Peddi- Lenin:రామ్ చరణ్ వర్సెస్ అఖిల్.. ‘పెద్ది’ భయంతో ‘లెనిన్’ వెనక్కి!

టాలీవుడ్ బాక్సాఫీస్ వద్ద సమ్మర్ వార్ ఆసక్తికరంగా మారుతోంది. రామ్ చరణ్ హీరోగా ఉప్పెన ఫేమ్ బుచ్చిబాబు సన దర్శకత్వంలో తెరకెక్కుతున్న భారీ చిత్రం ‘పెద్ది’ (Peddi) విడుదల తేదీలో మార్పులు చోటు చేసుకున్నట్లు సమాచారం. తొలుత ఏప్రిల్ 30న అనుకున్న ఈ చిత్రం, ఇప్పుడు జూన్ చివరి వారంలో వేసవి కానుకగా వచ్చేందుకు సిద్ధమవుతోంది. అయితే, ‘పెద్ది’ రాకతో అక్కినేని అఖిల్ నటిస్తున్న ‘లెనిన్’ చిత్రానికి తిప్పలు తప్పడం లేదు. రామ్ చరణ్ సినిమాతో పోటీ పడటం రిస్క్ అని భావించిన ‘లెనిన్’ నిర్మాతలు, తమ సినిమాను మరోసారి వాయిదా వేయాలని నిర్ణయించుకున్నట్లు తెలుస్తోంది.

Also Read : Allu Arjun: అల్లు అర్జున్ పుట్టినరోజున అదిరిపోయే అప్‌డేట్స్.. ‘AA22’ టైటిల్ ఫిక్స్?

వాస్తవానికి ‘లెనిన్’ మే 1న విడుదల కావాల్సి ఉండగా, అప్పట్లో ‘పెద్ది’ పోటీని తట్టుకోలేమని భావించి జూన్ 26కి మార్చారు. ఇప్పుడు రామ్ చరణ్ సినిమా కూడా జూన్ ఆఖరి వారంలోనే ల్యాండ్ అవుతుండటంతో, అఖిల్ సినిమాను ఇంకాస్త వెనక్కి జరపాలని అన్నపూర్ణ స్టూడియోస్ మరియు సితార ఎంటర్‌టైన్‌మెంట్స్ యోచిస్తున్నాయి. మురళీకృష్ణ అబ్బూరు దర్శకత్వంలో భాగ్యశ్రీ బోర్సే హీరోయిన్‌గా నటిస్తున్న ‘లెనిన్’ ప్రస్తుతం షూటింగ్ ముగించుకునే పనిలో ఉంది. ‘పెద్ది’ కొత్త రిలీజ్ డేట్ అధికారికంగా ఖరారైన వెంటనే, ‘లెనిన్’ టీమ్ తమ కొత్త తేదీని ప్రకటించనుంది. మెగా పవర్ స్టార్ ఎఫెక్ట్ ఇలా వరుస వాయిదాలకు కారణం కావడం ఇప్పుడు ఫిలిం నగర్‌లో హాట్ టాపిక్‌గా మారింది.