Pakistan: ఆర్థిక ఇబ్బందుల్లో పాకిస్తాన్.. ప్రభుత్వ ఉద్యోగులు, మంత్రులు, ఎంపీల జీతాలు కట్

పాకిస్తాన్ ప్రస్తుతం తీవ్ర ఆర్థిక సంక్షోభంలో చిక్కుకుంది. పశ్చిమ ఆసియాలో (మిడిల్ ఈస్ట్) జరుగుతున్న యుద్ధం (ముఖ్యంగా ఇరాన్‌పై అమెరికా-ఇజ్రాయెల్ దాడులు) వల్ల ప్రపంచంలో ఆయిల్ ధరలు ఆకాశాన్ని తాకుతున్నాయి. ఇది పాకిస్తాన్ వంటి ఆయిల్ దిగుమతి దేశాలను తీవ్రంగా ప్రభావితం చేస్తోంది. దీంతో ప్రధాన మంత్రి షెహబాజ్ షరీఫ్ ప్రభుత్వం ఆస్టరిటీ మెజర్స్ (కట్టుబాటు చర్యలు) ప్రకటించారు. ఇందులో ప్రభుత్వ ఉద్యోగుల జీతాలపై కోతలు, ఇతర ఖర్చుల తగ్గింపు ముఖ్యమైనవి. సోమవారం రాత్రి పాకిస్తాన్‌ను ఉద్దేశించి షాబాజ్ షరీఫ్ మాట్లాడుతూ, పాకిస్తాన్ ఆర్థిక వ్యవస్థ గల్ఫ్ నుండి చమురు సరఫరాపై ఆధారపడి ఉందని, చమురు ధరల పెరుగుదల కారణంగా తన దేశం సమస్యలను ఎదుర్కొంటోందని అన్నారు.

షాబాజ్ షరీఫ్ ఏ ప్రకటనలు చేశారు?

ఇప్పుడు, పాకిస్తాన్‌లోని అన్ని ప్రభుత్వ కార్యాలయాలు వారానికి నాలుగు రోజులు పనిచేస్తాయి. సోమవారం నుండి గురువారం వరకు. అయితే, బ్యాంకులు, వాటి ఉద్యోగులకు అదనపు సెలవులు మంజూరు చేయలేదు. ఈ నిర్ణయం వ్యవసాయ, పారిశ్రామిక రంగాలకు, అలాగే ఆసుపత్రులు, అంబులెన్స్ సేవలతో సహా అవసరమైన సేవలకు వర్తించదు. పాకిస్తాన్‌లోని అన్ని పాఠశాలలు, కళాశాలలు రాబోయే రెండు వారాల పాటు మూసివేయనున్నట్లు తెలిపారు. ఉన్నత విద్యా కమిషన్ (HEC) పరిధిలోని సంస్థలలో తరగతులు ఆన్‌లైన్‌లో నిర్వహించనున్నారు.

రాబోయే రెండు వారాల పాటు అన్ని ప్రభుత్వ, అధికారిక వాహనాలకు 50% తక్కువ పెట్రోల్ లభిస్తుందని షాబాజ్ షరీఫ్ ప్రకటించారు. ఈ పరిమితి అంబులెన్స్‌లు, ప్రజా రవాణాకు వర్తించదు. రాబోయే రెండు వారాల పాటు 60% ప్రభుత్వ, అధికారిక వాహనాలను ఉపయోగించబోమని కూడా ఆయన పేర్కొన్నారు.

మంత్రులకు జీతాలు కట్

రాబోయే రెండు నెలల పాటు ఏ ఫెడరల్ మంత్రి, సలహాదారు లేదా ప్రత్యేక సహాయకుడు జీతం పొందరని షాబాజ్ షరీఫ్ ప్రకటించారు. పాకిస్తాన్ పార్లమెంటేరియన్లందరికీ 25% జీతం కోత కూడా ఆయన ప్రకటించారు. ప్రభుత్వ సంస్థలు, విభాగాల ఖర్చులు కూడా 20% తగ్గుతాయి. కేంద్ర, రాష్ట్ర మంత్రులు, సలహాదారులు, ప్రత్యేక సహాయకులు, ప్రభుత్వ అధికారుల విదేశీ పర్యటనలపై పూర్తి నిషేధం ఉంటుంది. ఈ నిషేధం ప్రధానమంత్రి, ముఖ్యమంత్రులు, గవర్నర్లకు కూడా వర్తిస్తుంది, దేశ ప్రయోజనాల కోసం అవసరమైన సందర్శనలకు మాత్రమే అనుమతి ఉంటుంది అని షాబాజ్ షరీఫ్ అన్నారు. ఇంకా, 300,000 రూపాయల కంటే ఎక్కువ సంపాదించే ప్రభుత్వ ఉద్యోగుల జీతంలో 20% కోత విధించనున్నట్లు తెలిపారు.