హైదరాబాద్ నగరంలో ప్రజా రవాణాను మరింత సులభతరం చేసే లక్ష్యంతో ప్రభుత్వం ప్రవేశపెట్టిన ఆర్టీసీ – మెట్రో కామన్ పాస్ విధానంపై ప్రభుత్వం వెనక్కి తగ్గింది. ఈ కామన్ పాస్ ఛార్జీలు సామాన్య ప్రజలకు భారంగా మారాయని పెద్ద ఎత్తున వ్యతిరేకత రావడంతో రవాణా శాఖ స్పందించింది. ప్రజల నుంచి వచ్చిన విజ్ఞప్తులు, ఫిర్యాదులను తీవ్రంగా పరిగణించిన రవాణా శాఖ మంత్రి పొన్నం ప్రభాకర్, కామన్ పాస్ ధరలను పునఃసమీక్షించనున్నట్లు కీలక ప్రకటన చేశారు.
ప్రజా రవాణాను ప్రోత్సహించాలనే ఉద్దేశంతో తీసుకొచ్చిన ఈ సేవలు సామాన్యులకు మరింత అందుబాటులో ఉండేలా ఛార్జీలను హేతుబద్ధీకరించాలని ప్రభుత్వం నిర్ణయించింది. ఈ నేపథ్యంలోనే డిప్యూటీ సీఎం భట్టి విక్రమార్క ఇచ్చిన మార్గదర్శకాలు, సూచనల మేరకు త్వరలోనే రవాణా శాఖ, సంబంధిత ఉన్నతాధికారులతో ఒక ప్రత్యేక సమావేశం నిర్వహించనున్నారు. ఈ భేటీలో కామన్ పాస్ ధరల తగ్గింపు , ప్రయాణికులకు ఎలాంటి ఆర్థిక భారం పడకుండా తగు మార్పులు చేర్పులపై స్పష్టమైన నిర్ణయం తీసుకోనున్నారు. ప్రయాణికుల నుంచి వస్తున్న ఆందోళనలను సానుకూలంగా పరిశీలిస్తామని, సామాన్యులకు మెరుగైన, సౌకర్యవంతమైన రవాణా సౌకర్యాలను కల్పించడమే తమ ప్రభుత్వ ప్రధాన ధ్యేయమని అధికారులు స్పష్టం చేస్తున్నారు. త్వరలోనే దీనికి సంబంధించిన సవరించిన విధివిధానాలు, కొత్త ధరల వివరాలు వెలువడే అవకాశం ఉంది.