Yash Thakur Duck out: భారత్, న్యూజిలాండ్ మధ్య జరుగుతున్న ఐదు మ్యాచ్‌ల వన్డే సిరీస్‌లో చివరి మ్యాచ్‌లో టీమిండియా ఫాస్ట్ బౌలర్ యశ్ ఠాకూర్ అరంగేట్రం చేశాడు. అయితే తన తొలి వన్డే మ్యాచ్‌లోనే అతడికి చేదు అనుభవం ఎదురైంది. బ్యాటింగ్‌లో ఒక్క పరుగు కూడా చేయకుండానే డకౌట్‌గా వెనుదిరిగాడు. దీంతో టీమిండియా తరఫున వన్డే అరంగేట్రంలో డకౌట్ అయిన ఆటగాళ్ల జాబితాలో యశ్ ఠాకూర్ స్థానం సంపాదించాడు.
భారత్ తరఫున వన్డే అరంగేట్రంలో డకౌట్ అయిన ఆటగాళ్ల జాబితాలో బిషన్ సింగ్ బేడీ మొదటి సారి 1974లో తన తొలి వన్డే మ్యాచ్‌లోనే ఆయన ఖాతా తెరవలేకపోయారు. ఆ తర్వాత సచిన్ టెండూల్కర్ (1989), వీవీఎస్ లక్ష్మణ్ (1998), ఎంఎస్ ధోనీ (2004), సురేశ్ రైనా (2005) వంటి ప్రముఖ ఆటగాళ్లు కూడా ఈ జాబితాలో ఉన్నారు. ఇక ఈ జాబితాలో చివరిగా 2010లో శిఖర్ ధావన్ చేరాడు. ఇప్పుడు 16 ఏళ్ల తర్వాత యశ్ ఠాకూర్ ఈ అనవసరమైన రికార్డును మూటగట్టుకున్నాడు.
ఇక ఈ మ్యాచ్‌లో టాస్ ఓడి తొలుత బ్యాటింగ్ చేసిన భారత జట్టు బ్యాటింగ్‌లో పూర్తిగా తడబడింది. న్యూజిలాండ్ బౌలర్ల ధాటికి కేవలం 209 పరుగులకే ఆలౌట్ అయింది. వికెట్ కీపర్ బ్యాటర్ ఇషాన్ కిషన్, అక్షర్ పటేల్ చెరో 46 పరుగులు చేసి అర్ధ సెంచరీలకు చేరువలో వెనుదిరిగారు. మరోవైపు స్టార్ బ్యాటర్లు రోహిత్ శర్మ, విరాట్ కోహ్లీ మరోసారి నిరాశపరిచారు. రోహిత్ 7 పరుగులు చేయగా, కోహ్లీ కేవలం 5 పరుగులకే పెవిలియన్ చేరాడు. దీంతో భారత జట్టు తక్కువ స్కోరుకే పరిమితమయ్యే పరిస్థితి ఏర్పడింది. అయితే చివర్లో పదో వికెట్‌కు మహమ్మద్ సిరాజ్, అర్ష్‌దీప్ సింగ్ కీలక భాగస్వామ్యం నెలకొల్పారు. ఇద్దరూ చెరో 14 పరుగులు చేయడంతో పాటు చివరి వికెట్‌కు 26 పరుగులు జోడించారు. దీంతో టీమిండియా స్కోరు 200+ పరుగులు దాటింది. ఈ మ్యాచ్‌లో విజయం సాధించాలంటే న్యూజిలాండ్ 210 పరుగులు చేయాలి.