Team Rankings: సూపర్-8 టీమ్ ర్యాంకింగ్స్‌.. అగ్రస్థానంలో జింబాబ్వే, భారత్ స్థానం ఎంతంటే?

2026 T20 WC Super 8 Team Rankings: టీ20 ప్రపంచకప్‌ 2026లో లీగ్ దశ ముగిసింది. భారత్‌, పాకిస్థాన్‌, శ్రీలంక, జింబాబ్వే, వెస్టిండీస్‌, ఇంగ్లాండ్‌, దక్షిణాఫ్రికా, న్యూజిలాండ్‌ జట్లు సూపర్-8కు చేరాయి. మ్యాచులు శనివారం (ఫిబ్రవరి 21) నుంచి ఆరంభం కానున్నాయి. ఈ నేపథ్యంలో సూపర్-8కు చేరిన జట్లపై అభిమానులు, నిపుణులు తమ తమ అంచనాలు, అభిప్రాయాలు వ్యక్తం చేస్తున్నారు. ఓ విశ్లేషణ ప్రకారం.. లీగ్ రౌండ్ దశ ప్రదర్శన ఆధారంగా జట్ల ర్యాంకింగ్ ఆసక్తికరంగా ఉంది. ఈ జాబితాలో అగ్రస్థానంలో జింబాబ్వే నిలవడం విశేషం. ఎవరూ ఊహించని విధంగా వారు బలమైన ఆస్ట్రేలియాను, ఆతిథ్య శ్రీలంకను ఓడించడం ఆ జట్టు ప్రతిభకు నిదర్శనంగా భావిస్తున్నారు.

రెండో స్థానంలో వెస్టిండీస్‌, మూడో స్థానంలో దక్షిణాఫ్రికా ఉన్నాయి. నాలుగో స్థానంలో భారత్ ఉంది. భారత జట్టు బౌలింగ్ బలంగా ఉన్నప్పటికీ.. బ్యాటింగ్‌లో మాత్రం ఆశించిన స్థాయిలో రాణించలేదని నిపుణులు పేర్కొన్నారు. ముఖ్యంగా ఇషాన్ కిషన్, శివమ్ దూబే తప్ప మిగతా బ్యాటర్లు స్థిరంగా రాణించలేదని అభిప్రాయం వ్యక్తమైంది. అయితే సూపర్-8లో భారత్ ప్రధాన ఫేవరెట్‌గా నిలుస్తుందని కూడా ఈ విశ్లేషణ చెబుతోంది. ఐదో స్థానంలో న్యూజిలాండ్‌, ఆరో స్థానంలో శ్రీలంక, ఏడో స్థానంలో ఇంగ్లాండ్‌ ఉన్నాయి.

Also Read: Ambati-Pemmasani: 18 రోజులు సినిమా చూపించావ్ పెమ్మసాని.. తప్పక మూల్యం చెల్లించాల్సిందే!

ఇక చివరి స్థానంలో దాయాది పాకిస్థాన్ నిలిచింది. చిన్న జట్లపై విజయాలు సాధించి.. భారత్‌పై ఘోరంగా ఓడిపోవడం పాక్ ర్యాంక్‌పై ప్రభావం చూపిందని విశ్లేషకులు అభిప్రాయపడ్డారు. మొత్తంగా ఈ ర్యాంకింగ్ అభిమానుల్లో చర్చకు దారి తీసింది. ముఖ్యంగా జింబాబ్వే అగ్రస్థానంలో ఉండటం, భారత్ నాలుగో స్థానంలో ఉండటం వంటి అంశాలు సూపర్-8 మ్యాచ్‌లపై మరింత ఉత్కంఠ పెంచుతున్నాయి. ఇప్పుడు అసలు పరీక్ష సూపర్-8లోనే ఉంది.