లోకం ఎప్పుడూ పైరూపాన్నే చూస్తుంది, కానీ ప్రతిభ లోతును చూడదు. మనిషి ముఖంపై ఉండే వెంట్రుకలను చూసి వెక్కిరించే సమాజానికి, తన మెదడులోని మేధస్సుతో సమాధానం చెప్పింది ప్రాచీ నిగమ్. అవమానాలు ఎదురైనప్పుడు కుంగిపోకుండా, వాటినే ఏరుకుని విజయానికి మెట్లుగా మార్చుకున్న ఈ విద్యార్థిని ప్రయాణం నేటి తరానికి ఒక గొప్ప పాఠం.
ఉత్తరప్రదేశ్లోని సీతాపూర్ జిల్లాకు చెందిన ప్రాచీ నిగమ్, గతేడాది యూపీ బోర్డు 10వ తరగతి ఫలితాల్లో రాష్ట్ర టాపర్గా నిలిచినప్పుడు దేశమంతా ఆమె వైపు చూసింది. అయితే, ఆ సమయంలో ఆమె సాధించిన మార్కుల కంటే, ఆమె ముఖంపై ఉన్న హార్మోన్ల మార్పుల వల్ల వచ్చిన ‘మీసాల’పై సోషల్ మీడియాలో కొందరు దారుణమైన ట్రోలింగ్ చేశారు. “మీసాల పిల్ల” అంటూ ఎగతాళి చేశారు. కానీ, ప్రాచీ ఆ మాటలకు చలించలేదు. కన్నీళ్లకు బదులు తన కలంకు పదును పెట్టింది.
12వ తరగతిలో మళ్ళీ ప్రభంజనం
తాజాగా విడుదలైన 12వ తరగతి ఫలితాల్లో ప్రాచీ 91.20 శాతం మార్కులు సాధించి తన ప్రతిభ యాదృచ్ఛికం కాదని నిరూపించింది. వరుసగా రెండుసార్లు అత్యుత్తమ ఫలితాలు సాధించడం ద్వారా, తనపై వచ్చిన విమర్శలన్నింటికీ ఆమె మౌనంగానే చెక్ పెట్టింది.
రూపం అనేది ప్రకృతి ఇచ్చేది, కానీ ప్రతిభ అనేది మనం సాధించుకునేది. ప్రాచీ తన రూపాన్ని చూసి సిగ్గుపడకుండా, తన లక్ష్యంపైనే దృష్టి పెట్టింది. ఒకసారి టాపర్గా నిలవడం అదృష్టం కావచ్చు, కానీ రెండోసారి కూడా అదే స్థాయి మార్కులు సాధించడం ఆమె పట్టుదలకు నిదర్శనం. సమాజం చేసే వెక్కిరింతలు మనల్ని ఆపలేవని, మన విజయం ముందు ఏ విమర్శ నిలవదని ఆమె నిరూపించింది.