Raptadu School Attack: అనంతపురం జిల్లా రాప్తాడు జిల్లా పరిషత్ ఉన్నత పాఠశాలలో పదో తరగతి బాలికపై ఎలక్ట్రిక్ రంపంతో దాడి చేసిన దారుణ ఘటనలో నిందితుడిని పోలీసులు ఎట్టకేలకు అదుపులోకి తీసుకున్నట్లు తెలుస్తోంది. పాఠశాల ఆవరణలోకి హఠాత్తుగా చొరబడి బాలిక గొంతు, ముఖంపై విచక్షణారహితంగా దాడి చేసి పరారైన ఆ ఉన్మాది కోసం ముమ్మరంగా గాలించిన పోలీసులు, అతడిని ధర్మవరంలో అదుపులోకి తీసుకున్నట్లు సమాచారం అందింది. ఇక.. ఈ పాశవిక ఘటన రాప్తాడు మండల కేంద్రంలో తీవ్ర కలకలం రేపింది. పాఠాలు వింటున్న సమయంలో ఒక్కసారిగా ప్రవేశించిన ఆగంతకుడి దాడిలో తీవ్రంగా గాయపడి, కుడి చేయి తెగిపోయి రక్తపు మడుగులో కుప్పకూలిన అయ్యవారిపల్లెకు చెందిన సదరు విద్యార్థిని ప్రస్తుతం అనంతపురం ప్రభుత్వ సర్వజన ఆసుపత్రి అత్యవసర విభాగంలో మృత్యువుతో పోరాడుతోంది. వైద్యులు ఆమెను కాపాడేందుకు శాయశక్తులా ప్రయత్నిస్తున్నారు. సంఘటనా స్థలానికి చేరుకుని సాక్ష్యాలు సేకరించిన పోలీసులు కేసు నమోదు చేసి గాలింపు చేపట్టి, చివరకు నిందితుడిని ధర్మవరంలో పట్టుకున్నట్లు తెలుస్తోంది.
ఈ ఘటనపై బాధిత బాలిక కుటుంబీకులు ఆగ్రహం వ్యక్తం చేశారు. రంపంతో స్కూల్‌లోకి దుండగుడు ప్రవేశించడం ఏంటని బంధువులు నిలదీశారు. మరోవైపు.. క్లాస్ టీచర్ సైతం ఈ ఘటనపై స్పందించారు. “సెకండ్ హవర్ క్లాస్ జరుగుతుండగా దుండగుడు వచ్చాడు.. ఒక్కసారిగా దుండగుడు రావడంతో విద్యార్థులు పరుగులు తీశారు.. దుండగుడు ఒక్కడే వచ్చి ఘాతుకానికి పాల్పడ్డాడు.. బయట ఎంత మంది ఉన్నారో చూడలేదు.. రేపు పోలింగ్ ఉండటంతో మిగతా టీచర్లు ఎవరూ లేరు.. స్కూల్‌లో కేవలం ఐదుగురు టీచర్లు మాత్రమే ఉన్నాం” అని క్లాస్ టీచర్ వివరించారు.