Bank Loan: ఎలాంటి పూచీ కత్తు లేకుండా రూ.20 లక్షల లోన్ .. ప్రాసెస్ ఇదే..

చిన్న వ్యాపారాలను ప్రోత్సహించడానికి కేంద్ర ప్రభుత్వం అందిస్తున్న ఒక అద్భుతమైన వరం ‘ప్రధానమంత్రి ముద్రా యోజన’ (PMMY). ఎలాంటి పూచీకత్తు లేకుండా వ్యాపార విస్తరణ కోసం రూ. 50 వేల నుండి ఏకంగా రూ. 20 లక్షల వరకు ఈ పథకం ద్వారా రుణం పొందవచ్చు. ఇటీవల ప్రభుత్వం ఈ పథకం కింద గరిష్ట రుణ పరిమితిని రూ. 10 లక్షల నుండి రూ. 20 లక్షలకు పెంచడం చిన్న, మధ్యతరహా వ్యాపారులకు మరింత ఊరటనిచ్చింది. దేశంలోని కిరాణా దుకాణదారులు, పండ్లు, కూరగాయల వ్యాపారులు, సెలూన్లు, టైలరింగ్ షాపులు, నూతన స్టార్టప్‌లు మరియు చిన్నపాటి ఉత్పాదక రంగాల్లో ఉన్న ఎవరైనా ఈ ముద్రా లోన్ కోసం దరఖాస్తు చేసుకోవచ్చు.

ఈ పథకాన్ని వ్యాపార స్థాయిని బట్టి మూడు విభాగాలుగా వర్గీకరించారు. మొదటిది ‘శిశు’ లోన్, దీని ద్వారా రూ. 50,000 వరకు ఇస్తారు. కొత్తగా వ్యాపారం ప్రారంభించే వారికి ఇది ఉపయోగపడుతుంది. రెండవది ‘కిశోర్’ లోన్, దీని కింద రూ. 50,001 నుండి రూ. 5 లక్షల వరకు లభిస్తుంది. మూడవది ‘తరుణ్’ లోన్, దీని ద్వారా రూ. 5,00,001 నుండి రూ. 10 లక్షల వరకు పొందవచ్చు. తాజాగా ప్రవేశపెట్టిన రూ. 20 లక్షల కొత్త పరిమితి గతంలో తరుణ్ లోన్లను విజయవంతంగా తీర్చిన ట్రాక్ రికార్డ్ ఉన్న వ్యాపారులకు వర్తిస్తుంది. కాబట్టి దరఖాస్తు చేసిన ప్రతి ఒక్కరికీ నేరుగా రూ. 20 లక్షలు రావు, మీ వ్యాపార టర్నోవర్, అవసరాల ఆధారంగానే బ్యాంకులు రుణ మొత్తాన్ని నిర్ణయిస్తాయి.

ఈ లోన్ కోసం ప్రభుత్వ, ప్రైవేట్ రంగానికి చెందిన వాణిజ్య బ్యాంకులు, గ్రామీణ బ్యాంకులు లేదా కో-ఆపరేటివ్ బ్యాంకులను సంప్రదించవచ్చు. దరఖాస్తు ప్రక్రియ కోసం ఆధార్ కార్డ్, పాన్ కార్డ్, ఓటర్ ఐడీ, వ్యాపార చిరునామా ఆధారాలు (జీఎస్టీ లేదా మున్సిపల్ లైసెన్స్), గత కొన్ని నెలల బ్యాంక్ స్టేట్‌మెంట్, పాస్‌పోర్ట్ సైజ్ ఫోటోలు అవసరమవుతాయి. నేరుగా బ్యాంకుకు వెళ్లి ఫారమ్ పూర్తి చేయవచ్చు లేదా ప్రభుత్వ అధికారిక ‘జన్ సమర్థ్’ లేదా ముద్రా పోర్టల్ ద్వారా ఆన్‌లైన్‌లో కూడా సులభంగా దరఖాస్తు చేసుకోవచ్చు. రుణాన్ని తిరిగి చెల్లించడానికి 3 నుండి 5 సంవత్సరాల వరకు గడువు ఉంటుంది.