రాయల్ ఛాలెంజర్స్ బెంగళూరు (RCB) జట్టుకు వరుసగా రెండు సార్లు ఐపీఎల్ (IPL 2026) ట్రోఫీలను అందించి, ఆ ఫ్రాంచైజీ చరిత్రలోనే అత్యంత విజయవంతమైన కెప్టెన్గా నిలిచిన రజత్ పాటిదార్ ఒక షాకింగ్ విషయాన్ని వెల్లడించారు. మొదట్లో తనకు ఆర్సీబీ జట్టులో చేరడం అస్సలు ఇష్టం లేదని ఆయన పేర్కొన్నారు. ఒక యూట్యూబ్ ఇంటర్వ్యూలో మాట్లాడిన ఆయన, ఆ సమయంలో తన మనసులోని ఆందోళనలను పంచుకున్నారు.
2021లో ఆర్సీబీ తరపున ఆడిన పాటిదార్ ఆశించిన స్థాయిలో రాణించలేదు. ఆ తర్వాత 2022 మెగా వేలంలో ఏ జట్టూ అతనిని కొనుగోలు చేయలేదు. అయితే, అదే సీజన్ మధ్యలో లవ్నిత్ సిసోడియాకు రిప్లేస్మెంట్ ఆటగాడిగా ఆర్సీబీ నుండి ఆయనకు పిలుపు వచ్చింది. కానీ, ఆ సమయంలో జట్టులోకి వెళ్లడానికి ఆయన వెనుకాడారు. కేవలం ఒకరి స్థానంలో వెళ్తున్నప్పుడు తనకు ఆడే అవకాశం దక్కుతుందో లేదో అన్న అనుమానం ఆయనకు బలంగా ఉండేది. పైగా, క్యాంప్కు వెళ్లిన తర్వాత కూడా “నువ్వు రిప్లేస్మెంట్ ప్లేయర్వి మాత్రమే, ఎవరికైనా గాయాలైతేనే అవకాశం వస్తుంది, కాబట్టి రిలాక్స్గా ఉండు” అని మేనేజ్మెంట్ చెప్పడంతో ఆయన మరింత నిరాశకు గురయ్యారు.
దీనికి తోడు అదే సమయంలో రజత్ పాటిదార్ వివాహ ముహూర్తం కూడా ఖరారైంది. కేవలం బెంచ్కే పరిమితం కావడానికి పెళ్లిని వాయిదా వేసుకోవడం ఎందుకనే ఉద్దేశంతో, ఆర్సీబీ పిలుపును తిరస్కరించాలని ఆయన గట్టిగా అనుకున్నారు. కానీ, చివరకు జట్టులో చేరిన పాటిదార్.. లక్నో సూపర్ జయంట్స్తో జరిగిన ఎలిమినేటర్ మ్యాచ్లో 112 పరుగులతో అద్భుత సెంచరీ చేసి అందరి దృష్టిని ఆకర్షించారు.
🔴 HONESTLY, I DIDN’T WANT TO JOIN RCB – SHOCKING STATEMENT BY RAJAT PATIDAR 🤯
🎙️: I didn’t really want to rejoin RCB because I was told I was coming in as a replacement and would only get a chance if someone got injured. My wedding date was already fixed, and I don’t see… pic.twitter.com/Bc3ys3Txzc
— Sam (@cricsam02) June 7, 2026
ఆ ఒక్క ఇన్నింగ్స్ ఆయన కెరీర్ను మలుపు తిప్పింది. 2025 మెగా వేలం తర్వాత ఆర్సీబీ మేనేజ్మెంట్ ఆయనకు కెప్టెన్సీ బాధ్యతలను అప్పగించింది. ఎన్నో ఏళ్లుగా ఆర్సీబీ అభిమానులు ఎదురుచూస్తున్న ఐపీఎల్ కప్పును అందించడమే కాకుండా, వరుసగా రెండో ఏడాది కూడా జట్టును చాంపియన్గా నిలిపి పాటిదార్ చరిత్ర సృష్టించారు. నాడు బెంచ్కే పరిమితం అవుతానేమో అని భయపడిన ఒక సాధారణ ఆటగాడు, నేడు అదే ఫ్రాంచైజీని విజయపథంలో నడిపించే స్థాయికి చేరడం నిజంగా విశేషం.