Man Rescued: డ్రైనేజీలో చిక్కుకున్న వ్యక్తి.. నాలుగు రోజుల తర్వాత సురక్షితంగా బయటకు..

Man Resc

Man Resc

గువాహటిలోని అత్యంత రద్దీగా ఉండే రోడ్డు పక్కన ఉన్న డ్రైనేజీలో నాలుగు రోజుల పాటు చిక్కుకుపోయిన ఓ వ్యక్తిని స్థానికులు ప్రాణాలతో రక్షించారు. నగర నడిబొడ్డున ఉన్న గువాహటి రైల్వే స్టేషన్ సమీపంలో, రిజర్వ్ బ్యాంక్ ఆఫ్ ఇండియా (RBI) భవనానికి సరిగ్గా ఎదురుగా ఉన్న ఫుట్‌పాత్ కింది నుంచి చిన్నగా ఆర్తనాదాలు వినిపించడంతో అటువైపుగా వెళ్తున్న బాటసారులు ఒక్కసారిగా ఉలిక్కిపడ్డారు.

మొదట ఆ శబ్దాలు ఎక్కడి నుంచి వస్తున్నాయో అర్థం కాక చుట్టుపక్కల వెతికిన స్థానికులకు, డ్రైనేజీ లోపలి నుంచి ఒక వ్యక్తి సహాయం కోసం అరుస్తున్నట్లు తెలిసింది. వెంటనే అక్కడ పెద్ద ఎత్తున జనం గుమిగూడారు. స్థానిక యువకులు, ప్రజలు కలిసి ఎంతో శ్రమించి డ్రైనేజీ మూతను తొలగించి, లోపల చిక్కుకుపోయిన వ్యక్తిని సురక్షితంగా బయటకు లాగారు. బయటకు తీసినప్పుడు అతను తీవ్రంగా నీరసించిపోయి కనిపించాడని, దాదాపు నాలుగు రోజులుగా ఆహారం, నీరు లేకుండా ఆ చీకటి డ్రైనేజీలోనే ఉండిపోయినట్లు స్పష్టమైందని ప్రత్యక్ష సాక్షులు తెలిపారు.

కాగా, రక్షించబడిన బాధితుడి పేరు, ఇతర వివరాలు ఇంకా తెలియరాలేదు. అతను ఆ డ్రైనేజీలోకి ప్రమాదవశాత్తూ జారిపడ్డాడా లేక మరేదైనా కారణంతో అందులోకి వెళ్లాడా, అసలు ఏ పరిస్థితుల్లో అందులో చిక్కుకుపోయాడు అనే విషయాలపై ఇంకా స్పష్టత రాలేదని పోలీసు వర్గాలు పేర్కొన్నాయి. నిత్యం వేలాది మంది ప్రజలు, వాహనాల రాకపోకలతో అత్యంత రద్దీగా ఉండే నగర ప్రధాన ప్రాంతంలో నాలుగు రోజుల పాటు ఎవరి కంటా పడకుండా అతను డ్రైనేజీలో ఎలా ఉండిపోయాడనే అంశం స్థానికంగా తీవ్ర చర్చనీయాంశంగా మారింది. ప్రస్తుతం బాధితుడి గుర్తింపును నిర్ధారించేందుకు, ఈ ఘటన వెనుక ఉన్న పూర్తి పరిస్థితులను తెలుసుకునేందుకు పోలీసులు దర్యాప్తు ముమ్మరం చేశారు.