అమెరికాలో ట్రక్ డ్రైవర్ల నియమ నిబంధనల విషయంలో డొనాల్డ్ ట్రంప్ ప్రభుత్వం అత్యంత కఠినమైన నిర్ణయాలు తీసుకుంటోంది. తాజాగా అమెరికా రవాణా శాఖ కార్యదర్శి సీన్ డఫీ (Sean Duffy) వెల్లడించిన వివరాల ప్రకారం.. ఇంగ్లీష్ భాషా నైపుణ్య పరీక్షలో విఫలమైన వేలాది మంది విదేశీ ట్రక్ డ్రైవర్లను రోడ్లపై నుంచి తొలగించారు.
17,000 లైసెన్సుల రద్దు..
గతంలో ఒబామా హయాంలో ఉన్న కొన్ని సడలింపులను రద్దు చేస్తూ.. ట్రంప్ ప్రభుత్వం కొత్త మార్గదర్శకాలను జారీ చేసింది. దీని ప్రకారం.. కాలిఫోర్నియా వంటి రాష్ట్రాల్లో నిబంధనలకు విరుద్ధంగా జారీ చేసిన సుమారు 17,000 కమర్షియల్ డ్రైవింగ్ లైసెన్సులను (CDL) అధికారులు రద్దు చేశారు. రోడ్డుపై ఉన్న ట్రాఫిక్ సంకేతాలను చదవలేకపోయినా, అధికారులతో ఇంగ్లీష్లో సంభాషించలేకపోయినా అటువంటి డ్రైవర్లను ‘అన్క్వాలిఫైడ్’గా పరిగణించి వెంటనే విధుల నుంచి తొలగిస్తున్నారు. కేవలం గత కొన్ని నెలల్లోనే దాదాపు 9,500 నుండి 12,000 మంది డ్రైవర్లను నేరుగా రోడ్డు తనిఖీల సమయంలోనే పక్కన పెట్టినట్లు గణాంకాలు చెబుతున్నాయి.
ఈ చర్యలపై సీన్ డఫీ స్పందిస్తూ.. ఇది కేవలం రాజకీయ నిర్ణయం కాదని, అమెరికన్ల ప్రాణాలను కాపాడే భద్రతా చర్య అని పేర్కొన్నారు. ‘80,000 పౌండ్ల బరువున్న భారీ ట్రక్కులను నడిపే వారు ట్రాఫిక్ సైన్ బోర్డులను అర్థం చేసుకోలేకపోతే అది పెను ప్రమాదాలకు దారితీస్తుంది. ప్రమాదకరమైన, అర్హత లేని విదేశీ డ్రైవర్లను రోడ్లపై నుంచి పూర్తిగా తొలగించే వరకు మా పోరాటం కొనసాగుతుంది’ అని ఆయన స్పష్టం చేశారు. ఇటీవల జరిగిన కొన్ని ఘోర రోడ్డు ప్రమాదాల్లో విదేశీ డ్రైవర్ల ప్రమేయం ఉండటమే ఈ కఠిన నిర్ణయాలకు ప్రధాన కారణమని ప్రభుత్వం భావిస్తోంది.
ఈ నిర్ణయం వల్ల ముఖ్యంగా భారత్ (పంజాబ్), మెక్సికో, ఇతర దేశాల నుంచి వచ్చి అక్కడ స్థిరపడిన మత్స్యకారులు, డ్రైవర్లపై తీవ్ర ప్రభావం పడుతోంది. ఇప్పటికే 550కి పైగా డ్రైవింగ్ స్కూళ్లను నిబంధనలు పాటించలేదనే కారణంతో మూసివేశారు. అయితే.. ఈ నిబంధనలు వలసదారులను లక్ష్యంగా చేసుకున్నాయని మానవ హక్కుల సంఘాలు విమర్శిస్తుండగా.. ప్రభుత్వం మాత్రం ‘అమెరికా ఫస్ట్ – సేఫ్టీ ఫస్ట్’ నినాదంతో ముందుకు వెళ్తోంది.