్టుకు ఆరోన్ సమ్మర్స్ ప్రాతినిధ్యం వహించాడు. ఆ సమయంలో సోషల్ మీడియా ద్వారా 15 ఏళ్ల బాలికతో అతడు పరిచయం పెంచుకున్నాడు. అనంతరం స్థానిక పాఠశాల ప్రాంగణంలో ఆమెపై లైంగిక దాడికి పాల్పడ్డాడు. బాలికపై లైంగిక దాడి, అసభ్యకరమైన విషయాలకు ప్రేరేపించే ఉద్దేశంతో గ్రూమింగ్ చేసిన రెండు ప్రధాన ఆరోపణలను కోర్టులో సమ్మర్స్ అంగీకరించాడు.

ఆరోన్ సమ్మర్స్ తరఫు న్యాయవాది కరోలైన్ గ్రేవ్స్ కోర్టులో మాట్లాడుతూ.. ఆ సమయంలో అతడు తీవ్ర మానసిక ఒత్తిడి, ఒంటరితనం ఎదుర్కొంటున్నాడని పేర్కొన్నాడు. సోషల్ మీడియాను అధికంగా ఉపయోగించడం వల్ల తప్పు దారిలో నడిచాడని తెలిపాడు. ‘ఈ సంఘటన ఆరోన్ సమ్మర్స్‌ను జీవితాంతం వెంటాడుతుంది. అయినప్పటికీ అతడు తన జీవితాన్ని ముందుకు తీసుకెళ్లాల్సిన అవసరం ఉంది. ఇకపై ఇలాంటి నేరాలకు పాల్పడడు. 2018లో సమ్మర్స్ ప్రపంచంలోనే ఫాస్టెస్ట్ పేసర్. అప్పుడు అంతర్జాతీయ క్రికెట్‌లో ఆడే అవకాశాలు కూడా ఉన్నాయి’ అని కోర్టుకు వివరించారు.

ఆరోన్ సమ్మర్స్‌కు ఇలాంటి కేసులు కొత్తవి కావు. 2021లో కూడా పిల్లలకు సంబంధించిన అశ్లీల చిత్రాలు కలిగి ఉండటం, వాటిని ఇతరులకు పంపించడం వంటి కేసుల్లో దోషిగా నిలిచాడు. ఆ కేసులో ఇప్పటికే కొంతకాలం జైలు శిక్ష కూడా అనుభవించాడు. ఈసారి శిక్షను తగ్గించాలని సమ్మర్స్ తరఫు న్యాయవాది కోర్టును కోరినా.. న్యాయమూర్తి ఆ అభ్యర్థనను తిరస్కరించారు. బెయిల్‌పై బయట ఉన్న సమ్మర్స్‌ను కోర్టు మళ్లీ జ్యుడీషియల్ కస్టడీలోకి పంపింది. ప్రస్తుతం అతడు జైలులోనే ఉండగా.. ఈ కేసులో తుది శిక్షను ఆగస్టులో ప్రకటించనున్నారు. నేరాల తీవ్రత దృష్ట్యా అతడికి దీర్ఘకాల జైలు శిక్ష పడే అవకాశాలు ఉన్నాయి.

30 ఏళ్ల ఆరోన్ సమ్మర్స్ ఆస్ట్రేలియా దేశవాళీ క్రికెట్‌లో టాస్మానియా తరఫున ఆడాడు. బిగ్ బాష్ లీగ్‌లో హోబార్ట్ హరికేన్స్‌కు ఒక మ్యాచ్, పాకిస్థాన్ సూపర్ లీగ్లో కరాచీ కింగ్స్ తరఫున రెండు మ్యాచ్‌లు మాత్రమే ఆడాడు. అంతర్జాతీయ స్థాయికి ఎదుగుతాడని భావించిన అతడి కెరీర్.. వరుస లైంగిక నేరాలతో క్లోజ్ అయింది. ప్రస్తుతం క్రికెట్ కంటే.. కోర్టు కేసులు, జైలు శిక్షల కారణంగానే అతడు వార్తల్లో నిలుస్తున్నాడు.