Koti Deepotsavam 2026 : కోటి దీపోత్సవంలో అద్భుత ఘట్టం.. వైభవంగా తులసీ దామోదర కల్యాణం.!

  • వైభవంగా శ్రీ తులసీ దామోదర కల్యాణం
  • నరసింహస్వామి మహాభిషేకం, రక్షాకంకణపూజ
  • భక్తులను అలరించిన పీఠాధిపతుల ప్రవచనాలు
  • కోటి దీపోత్సవ నిర్వాహకులకు కిషన్ రెడ్డి ప్రశంసలు
Day 8

Day 8

కార్తీక మాసం సందర్భంగా హైదరాబాద్‌లోని ఎన్టీఆర్ స్టేడియం వేదికగా ఎన్టీవీ, భక్తి టీవీ ఆధ్వర్యంలో నిర్వహిస్తున్న కోటి దీపోత్సవం–2026 వేడుకలు భక్తిభావంతో కొనసాగుతున్నాయి. స్టేడియం పరిసరాలు శివనామస్మరణతో మార్మోగుతుండగా, శనివారం (నవంబర్ 21) ఎనిమిదో రోజు వేడుకలు అత్యంత వైభవంగా జరిగాయి. కార్తీక శనివారం, కృష్ణపక్ష ద్వాదశి పర్వదినాన జరిగిన ఈ వేడుకల్లో పీఠాధిపతుల అనుగ్రహ భాషణాలు, ప్రవచనాలు, ప్రత్యేక పూజలు, శ్రీ తులసీ దామోదర కల్యాణోత్సవం భక్తులను భక్తి పారవశ్యంలో ముంచెత్తాయి.

విశేష పూజలు.. తులసీ దామోదర కల్యాణం

ఎనిమిదో రోజు కార్యక్రమాల్లో భాగంగా వేదికపై నరసింహస్వామి మహాభిషేకం, స్వర్ణసింహ రక్షాకంకణపూజ, ఉజ్జయిని మహాకాళి భస్మహారతి వైభవంగా నిర్వహించారు. భక్తుల చేతుల మీదుగా నరసింహస్వామి విగ్రహాలకు రక్షాకంకణపూజ జరిపారు. అనంతరం జరిగిన శ్రీ తులసీ దామోదర కల్యాణోత్సవం, పల్లకి వాహన సేవ, స్వర్ణ లింగోద్భవం, సప్త హారతులు భక్తులకు కనులపండువగా నిలిచాయి.

పీఠాధిపతుల సందేశాలు.. ప్రవచనామృతం

ఈ వేడుకల్లో బెంగళూరు శ్రీ కైలాష్ ఆశ్రమం పీఠాధిపతి శ్రీ జయేంద్రపురి మహాస్వామీజీ, హరిద్వార్ జూనా అఖాడాకు చెందిన శ్రీ ఉమాకాంతానంద సరస్వతీ స్వామీజీ భక్తులకు అనుగ్రహ భాషణాలు అందించారు. ఆధ్యాత్మిక ప్రవచనకర్త శ్రీ డి. హయగ్రీవాచార్యులు చేసిన ప్రవచనామృతం శ్రోతలను ఆకట్టుకుంది.

కిషన్ రెడ్డి ప్రసంగం.. నిర్వాహకులపై ప్రశంసలు

ఈ కార్యక్రమానికి ముఖ్య అతిథిగా హాజరైన కేంద్ర మంత్రి జి. కిషన్ రెడ్డి మాట్లాడుతూ, భక్తి టీవీ, ఎన్టీవీ, వనిత టీవీల అధినేత నరేంద్ర చౌదరిని, వారి బృందాన్ని అభినందించారు. భారత్ కేవలం భౌగోళిక దేశం కాదని, సనాతన ధర్మానికి, ఆధ్యాత్మికతకు నిలయమని పేర్కొన్నారు. శివకేశవులకు అత్యంత ప్రీతికరమైన కార్తీక మాసంలో చేసే స్నానాలు, దీపారాధనలు, పూజలు మనిషిలో భక్తిని, క్రమశిక్షణను పెంచుతాయని చెప్పారు. తమసోమా జ్యోతిర్గమయ అన్న ఉపనిషత్ వాక్యం ప్రకారం దీపం చీకటిని పోగొట్టడమే కాకుండా అజ్ఞానాన్ని తొలగించి జ్ఞానాన్ని ఇస్తుందని వివరించారు. కోటి దీపాలు వెలిగించడం అంటే కోట్లాది హృదయాలలో భక్తి భావాన్ని మేల్కొల్పడమేనని, ఇదొక గొప్ప ఆధ్యాత్మిక యజ్ఞమని అభివర్ణించారు. భాగ్యనగర ప్రజలకు ఈ వేడుక గొప్ప ఆధ్యాత్మిక అనుభూతిని అందిస్తోందని, క్రమశిక్షణతో పాల్గొంటున్న భక్తులను ప్రశంసించారు. రచనా టెలివిజన్ ప్రైవేట్ లిమిటెడ్ ఆధ్వర్యంలో సాగుతున్న ఈ ఉత్సవాలకు భక్తుల నుంచి విశేష స్పందన లభిస్తోంది.