Peddi Ticket Prices Hike: ‘పెద్ది’ సినిమా టికెట్ ధరల పెంపుకు గ్రీన్ సిగ్నల్.. రోజుకు 5 షోలకు అనుమతి.!

Peddi Ticket Prices Hike: మెగా పవర్ స్టార్ రామ్ చరణ్ హీరోగా తెరకెక్కిన భారీ బడ్జెట్ చిత్రం ‘పెద్ది’ (Peddi) విడుదలకు ముందే తెలంగాణ ప్రభుత్వం కీలక నిర్ణయం తీసుకుంది. సినిమా విడుదల సందర్భంగా టికెట్ ధరల పెంపుతో పాటు రోజుకు అదనపు షోలకు కూడా అనుమతి మంజూరు చేసింది. దీంతో అభిమానులు తొలి రోజే సినిమాను చూసేందుకు మరింత ఆసక్తి చూపుతున్నారు. తెలంగాణ ప్రభుత్వం జూన్ 3న రాత్రి 8 గంటలకు ప్రత్యేక ప్రీమియర్ షో నిర్వహించేందుకు అనుమతి ఇచ్చింది. ఈ స్పెషల్ ప్రీమియర్ షో కోసం టికెట్ ధరను గరిష్ఠంగా రూ.600గా నిర్ణయించింది. దీంతో విడుదలకు ముందే అభిమానులు సినిమాను వీక్షించే అవకాశం లభించనుంది.

జూన్ 4న సినిమా విడుదలైన తర్వాత 10 రోజుల పాటు టికెట్ ధరలను పెంచుకునేందుకు ప్రభుత్వం అనుమతి ఇచ్చింది. ఈ మేరకు సింగిల్ స్క్రీన్ థియేటర్లలో ఒక్కో టికెట్‌పై రూ.100 అదనంగా వసూలు చేసుకోవచ్చు. అలాగే మల్టీప్లెక్స్ థియేటర్లలో టికెట్ ధరపై రూ.125 వరకు పెంపు చేసుకునే అవకాశం కల్పించారు. సాధారణంగా 4 షోలు ప్రదర్శించే థియేటర్లకు ఈసారి ప్రత్యేక మినహాయింపు ఇచ్చారు. ‘పెద్ది’ సినిమా కోసం రోజుకు ఐదు షోలు ప్రదర్శించేందుకు తెలంగాణ ప్రభుత్వం అనుమతి మంజూరు చేసింది. దీంతో తొలి పది రోజుల పాటు రాష్ట్రవ్యాప్తంగా భారీ సంఖ్యలో షోలు ప్రదర్శించనున్నారు.

ఇప్పటికే ‘పెద్ది’ సినిమాపై భారీ అంచనాలు నెలకొన్నాయి. విడుదలకు ముందే టికెట్ ధరల పెంపు, అదనపు షోలకు అనుమతి లభించడంతో.. కాస్త పాజిటివ్ టాక్ వచ్చినా బాక్సాఫీస్ వద్ద ఈ చిత్రం భారీ ఓపెనింగ్స్ నమోదు చేయనుంది.