Ammonia Gas Leak In Tamil Nadu: తమిళనాడులోని ఎన్నూర్‌లో అమ్మోనియా గ్యాస్ లీక్ కలకలం రేపింది. ఎన్నూరులో ఓ ప్రైవేట్ కంపెనీసబ్ సీ పైపులో మంగళవారం అర్థరాత్రి అమ్మోనియా గ్యాస్ లీక్ అయింది. వెంటనే అప్రమత్తమైన అధికారులు అమ్మోనియా సరఫరాను నిలిపివేశారు. అయితే గ్యాస్ లీకేజీతో సంఘటనా స్థలంలో ఐదుగురు కార్మికులు అస్వస్థతకు గురయ్యారు. వెంటనే వారిని సమీపంలోని ఆసుపత్రికి తరలించి చికిత్స అందిస్తున్నారు. అమ్మోనియా వాసనను పీల్చడం వల్ల మరి కొంత మంది స్వల్ప అస్వస్థతకు గురయ్యారని తెలుస్తోంది.
అమ్మోనియా గ్యాస్ లీక్ గురించి ఎలాంటి ఆందోళన చెందాల్సిన అవసరం లేదని అవడి జాయింట్‌ కమిషనర్‌ విజయ్‌కుమార్‌ సోషల్ మీడియాలో తెలిపారు. అస్వస్థతకు గురైన ఐదుగురి ఆరోగ్య పరిస్థితి ప్రస్తుతం నిలకడగా ఉందని చెప్పారు. ఎన్నూరులో ప్రస్తుతం గ్యాస్ లీకేజీ లేదని విజయ్‌కుమార్‌ పేర్కొన్నారు. ప్రస్తుతం సంఘటనా స్థలంలో గ్యాస్ లీకేజీ కాకుండా.. చర్యలు చేపడుతున్నట్లు చెప్పుకొచ్చారు.
Also Read: Salaar 5 Days Collections: 500 కోట్ల పోస్టర్ దించు మావా…
ఎరువులు తయారు చేసే విధానంలో అమ్మోనియాను ముడిసరుకుగా ఉపయోగించే కోరమాండల్ ఇంటర్నేషనల్ లిమిటెడ్‌లో ఈ ఘటన జరిగినాట్లు తెలుస్తోంది. పైప్‌ లైన్ ప్రీ-కూలింగ్ ఆపరేషన్ సమయంలో అమ్మోనియా గ్యాస్ లీకేజీ అయిందట. గ్యాస్ లీకేజీ కారణంగా పెరియకుప్పం, చిన్నకుప్పం గ్రామాలకు చెందిన వారు తీవ్ర భయాందోళనకు గురయ్యారు. ఘాటైన వాసన, శ్వాస తీసుకోవడంలో ఇబ్బందికి గురయ్యారట.