Off The Record: తెలంగాణ బీజేపీ అంతర్గతంగా భగభగ మండుతోందా?

Off The Record: బీజేపీ అంటే…. కేరాఫ్‌ డిసిప్లిన్‌ అంటారు. నాయకుల మాటలు, చేతలు కూడా అలాగే కనిపిస్తుంటాయి. కానీ…. తెలంగాణలో మాత్రం వాతావరణం కాస్త తేడాగా మారుతోందట. మీరు చెప్పేవన్నీ బయట ఎక్కడైనా కావచ్చేమోగానీ…. ఇక్కడ మాత్రం అలా కాదు, వెదర్‌ అలాలేదని పార్టీ వర్గాలే మాట్లాడుకుంటున్నాయి. దాన్ని క్రమశిక్షణారాహిత్యం అని కూడా చెప్పడానికి వీల్లేదు….., ఓవర్‌ చేస్తే రియాక్షన్స్‌ అలాగే ఉంటాయన్న మాటలు పార్టీ నాయకుల నుంచే వినిపిస్తున్నాయి. అంతర్గతంగా ఇప్పుడు తెలంగాణ బీజేపీలో ఇదే రచ్చ జరుగుతున్నట్టు చెప్పుకుంటున్నారు. పార్టీ మీటింగ్‌లో తమను తిట్టినందుకు సంస్థాగత ప్రధాన కార్యదర్శి మీద జిల్లాల అధ్యక్షులు గరంగా ఉన్నారట. మేమేమన్నా చిన్న పిల్లలమా? ఏం చేయాలో మాకు తెలియదా? లేక మేం ఆయనకు బానిసలమని భావిస్తున్నారా అంటూ వివిధ జిల్లాల అధ్యక్షులు సన్నిహితుల దగ్గర తీవ్ర ఆవేదన వ్యక్తం చేస్తున్నట్టు తెలుస్తోంది. అలాగే కొద్ది మంది ఎంపీలు, ఎమ్మెల్యేలు కూడా చంద్రశేఖర్ తివారీ వైఖరితో విసుగెత్తిపోయి ఉన్నారని, ఏదో ఒక రోజు అంతా బద్దలవుతుందన్న అభిప్రాయం బలంగా ఉంది పార్టీలో. ఈ పరిస్థితుల్లో తెలంగాణ కమలంలో అంతా పైకి కనిపిస్తున్నంత పచ్చగా ఏమీ లేదని, లోలోపల లొల్లి బాగానే నడుస్తోందని అంటున్నారు.

ప్రస్తుతానికి సర్దుబాటు చేసేందుకు పార్టీ రాష్ట్ర అధ్యక్షుడు ఎంతగా ప్రయత్నిస్తున్నా… కట్టలు తెగే ప్రమాదం ఉందని అనుమానిస్తున్నారు. పార్టీ సంస్థాగత ప్రధాన కార్యదర్శి తివారీ మీద రోజు రోజుకి నేతల్లో అసంతృప్తి పెరిగిపోతోందట. అంతా తన కను సైగలతోనే నడవాలని అనుకోవడం రాష్ట్ర నాయకులకు అస్సలు నచ్చడం లేదట. ఇటీవల జిల్లా అధ్యక్షులు, ఇన్చార్జ్‌ల సమావేశం జరిగింది. అందులో సంస్థాగత ప్రధాన కార్యదర్శి జిల్లా అధ్యక్షులపై ఒక రేంజ్‌లో ఫైర్ అయ్యారని, అందర్నీ పట్టుకుని పొట్టు పొట్టు తిట్టేశారని చెప్పుకున్నారు. దాదాపు ఉతికి ఆరేసినంత పని చేయడంతో… ఆ మీటింగ్‌లో కామ్‌గా ఉన్న నాయకులు బయటికి వచ్చాక బాగా ఫీలయ్యారట. ఆయనేంది…? అలా మాట్లాడడం ఏందంట ఆవేదన వ్యక్తం చేసినట్టు తెలిసింది. మనం జిల్లా అధ్యక్షులమా? లేక ఆయనకు బానిసలమా అంటీ వాళ్లలో వాళ్ళు మాట్లాడుకున్నట్టు తెలిసింది. పార్టీ కోసం ఫుల్ టైం ఇచ్చి పని చేస్తున్నాం… లెక్కకు మించి కార్యక్రమాలు ఇచ్చినా నిర్వహిస్తున్నాం. పైగా మాటలు పడుతున్నాం ఇదేం పద్ధతి అంటు కోపంగా ఉన్నట్టు తెలుస్తోంది. ఆయన తిరగరు, నేతలతో మాట్లాడారు, పైగా… మా పై చిర్రుబుర్రులాడతారా…? అసలు పార్టీని నడిపే పద్ధతి ఇదేనా అంటూ ఆవేదన వ్యక్తం చేస్తున్నట్టు తెలిసింది.

మరోవైపు కొందరు ఎంపీ, ఎమ్మెల్యేలు కూడా సంస్థాగత ప్రధాన కార్యదర్శి వ్యవహార శైలి పట్ల కోపంగా ఉన్నట్టు చెప్పుకుంటున్నారు. కలిసేందుకు వచ్చినా టైమ్ ఇవ్వరు, ఏదైనా చెప్పినా పట్టించుకోరు, పైగా రివర్స్‌ ఆ తిట్లేంటి అంటున్నారట. రాష్ర్ట కార్యవర్గ సభ్యులు, అధికార ప్రతినిధుల నియామకంలో కూడా ఆయన హవానే నడిచిందని అంటున్నారు. కొందరు ఎంపీ, ఎమ్మెల్యేలు ఇచ్చిన పేర్లను పక్కన పెట్టారట. ఇలా… రకరకాల కారణాలతో చంద్రశేఖర్‌ తివారి వైఖరి మీద తెలంగాణ బీజేపీ నాయకుల్లో అసంతృప్తి, ఆగ్రహం పెల్లుబుకుతున్నట్టు తెలుస్తోంది. ఆయన తీరు ఇలానే ఉంటే మాత్రం బ్లాస్ట్ అవక తప్పదన్నది వాళ్ళ అభిప్రాయం. ఈ అంతర్గత పరిణామాలు ఎటువైపు దారి తీస్తాయో చూడాలి.