Low Birth Weight Babies: తక్కువ బరువుతో పుట్టిన బిడ్డలు త్వరగా కోలుకునే రహస్యం!

సాధారణంగా బిడ్డ పుట్టగానే అందరూ ఎంత బరువు ఉన్నారో అని ఆరా తీస్తుంటారు. ఆరోగ్యవంతుడైన బిడ్డ కనీసం 2.5 కిలోల నుంచి 3.5 కిలోల మధ్య బరువు ఉండాలి. కానీ, కొన్ని కారణాల వల్ల బిడ్డలు తక్కువ బరువుతో పుడుతుంటారు. ఇలాంటి సమయంలో తల్లిదండ్రులు కంగారు పడటం సహజం. అయితే, ఆధునిక వైద్యం ఇంట్లో తీసుకునే చిన్న చిన్న జాగ్రత్తలతో ఈ సమస్యను సులభంగా అధిగమించవచ్చని వైద్యులు చెబుతున్నారు.

అసలు బిడ్డ ఎందుకు బరువు తక్కువగా పుడతారు?
బిడ్డ తక్కువ బరువుతో పుట్టడానికి ప్రధాన కారణం తల్లి ఆరోగ్యం. గర్భిణీగా ఉన్నప్పుడు సరైన పౌష్టికాహారం తీసుకోకపోవడం, రక్తహీనత (Anemia), హై బీపీ లేదా షుగర్ వంటి సమస్యలు ఉంటే బిడ్డ ఎదుగుదలపై ప్రభావం పడుతుంది. అలాగే నెలలు నిండకుండానే కాన్పు అవ్వడం (Pre-term) వల్ల కూడా బిడ్డ బరువు తక్కువగా ఉంటుంది.

తల్లిదండ్రులు పాటించాల్సిన ముఖ్యమైన జాగ్రత్తలు:
వెచ్చగా ఉంచడం (Keep Warm).. తక్కువ బరువున్న బిడ్డల శరీరం త్వరగా చల్లబడుతుంది (దీన్నే హైపోథెర్మియా అంటారు). అందుకే బిడ్డను ఎప్పుడు వెచ్చని దుస్తులతో కప్పి ఉంచాలి. వీలైతే రూమ్ హీటర్లు లేదా ఫిలమెంట్ బల్బులు వాడి గదిని వెచ్చగా ఉంచాలి.

కంగారు మదర్ కేర్ (KMC): ఇది చాలా గొప్ప పద్ధతి. బిడ్డను తల్లి చాతిపై నేరుగా చర్మం తగిలేలా పడుకోబెట్టుకోవాలి. దీనివల్ల తల్లి శరీరంలోని వేడి బిడ్డకు అందుతుంది, అలాగే బిడ్డకు తల్లికి మధ్య మంచి అనుబంధం ఏర్పడి పాలు కూడా బాగా పడతాయి.

తల్లి పాలే అమృతం: బిడ్డ పుట్టిన మొదటి గంట నుండే తల్లి పాలు ఇవ్వడం మొదలుపెట్టాలి. బిడ్డ నేరుగా తాగలేకపోతే, పాలను తీసి చెంచాతో పట్టించాలి. దీనివల్ల బిడ్డలో షుగర్ లెవల్స్ పడిపోకుండా ఉంటాయి.

స్నానం చేయించకండి: బిడ్డ కనీసం 2 కిలోల బరువు పెరిగే వరకు స్నానం చేయించకూడదు. కేవలం గోరువెచ్చని నీటితో తడి గుడ్డ పెట్టి ఒళ్ళు తుడిస్తే సరిపోతుంది.

పరిశుభ్రత: పసిబిడ్డలకు ఇన్ఫెక్షన్లు త్వరగా సోకుతాయి. అందుకే బిడ్డను ముట్టుకునే ముందు ప్రతి ఒక్కరు చేతులు శుభ్రంగా కడుక్కోవాలి. బాటిల్ ఫీడింగ్ అస్సలు వాడకూడదు.

ముగింపు: బిడ్డ బరువు తక్కువగా ఉన్నారని భయపడాల్సిన పనిలేదు. సరైన సమయంలో డాక్టర్ల సలహాలు పాటిస్తూ, పైన చెప్పిన జాగ్రత్తలు తీసుకుంటే ఆ బిడ్డలు కూడా కొద్ది రోజుల్లోనే మిగతా పిల్లల్లాగే బొద్దుగా, ఆరోగ్యంగా తయారవుతారు.