25వ టైటిల్‌తో చరిత్ర సృష్టించే దిశగా టెన్నిస్‌ దిగ్గజం నొవాక్ జకోవిచ్‌ (సెర్బియా) సాగిపోతున్నాడు. గతేడాది ఒక్క గ్రాండ్‌స్లామ్‌ కూడా గెలవని జకో.. తన అడ్డా ఆస్ట్రేలియన్‌ ఓపెన్‌లో జోరు సాగిస్తున్నాడు. శుక్రవారం జరిగిన పురుషుల సింగిల్స్‌ మూడో రౌండ్లో జకోవిచ్‌ 6-1, 6-4, 6-4తో మచాక్‌ (చెక్‌ రిపబ్లిక్‌)పై గెలిచాడు. తొలి రెండు మ్యాచ్‌ల్లో ఒక్కో సెట్‌ కోల్పోయిన జకో.. ఈ మ్యాచ్‌లో మాత్రం పూర్తి ఆధిపత్యం ప్రదర్శించాడు. రెండో సెట్‌ ఆరంభంలో శ్వాస తీసుకోవడంలో ఇబ్బంది ఎదురైనప్పటికీ.. కోర్టులోనే చికిత్స తీసుకుని సునాయాస విజయం సాదించి ప్రిక్వార్టర్స్‌లో అడుగుపెట్టాడు.
రెండో సీడ్‌ జ్వెరెవ్‌ (జర్మనీ) 6-3, 6-4, 6-4తో జేకబ్‌ (బ్రిటన్‌)పై గెలవగా.. మూడో సీడ్‌ అల్కరాస్ (స్పెయిన్‌) 6-2, 6-4, 6-7 (3-7), 6-2తో బోర్గెస్‌ (పోర్చుగల్‌)పై గెలుపొందాడు. మహిళల సింగిల్స్‌లో బెలారస్‌ భామ సబలెంక సత్తాచాటుతోంది. మూడో రౌండ్లో 7-6 (7-5), 6-4తో టాసన్‌ (డెన్మార్క్‌)పై విజయం సాధించింది. మూడో సీడ్‌ కోకో గాఫ్‌ (అమెరికా) 6-4, 6-2తో ఫెర్నాండెజ్‌ (కెనడా)పై గెలుపొందింది. ఏడో సీడ్‌ పెగులా (అమెరికా) 7-6 (7-3), 6-1తో డానిలోవిచ్‌ (సెర్బియా)పై ఓడిపోయింది. ఇక మాజీ ఛాంపియన్‌ ఒసాక (జపాన్‌) ఉదర కండరం నొప్పితో బెన్సిచ్‌ (స్విట్జర్లాండ్‌)తో మ్యాచ్‌ మధ్యలోనే నిష్క్రమించింది. మిక్స్‌డ్‌ డబుల్స్‌ తొలి రౌండ్లో రోహన్‌ బోపన్న, షూయి జంగ్‌ జోడి 6-4, 6-4తో డోడిగ్‌ (క్రొయేషియా)- క్రిస్టీనా (ఫ్రాన్స్‌)పై నెగ్గింది.