Yamaha R15 లవర్స్‌కు బ్యాడ్ న్యూస్.. నిలిపివేయాలని కంపెనీ ప్లాన్..

Yamaha R15M May Be Discontinued: యమహా బైక్స్ అంటే స్పోర్ట్స్ ప్రేమికులకు గుర్తొచ్చే పేరు ‘R15’. మనదేశంలో ఈ సిరీస్‌కి ఉన్న ఫ్యాన్ బేస్ వేరు. అయితే, త్వరలోనే R15 లవర్స్‌కు ఒక బ్యాడ్ న్యూస్ వినిపిస్తోంది. మార్కెట్లోకి కొత్తగా యమహా R2 అడుగుపెట్టిన తర్వాత, కంపెనీ తన బైక్స్ మోడల్స్ లైనప్‌లో కొన్ని మార్పులు చేసే దిశగా అడుగులు వేస్తోందట. ఇందులో భాగంగానే యమహా R15M బైక్‌ను పూర్తిగా నిలిపివేసే (డైరెక్ట్‌గా ఆపేసే) ఆలోచనలో ఉన్నట్లు తెలుస్తోంది. R15M మోడల్ నిజానికి ప్రస్తుతం ఆర్15 V4, అలాగే కొత్తగా వచ్చిన R2 మోడళ్ల మధ్యలో ఉంటుంది. ఒకవేళ R15M బైక్‌ను పక్కన పెడితే, ఆర్15 V4 మోడల్ కి, కొత్త R2 కి మధ్య ఒక పెద్ద గ్యాప్ క్రియేట్ అవుతుంది. అయితే ఈ విషయంపై యమహా నుంచి ఇప్పటివరకైతే ఎలాంటి అధికారిక సమాచారం రాలేదు.

అసలు ఈ నిర్ణయానికి కారణం ఏంటంటే…?
R15M మోడల్ కూడా సాధారణ 155 సీసీ ఇంజిన్‌తోనే వస్తుంది. కాకపోతే ఆర్15 V4 తో పోలిస్తే ఇందులో కొన్ని ఎక్కువ ఫీచర్లు, ప్రీమియం ఫినిషింగ్ ఇచ్చారు. ఒకవేళ కంపెనీ ఈ బైక్‌ను డిస్కంటిన్యూ చేస్తే, ఆర్ సిరీస్ కస్టమర్లకు చాలా సింపుల్‌గా, క్లియర్‌గా అర్థమవుతుంది. తక్కువ బడ్జెట్‌లో స్పోర్టి ఫీల్ కావాలనుకునే వారికి ఆర్15 V4 ఒక మంచి ఆప్షన్‌గా ఉంటుంది. అదే కొంచెం ఎక్కువ పెర్ఫార్మెన్స్, ప్రీమియం ఫీచర్లు కోరుకునే వారు నేరుగా నెక్స్ట్ లెవెల్ బైక్ అయిన R2కి షిఫ్ట్ అయిపోవచ్చు.

ధరల వ్యత్యాసం ఎలా ఉందంటే…
ప్రస్తుతం మార్కెట్‌లో ఉన్న యమహా బైక్స్ ధరలు చూస్తే:

R15S: రూ.1.59 లక్షలు
R15 V4: రూ.1.75 లక్షల నుంచి రూ.1.79 లక్షలు
R15M: రూ.1.90 లక్షల నుంచి రూ.2.00 లక్షలు
R2 (ఇటీవలే లాంచ్ అయింది): రూ.2.30 లక్షల నుంచి రూ.2.40 లక్షలు
R2M: రూ.2.53 లక్షలు

ఒకవేళ కంపెనీ ఆర్15M బైక్‌ను సేల్స్ నుంచి తీసేస్తే, R15 సిరీస్‌కి, R2 సిరీస్‌కి మధ్య ధరల తేడా ప్రసుతం ఉన్న రూ.30 వేల నుంచి ఒక్కసారిగా రూ.51 వేలకు పెరుగుతుంది. ఇకపోతే, ఇటీవల ఆగస్టు నెలలో ఆర్15 సిరీస్ బైక్స్ మొత్తం కలిపి 7,691 యూనిట్లు మాత్రమే అమ్ముడయ్యాయి. ఈ ఆర్థిక సంవత్సరంలో ఆర్15 సిరీస్‌కి ఇదే అతితక్కువ సేల్స్ కావడం గమనార్హం. అందుకే కంపెనీ తన లైనప్‌ను రీ-పొజిషన్ చేయాలని చూస్తున్నట్లు సమాచారం.