TVK Vijay: దళపతి విజయ్ కులం ఏంటి..? గూగుల్‌లో తెగ వెతికేస్తున్నారుగా..

నేటి డిజిటల్ యుగంలో ఒక వ్యక్తి అత్యున్నత శిఖరాలను అధిరోహించినా, లేదా రాజకీయాల్లోకి అడుగుపెట్టి సంచలనం సృష్టించినా.. నెటిజన్లు గూగుల్‌లో వెతికే మొదటి పదం ‘వారి కులం ఏంటి?’. దురదృష్టవశాత్తూ, విద్యావంతులైన యువత కూడా ఒక నాయకుడి సిద్ధాంతాల కంటే, అతని పుట్టుకకే ఎక్కువ ప్రాధాన్యత ఇస్తున్నారు. ప్రస్తుతం తమిళ రాజకీయాల్లో ‘తమిళగ వెట్రి కళగం’ (TVK) పార్టీతో ప్రకంపనలు సృష్టిస్తున్న దళపతి విజయ్ విషయంలోనూ ఇదే జరుగుతోంది.

గూగుల్‌లో ట్రెండింగ్..
విజయ్ రాజకీయ రంగ ప్రవేశం చేసినప్పటి నుంచి ముఖ్యంగా తెలుగు రాష్ట్రాల్లో ఆయనపై ఒక ఆసక్తికరమైన చర్చ నడుస్తోంది. విజయ్ ‘దళిత’ సామాజిక వర్గానికి చెందినవారనే ప్రచారం సోషల్ మీడియాలో జోరుగా సాగుతోంది. దీనికి ప్రధాన కారణం ఆయన తన పార్టీ జెండా ఆవిష్కరణ సమయంలోనూ, సిద్ధాంతాల పరంగానూ డాక్టర్ బి.ఆర్. అంబేద్కర్, పెరియార్ వంటి మహనీయుల పేర్లను ప్రస్తావించడమే. సామాజిక న్యాయం గురించి మాట్లాడిన ప్రతి ఒక్కరినీ ఒక వర్గానికి కట్టేయడం ప్రస్తుత సమాజంలో పరిపాటిగా మారింది. గూగుల్ సెర్చ్ ఇంజిన్‌లో విజయ్ పేరు సెర్చ్ చేయగానే వస్తున్న ఫలితాలు, ప్రజల్లో ఉన్న ‘కులం పిచ్చి’ ఏ స్థాయిలో ఉందో అర్థం చేస్తోంది. ఒక వ్యక్తి వ్యక్తిత్వాన్ని పక్కన పెట్టి, కేవలం రక్తసంబంధిత మూలాల కోసం వెతకడం నేటి రాజకీయాల్లో ఒక విషాదకరమైన కోణం.

సర్టిఫికెట్లలో ‘నో క్యాస్ట్’..
చాలా మంది నేతలు తమ కుల బలంతో ఓటు బ్యాంకును నిర్మించుకోవాలని చూస్తుంటే, విజయ్ మాత్రం ఇందుకు పూర్తి భిన్నం. తన చదువు పూర్తయిన దగ్గరి నుంచే ఆయన తన సర్టిఫికెట్లలో కులం కాలమ్ దగ్గర ‘నో క్యాస్ట్’ అని నమోదు చేయించుకున్నారు. ఇది ఈరోజు తీసుకున్న నిర్ణయం కాదు, దశాబ్దాల క్రితమే ఆయన వేసిన అడుగు. కులాలకు అతీతంగా మానవత్వం ఉంటే చాలని నమ్మే కుటుంబం నుంచి ఆయన వచ్చారు.

విజయ్ నేపథ్యాన్ని గమనిస్తే.. ఆయన ఒక మిశ్రమ సంస్కృతి నుంచి వచ్చారని స్పష్టమవుతుంది. తల్లి శోభ తమిళ బ్రాహ్మణ కుటుంబానికి చెందినవారు. తండ్రి ప్రముఖ దర్శకుడు ఎస్.ఏ. చంద్రశేఖర్ క్రైస్తవ మతస్థుడు. విజయ్ తండ్రి కుటుంబం తమిళనాడులోని రామేశ్వర తీర ప్రాంతానికి చెందిన సంపన్న వెల్లాలర్ (OC) నేపథ్యం కలిగిన రోమన్ క్యాథలిక్ క్రైస్తవులు. తండ్రి వారసత్వంగా విజయ్ పూర్తి పేరు జోసెఫ్ విజయ్. గూగుల్‌లో ఆయన క్రైస్తవుడని కనిపించడానికి కారణం ఇదే. అయితే.. ఆయన వ్యక్తిగతంగా తాను ఒక భారతీయుడినని, ఏ ఒక్క కులానికో, మతానికో పరిమితం కానని పలుమార్లు స్పష్టం చేశారు.

తెలుగు రాష్ట్రాల్లో విజయ్ గురించి జరుగుతున్న ప్రచారం కేవలం అవగాహన రాహిత్యం మాత్రమే. ఆయన అంబేద్కర్ ఆశయాలను అనుసరించినంత మాత్రాన ఒక వర్గానికి చెందినవారు కాలేరు. సమ సమాజ స్థాపన కోసం పోరాడే ప్రతి నాయకుడు అందరివాడే. రాజకీయాల్లోకి రాకముందే తన సినీ కెరీర్‌లోనూ కుల ప్రస్తావన లేకుండా జాగ్రత్తపడ్డ విజయ్, ఇప్పుడు తన పార్టీ సిద్ధాంతాలలోనూ అదే పారదర్శకతను పాటిస్తున్నారు.

మొత్తానికి.. తమిళనాడు రాజకీయాల్లో మార్పు కోసం వచ్చిన విజయ్.. ప్రజల మనస్సుల్లో నాటుకుపోయిన కుల జాడ్యాన్ని ఎలా తుడిచివేస్తారనేది వేచి చూడాలి. ఒక వ్యక్తిని అతని కులాన్ని బట్టి కాకుండా, అతని కార్యదక్షతను బట్టి అంచనా వేసే రోజు రావాలని కోరుకుందాం.