Michael Jackson Biopic: ఇండియాలో ‘మైఖేల్’ మేనియా.. లక్ష దాటిన టికెట్ల అమ్మకాలు
ప్రపంచవ్యాప్తంగా కోట్లాది మంది అభిమానులను సంపాదించుకున్న పాప్ లెజెండ్ మైఖేల్ జాక్సన్ జీవిత కథ ఆధారంగా తెరకెక్కిన బయోపిక్ ‘మైఖేల్’. ఈ వారం విడుదల కాబోతున్న సినిమాల్లో అత్యధిక క్రేజ్ ఉన్న చిత్రంగా ఇది నిలిచింది. డబ్బింగ్ వెర్షన్లు లేకుండా కేవలం ఇంగ్లీష్లోనే విడుదలవుతున్నా, భారతీయ ప్రేక్షకులు ఈ సినిమా కోసం ఎగబడుతుండటం ట్రేడ్ వర్గాలను సైతం ఆశ్చర్యపరుస్తోంది.
Also Read : Ninnu Kori: నాని ‘నిన్ను కోరి’ రొమాంటిక్ ట్రీట్.. రీ-రిలీజ్ డేట్ ఫిక్స్
సమాచారం ప్రకారం, ఇండియాలో కేవలం మల్టీప్లెక్సుల్లోనే ఇప్పటివరకు లక్షకు పైగా టికెట్లు అమ్ముడయ్యాయి. ముఖ్యంగా హైదరాబాద్ వంటి నగరాల్లో రేపు రాత్రి పడబోయే ప్రీమియర్ షోలు దాదాపు హౌస్ ఫుల్ అయ్యాయి. జెన్-జీ కిడ్స్ (Gen-Z) సైతం ఈ ఐకాన్ జీవితాన్ని స్క్రీన్ మీద చూడటానికి ఆసక్తి చూపిస్తుండటం గమనార్హం. అయితే ఒరిజినల్ ఫీల్ మిస్ కాకూడదనే ఉద్దేశంతోనే మేకర్స్ దీనిని ఇతర భాషల్లోకి డబ్బింగ్ చేయలేదు.
ఇక మైఖేల్ జాక్సన్ ప్రభావం భారతీయ సినిమాపై ఎంత ఉందో ప్రత్యేకంగా చెప్పక్కర్లేదు. మెగాస్టార్ చిరంజీవి ‘దొంగ’ సినిమాలోని ‘గోలీమార్’ సాంగ్, ప్రభుదేవా ‘ముక్కాలా ముక్కాబులా’ వంటి ఐకానిక్ స్టెప్పులకు మైఖేల్ జాక్సనే స్ఫూర్తి. ఒక స్టీల్ ఫ్యాక్టరీ వర్కర్ కుమారుడిగా పుట్టి, ప్రపంచాన్నే తన డ్యాన్స్తో ఉర్రూతలూగించిన ఆయన జీవితంలోని వెలుగు చీకట్లను 2 గంటల 7 నిమిషాల నిడివితో ఈ సినిమాలో ఆవిష్కరించారు. కాగా ఈ మైఖేల్ పాత్రలో ఆయన మేనల్లుడు జాఫర్ జాక్సన్ పరకాయ ప్రవేశం చేశాడని తెలుస్తోంది. కొన్ని చోట్ల మిశ్రమ స్పందన వినిపిస్తున్నా, సినిమాలోని మ్యూజిక్, డ్యాన్స్ సీక్వెన్స్లు ప్రేక్షకులను మంత్రముగ్ధులను చేస్తున్నాయట. ఇండియాలో పాజిటివ్ టాక్ వస్తే మాత్రం వారం రోజులు బాక్సాఫీస్ వద్ద ఈ సినిమా జాతర ఖాయం.