Sumo Didi: ఒళ్ళు గగుర్పొడిచేలా ‘సుమో దీదీ’ ట్రైలర్!

Sumo Didi: ఆడపిల్ల శరీరం ఎలా ఉండాలి, ఆమె బరువు ఎంత ఉండాలి, ఏ రంగాల్లో రాణించాలి అనే విషయాలపై సమాజం గీసిన గిరిగీతలను ప్రశ్నిస్తూ వెండితెరపైకి వస్తోంది సరికొత్త స్పోర్ట్స్ డ్రామా ‘సుమో దీదీ’. భారతదేశపు మొట్టమొదటి మహిళా సుమో రెజ్లర్ హేటల్ డేవ్ జీవిత పోరాటాన్ని కళ్ళకు కడుతూ ప్రముఖ ఓటీటీ సంస్థ జీ5 హిందీ విడుదల చేసిన ఈ సినిమా అధికారిక ట్రైలర్ సినీ ప్రియులను విశేషంగా ఆకట్టుకుంటోంది. మహిళల బరువు, రూపురేఖలను చూసి గేలి చేయడం సమాజంలో ఎంతటి మానసిక క్షోభను కలిగిస్తుందో ట్రైలర్ ఆరంభంలోనే సూటిగా తాకింది. సాంప్రదాయ బద్ధమైన మార్వాడీ కుటుంబంలో పుట్టిన అమ్మాయిపై పడ్డ నిందలు, “బరువు తగ్గకపోతే నిన్ను ఎవరు పెళ్లి చేసుకుంటారు?” అనే మాటలు, స్పాన్సర్‌షిప్‌ల కోసం తిరస్కారాలు ఎదురైనా ఆమె ఏనాడూ వెనకడుగు వేయలేదు. తన బలహీనతగా లోకం వేలెత్తి చూపిన భారీ కాయాన్నే అతిపెద్ద ఆయుధంగా మార్చుకుని, జపాన్ దేశానికే సొంతమైన సుమో రింగ్‌లో భారత జెండాను రెపరెపలాడించిన హేటల్ నిజ జీవిత ప్రయాణం వెన్నులో వణుకు పుట్టించేలా కనిపిస్తుంది.

జియో స్టూడియోస్, ఫ్రెష్ లైమ్ ఫిల్మ్స్, MA+TH ఎంటర్‌టైన్‌మెంట్ నెట్‌వర్క్స్ సంయుక్తంగా నిర్మించిన ఈ చిత్రానికి జయంత్ రోహత్గి దర్శకత్వం వహించారు. హేటల్ డేవ్ టైటిల్ పాత్రలో నటి శ్రియం భగ్నాని పరకాయ ప్రవేశం చేయగా, నటుడు చైతన్య శర్మ కీలక పాత్రలో కనిపించనున్నారు. జపాన్, ముంబై, కోల్‌కతాలలో చిత్రీకరించిన ఈ బయోపిక్ ఇప్పటికే టోక్యో, పామ్ స్ప్రింగ్స్ వంటి ప్రతిష్ఠాత్మక అంతర్జాతీయ చలనచిత్రోత్సవాల్లో విమర్శకుల ప్రశంసలు అందుకుంది. జీ5 హిందీ వేదికగా అక్టోబర్ 23, 2026 నుంచి స్ట్రీమింగ్ కానున్న ‘సుమో దీదీ’.. సమాజం నిర్ణయించిన హద్దులను బద్దలుకొట్టి గెలవాలనుకునే ప్రతి ఒక్కరికీ ఓ బలమైన స్ఫూర్తిని నింపడం ఖాయం అని చెబుతోంది టీం.