TG20 తొలి ఛాంపియన్‌గా ‘హైదరాబాద్ ఈ ఛాంపియన్స్’.. ఖమ్మం ఏసెస్‌పై 6 వికెట్లతో ఘన విజయం.!

Kothuru Ram Kumar
Tg20

Tg20

TG20: తెలంగాణ క్రికెట్‌లో కొత్త అధ్యాయానికి నాంది పలికిన TG20 లీగ్ తొలి సీజన్ కు ‘హైదరాబాద్ ఈ ఛాంపియన్స్’ ఛాంపియన్ గా నిలిచింది. ఉప్పల్ వేదికగా ఆదివారం జరిగిన ఫైనల్లో అన్విత ఖమ్మం ఏసెస్‌పై 6 వికెట్ల తేడాతో విజయం సాధించిన హైదరాబాద్ ఈ ఛాంపియన్స్.. టోర్నీ తొలి ట్రోఫీని కైవసం చేసుకుంది. టోర్నీ ప్రారంభం నుంచే నిలకడైన ఆటతీరుతో ఆకట్టుకున్న ఈ జట్టు.. ఫైనల్లోనూ అదే జోరు కొనసాగించి తొలి TG20 ఛాంపియన్‌గా నిలిచింది.

మ్యాచ్ విషయానికి వస్తే.. టాస్ గెలిచిన హైదరాబాద్ కెప్టెన్ అభిరథ్ రెడ్డి ముందుగా బౌలింగ్ ఎంచుకున్నాడు. ఆ నిర్ణయాన్ని బౌలర్లు సరైనదే అనేలా చేశారు. ప్రారంభంలోనే అజయ్ దేవ్ గౌడ్ పరాస్ రాజ్‌ను ఔట్ చేయగా.. దేవ్ మెహతా ఒకే ఓవర్లో సాయికృష్ణా రెడ్డి, ప్రతీక్ రెడ్డిలను పెవిలియన్ పంపించి ఖమ్మం టాప్ ఆర్డర్‌ను కుదేలు చేశాడు. పవర్‌ప్లే ముగిసే సమయానికి ఖమ్మం 33/3తో ఒత్తిడిలో పడింది.

Also Read

Add as a preferred
source on google

ఈ సమయంలో మికిల్ జైస్వాల్, కొడిమెల హిమతేజ ఇన్నింగ్స్‌ను చక్కదిద్దారు. ఇద్దరూ నాలుగో వికెట్‌కు 94 పరుగుల విలువైన భారీ భాగస్వామ్యం నెలకొల్పారు. మికిల్ జైస్వాల్ 39 బంతుల్లో 65 (లేదా 66) పరుగులతో అద్భుత ఇన్నింగ్స్ ఆడగా.. హిమతేజ 31 పరుగులు చేశాడు. చివర్లో విద్యానంద్ రెడ్డి కేవలం 10 బంతుల్లో 20 పరుగులతో మెరుపులు మెరిపించడంతో ఖమ్మం ఏసెస్ నిర్ణీత 20 ఓవర్లలో 8 వికెట్లకు 157 పరుగులు చేసింది. హైదరాబాద్ బౌలర్లలో యశ్వీర్ గౌడ్ 3 వికెట్లతో చెలరేగగా.. దేవ్ మెహతా, అజయ్ దేవ్ గౌడ్ చెరో రెండు వికెట్లు పడగొట్టారు. అఖిల్ రాథోడ్ ఒక వికెట్ దక్కించుకున్నాడు.

158 పరుగుల లక్ష్యంతో బరిలోకి దిగిన హైదరాబాద్‌కు రెండో ఓవర్లోనే ఎదురుదెబ్బ తగిలింది. ఓపెనర్ సాయి వికాస్ రెడ్డి కేవలం 4 పరుగులకే ఔటయ్యాడు. అయితే ఆ తర్వాత షణ్ముఖ అశ్విన్, కెప్టెన్ అభిరథ్ రెడ్డి జట్టును గాడిలో పెట్టారు. ఈ జోడీ రెండో వికెట్‌కు 69 పరుగులు చేసి జట్టు విజయంవైపు నడిపించారు. షణ్ముఖ అశ్విన్ 21 బంతుల్లో 36 పరుగులు చేయగా.. కెప్టెన్ అభిరథ్ రెడ్డి 30 బంతుల్లో 48 పరుగులతో కీలక ఇన్నింగ్స్ ఆడాడు. పవర్‌ప్లే ముగిసే సమయానికి హైదరాబాద్ 56/1తో మంచి స్థితిలో నిలిచింది. అభిరథ్ ఔటైన తర్వాత యశ్వీర్ గౌడ్ కూడా త్వరగా వెనుదిరగడంతో మ్యాచ్ 50:50 ఛాన్సెస్ గా మారింది. అయితే వైష్ణవ్ రెడ్డి ఒత్తిడిని ఛేదించి సిక్సర్లతో స్కోరును వేగంగా సాధించాడు. మరోవైపు ప్రణవ్ వర్మ కూడా సమయోచితంగా బ్యాటింగ్ చేశాడు. వైష్ణవ్ రెడ్డి 28 బంతుల్లో 41 పరుగులతో నాటౌట్‌గా నిలవగా.. ప్రణవ్ వర్మ 19 పరుగులతో అజేయంగా నిలిచాడు. వీరి భాగస్వామ్యంతో హైదరాబాద్ ఈ ఛాంపియన్స్ 17.4 ఓవర్లలోనే 4 వికెట్లు కోల్పోయి లక్ష్యాన్ని ఛేదించి తొలి TG20 ట్రోఫీని సొంతం చేసుకుంది.

ఫైనల్లో బ్యాట్, బంతితో కీలక పాత్ర పోషించిన హైదరాబాద్ ఆల్‌రౌండర్ యశ్వీర్ గౌడ్ ‘ప్లేయర్ ఆఫ్ ది మ్యాచ్’ అవార్డును అందుకున్నాడు. మూడు కీలక వికెట్లు తీసి ఖమ్మం ఏసెస్‌ను తక్కువ స్కోరుకే పరిమితం చేయడంలో అతడు కీలక పాత్ర పోషించాడు.