నల్లగొండ జిల్లా వైద్యారోగ్య శాఖ (DMHO) కార్యాలయంలో నకిలీ పత్రాలతో కారుణ్య నియామకం పొందిన భారీ స్కాం వెలుగులోకి వచ్చింది. శాలిగౌరారం ప్రాథమిక ఆరోగ్య కేంద్రం (PHC)లో హెల్త్ అసిస్టెంట్‌గా పనిచేసిన చామకూరి వెంకటేశ్వర్లు మే 31, 2025న పదవీ విరమణ పొంది, ఆ తర్వాత నవంబర్ 17, 2025న మరణించారు. అయితే, ఆయన పదవీ విరమణ పొందిన విషయాన్ని దాచిపెట్టి, సర్వీసులో ఉండగానే చనిపోయినట్లు నకిలీ డెత్ సర్టిఫికెట్, ఇతర నకిలీ ధ్రువీకరణ పత్రాలను సృష్టించారు.
ఈ నకిలీ పత్రాల ఆధారంగా వెంకటేశ్వర్లు కొడుకు చామకూరి రాజుకు కారుణ్య నియామకం కింద ఉద్యోగం ఇప్పించేందుకు కుట్ర పన్నారు. ఈ ప్రక్రియ కోసం మృతుడి భార్య వసంత, DMHO కార్యాలయ సీసీ (CC) రంజిత్ కుమార్‌తో రూ. 13 లక్షలకు ఉద్యోగ ఒప్పందం కుదుర్చుకున్నట్లు పోలీసుల విచారణలో తేలింది. అడిగిన మొత్తంలో కొంత భాగం నజరానాగా చెల్లించి అక్రమ పద్ధతిలో ఉద్యోగ ఉత్తర్వులను పొందారు.
ఈ వ్యవహారంపై అనుమానం రావడంతో రంగంలోకి దిగిన పోలీసులు సుదీర్ఘంగా విచారణ జరిపారు. ప్రభుత్వ శాఖల్లోని అధికారుల సహకారంతోనే ఈ అక్రమార్జన పత్రాల సృష్టి జరిగిందని నిర్ధారించారు. నకిలీ డెత్ సర్టిఫికెట్ తయారు చేయడం, కారుణ్య నియామక నిబంధనలను ఉల్లంఘించడం, ప్రభుత్వానికి నమ్మకద్రోహం చేయడం వంటి నేరాల కింద పోలీసులు కేసు నమోదు చేశారు.
ఈ కుంభకోణానికి సంబంధించి మృతుడి కుటుంబ సభ్యులు, DMHO కార్యాలయ సిబ్బంది, మధ్యవర్తులు, నకిలీ పత్రాల తయారీకి సహకరించిన వారితో సహా మొత్తం 16 మందిని పోలీసులు అరెస్టు చేసి రిమాండ్‌కు తరలించారు. జిల్లాలో తీవ్ర కలకలం రేపిన ఈ కారుణ్య నియామక స్కామ్‌లో ఇంకా ఎవరైనా అధికారులు ఉన్నారా అనే కోణంలో పోలీసులు తదుపరి దర్యాప్తును వేగవంతం చేశారు.