Asian Games 2026: 16 ఏళ్ల సుదీర్ఘ నిరీక్షణకు తెర.. 10,000 మీటర్ల రేసులో భారత్‌కు కాంస్య పతకం

Asian Games 2026: ఆసియా క్రీడల్లో మహిళల 10,000 మీటర్ల రేసులో భారత్‌కు దశాబ్ద కాలానికి పైగా ఎదురుచూస్తున్న పతకం కల నెరవేరింది! గురువారం జరిగిన హోరాహోరీ ఫైనల్లో భారత అథ్లెట్ సీమా కుమారి అద్భుత ప్రదర్శనతో కాంస్య పతకం సాధించి, ఏకంగా 16 ఏళ్ల సుదీర్ఘ పతక నిరీక్షణకు తెరదించింది. చివరివరకూ ఎంతో ఉత్కంఠగా సాగిన ఈ రేసును సీమా 32:50.05 నిమిషాల్లో ముగించి మూడో స్థానంలో నిలిచింది. ఆసియా క్రీడల్లో మహిళల 10,000 మీటర్ల విభాగంలో భారత్‌కు ఇది కేవలం మూడో పతకం కావడం విశేషం. ఇదే విభాగంలో బహ్రెయిన్‌కు చెందిన విన్‌ఫ్రెడ్ యావి 32:39.18 నిమిషాల్లో రేసు పూర్తి చేసి స్వర్ణం సాధించగా, జపాన్ అథ్లెట్ నోజోమి తనకా 32:41.54 నిమిషాలతో రజత పతకాన్ని సొంతం చేసుకున్నారు.

ఈ రేసు ఆద్యంతం ఎంతో ఆసక్తికరంగా సాగింది. ముఖ్యంగా స్వర్ణం కోసం విన్‌ఫ్రెడ్ యావి, నోజోమి తనకా మధ్య ఆఖరి క్షణం వరకు తీవ్ర పోటీ నడిచింది. ఇద్దరూ తమ వేగాన్ని, స్టామినాను పరీక్షించుకుంటూ పోటీ పడగా, చివరికి బహ్రెయిన్ రన్నర్ కొద్ది తేడాతో ముందుకెళ్లి బంగారు పతకాన్ని చేజిక్కించుకుంది. మరోవైపు మన సీమా కుమారి మాత్రం ఏమాత్రం ఒత్తిడికి గురికాకుండా, ఎంతో సమయస్ఫూర్తితో, సహనంతో పగడ్బందీగా పరిగెత్తింది. ముందున్న ఇద్దరి వేగాన్ని అందుకోవడం కష్టమైనప్పటికీ, వెనుకాల వస్తున్న ఇతర రన్నర్లు తనను దాటకుండా జాగ్రత్త పడుతూ ఆధిపత్యాన్ని నిలబెట్టుకుంది. చివరి వరకు తన శక్తినంతా ధారపోసి మూడో స్థానాన్ని కైవసం చేసుకుంది. 2010 తర్వాత ఈ ఈవెంట్‌లో భారత్‌ సాధించిన తొలి పతకం ఇదే కావడం విశేషం. అంతేకాదు, ప్రసిద్ధ ఐచి-నాగోయా ఆసియా క్రీడల్లో భారత అథ్లెటిక్స్ బోణీ కొట్టిన మొదటి పతకం కూడా సీమా ఖాతాలోనే పడింది.

ఇంతకీ ఎవరీ సీమా?

హిమాచల్ ప్రదేశ్‌లో 2001, జనవరి 10న జన్మించిన సీమా కుమారి, 5,000 మీటర్లు, 10,000 మీటర్ల సుదీర్ఘ పరుగు పోటీల్లో తనదైన ముద్ర వేసుకుంటూ వస్తోంది. 2018 జూలై నుంచి ‘ఖేలో ఇండియా’ ప్రోగ్రామ్ ద్వారా శిక్షణ పొందుతున్న ఆమె, 2026 ఆసియా క్రీడల కోసం ప్రత్యేకంగా నేషనల్ కోచింగ్ క్యాంప్‌లో మెరుగైన శిక్షణ తీసుకుంది. కేంద్ర ప్రభుత్వం అందిస్తున్న టార్గెట్ ఒలింపిక్ పోడియం స్కీమ్ (TOPS)తో పాటు ఆన్యువల్ క్యాలెండర్ ఫర్ ట్రైనింగ్ అండ్ కాంపిటీషన్ (ACTC) ద్వారా ఆమెకు అవసరమైన ఆర్థిక సహాయం లభించింది. గత కొన్ని ఏళ్లుగా సీమా స్థిరమైన ప్రదర్శనతో అంచలంచెలుగా ఎదుగుతూ వచ్చింది. హాంగ్‌కాంగ్‌లో జరిగిన 2024 ఆసియన్ క్రాస్ కంట్రీ ఛాంపియన్‌షిప్‌లో సీనియర్ మహిళల రేసులో స్వర్ణం గెలుచుకున్న సీమా, 2025లో జరిగిన ఎఫ్‌ఐఎస్‌యూ (FISU) వరల్డ్ యూనివర్సిటీ గేమ్స్‌లో 5,000 మీటర్ల విభాగంలో రజత పతకం సాధించింది. ఆ తర్వాత 2026లో 65వ నేషనల్ ఇంటర్-స్టేట్ సీనియర్ అథ్లెటిక్స్ ఛాంపియన్‌షిప్‌లో 10,000 మీటర్ల విభాగంలో స్వర్ణం సాధించి తన ఫామ్‌ను చాటుకుంది. అంతేకాకుండా, ఈ ఏడాదే ఆమె తన వ్యక్తిగత ఉత్తమ రికార్డులను కూడా తిరగరాసింది. మార్చి నెలలో కాలిఫోర్నియాలో జరిగిన ‘ది టెన్’ పోటీల్లో 10,000 మీటర్ల రేసును 32:02.43 నిమిషాల్లో పూర్తి చేసి ఐదో స్థానంలో నిలవడమే కాకుండా, తన కెరీర్‌లోనే అత్యుత్తమ సమయాన్ని నమోదు చేసింది. ఆ తర్వాతి నెలలోనే 5,000 మీటర్ల ఈవెంట్‌లో 15:16.20 నిమిషాలతో మరొక పర్సనల్ బెస్ట్ రికార్డును నెలకొల్పింది. ప్రస్తుతం 25 ఏళ్ల వయసులోనే ఆసియా క్రీడల్లో కాంస్యం గెలుచుకుని, భారత సుదీర్ఘ పరుగు పందెం (లాంగ్ డిస్టెన్స్ రన్నింగ్) విభాగానికి తానొక ప్రధానమైన అథ్లెట్‌నని నిరూపించుకుంది.