Manav Suthar Record: కొన్ని రికార్డులు పదిలంగా ఉంటాయి.. మరికొన్ని రికార్డులు తిరిగి రాయబడతాయి.. అలాంటి అరుదైన రికార్డును 131 ఏళ్ల తర్వాత సాధించారు భారత యువ స్పిన్నర్ మానవ్ సుతార్.. ఎడమచేతి వాటం స్పిన్నర్ అయిన మానవ్ సుతార్.. ఫస్ట్క్లాస్ క్రికెట్లో ఈ అరుదైన ఘనత సాధించాడు. వార్విక్షైర్ తరఫున గ్లామోర్గాన్తో జరిగిన కౌంటీ ఛాంపియన్షిప్ మ్యాచ్లో రెండు ఇన్నింగ్స్లలోనూ ఒక్క పరుగు ఇవ్వకుండా వికెట్లు పడగొట్టాడు. దీంతో 131 ఏళ్ల క్రితం నమోదైన ప్రత్యేక రికార్డును సుతార్ సమం చేశాడు.
కార్డిఫ్లోని సోఫియా గార్డెన్స్లో జరిగిన డివిజన్-1 మ్యాచ్లో వార్విక్షైర్ ఇన్నింగ్స్ 257 పరుగుల తేడాతో గ్లామోర్గాన్పై ఘన విజయం సాధించింది. వార్విక్షైర్ తొలి ఇన్నింగ్స్లో 391 పరుగులు చేయగా, గ్లామోర్గాన్ రెండు ఇన్నింగ్స్లలో 69, 65 పరుగులకే ఆలౌటైంది. సుతార్ తొలి ఇన్నింగ్స్లో కేవలం మూడు బంతులు వేసి మీర్ హమ్జాను బౌల్డ్ చేశాడు. రెండో ఇన్నింగ్స్లో 24వ ఓవర్లో బంతిని అందుకున్న అతను వెంటనే మెయిడెన్ ఓవర్ వేశాడు. ఆ తర్వాతి ఓవర్లో నాలుగు బంతుల వ్యవధిలో క్రిస్ కుక్, జేమీ మెక్ల్రాయ్లను బౌల్డ్ చేశాడు. మొత్తంగా ఈ మ్యాచ్లో ఒక్క పరుగు కూడా ఇవ్వకుండా మూడు వికెట్లు తీశాడు.
1895 తర్వాత మళ్లీ ఇప్పుడే..
ఫస్ట్క్లాస్ క్రికెట్ చరిత్రలో ఒకే మ్యాచ్లోని రెండు ఇన్నింగ్స్లలో కనీసం ఒక్క వికెట్ చొప్పున ఎలాంటి పరుగులు ఇవ్వకుండా పడగొట్టడం ఇది రెండోసారి మాత్రమే. 1895లో ఇంగ్లాండ్ ఆటగాడు టామ్ హేవర్డ్ సర్రేపై లీసెస్టర్షైర్ తరఫున ఆడుతూ ఈ ఘనత సాధించాడు. ఇప్పుడు 131 సంవత్సరాల తర్వాత మానవ్ సుతార్ ఆ రికార్డును సమం చేశాడు. కాగా, శ్రీలంక పర్యటన ముగిసిన మూడు రోజులకే ఇంగ్లాండ్కు చేరుకున్న సుతార్, వార్విక్షైర్ తరఫున అద్భుతంగా రాణిస్తున్నాడు. ప్రస్తుత కౌంటీ ఛాంపియన్షిప్ సీజన్లో ఎనిమిది ఇన్నింగ్స్లలో 21 వికెట్లు పడగొట్టాడు. సోమర్సెట్పై ఐదు వికెట్ల ప్రదర్శన కూడా ఇందులో ఉంది.
మరోవైపు. అంతర్జాతీయ క్రికెట్లోనూ సుతార్ తన సత్తా చాటాడు. ఆఫ్ఘనిస్తాన్తో తొలి టెస్టులో ఏడు వికెట్లు, శ్రీలంకతో రెండు టెస్టుల సిరీస్లో 16 వికెట్లు తీసుకున్నాడు. ప్రస్తుతం వార్విక్షైర్ 12 మ్యాచ్ల్లో 184 పాయింట్లతో డివిజన్-1లో అగ్రస్థానంలో ఉంది. టైటిల్ రేసులో సుతార్ ప్రదర్శన జట్టుకు మరింత బలాన్నిస్తోంది.