ఐపీఎల్ ఫ్రాంచైజీ కోల్కతా నైట్ రైడర్స్ (కేకేఆర్) సహ-యజమాని జయ్ మెహతా తన వాటాలో కొంత భాగాన్ని విక్రయించేందుకు సిద్ధమయ్యారు. కేకేఆర్లో తనకున్న 45 శాతం వాటాలో సగం, అంటే 22.5 శాతం వాటాను అమెరికాకు చెందిన ప్రముఖ పెట్టుబడుల సంస్థ ఎరెస్ మేనేజ్మెంట్కు విక్రయించనున్నారు. ఈ ఒప్పందం విలువ సుమారు 400 మిలియన్ డాలర్లు (భారత కరెన్సీలో సుమారు రూ. 3,300 కోట్లకు పైగా) ఉంటుందని సమాచారం. దీని ప్రకారం కేకేఆర్ జట్టు మొత్తం విలువ 1.78 బిలియన్ డాలర్లుగా (సుమారు రూ. 16,634 కోట్లు) నిర్ణయించారు. ఇటీవల రాజస్థాన్ రాయల్స్, రాయల్ ఛాలెంజర్స్ బెంగళూరు జట్ల విక్రయాల విలువలకు అనుగుణంగానే కేకేఆర్ విలువ కూడా ఉంది.
బాలీవుడ్ నటుడు షారుఖ్ ఖాన్కు కేకేఆర్లో 55 శాతం వాటా ఉండగా, జయ్ మెహతా, ఆయన భార్య, నటి జూహీ చావ్లాకు కలిపి 45 శాతం వాటా ఉంది. వీరంతా కలిసి 2007లో ఈ జట్టును కొనుగోలు చేశారు. తాజా ఒప్పందం పూర్తిగా నగదు రూపంలో జరగనుంది. అయితే, ఈ వాటా విక్రయానికి భారత క్రికెట్ నియంత్రణ మండలి (బీసీసీఐ) అధికారిక అనుమతి తప్పనిసరి. నిబంధనల ప్రకారం, కొత్త యజమాని నేపథ్యాన్ని బీసీసీఐ క్షుణ్ణంగా పరిశీలిస్తుంది. అంతేకాకుండా, ఈ ఒప్పందం విలువలో 5 శాతం అంటే సుమారు 20 మిలియన్ డాలర్లు (దాదాపు రూ. 200 కోట్లు) బీసీసీఐకి రుసుముగా చెల్లించాల్సి ఉంటుంది.
2022లో సీవీసీ క్యాపిటల్ సంస్థ గుజరాత్ టైటాన్స్ జట్టును కొనుగోలు చేసినప్పటి నుంచి ఐపీఎల్ జట్లపై అమెరికా సంస్థల ఆసక్తి బాగా పెరిగింది. ఆర్సీబీ జట్టులో కూడా బ్లాక్స్టోన్, బోల్ట్ వెంచర్స్ వంటి అమెరికా సంస్థలు పెట్టుబడులు పెట్టాయి. ప్రస్తుతం కేకేఆర్ వాటాను కొనుగోలు చేస్తున్న ఎరెస్ మేనేజ్మెంట్కు క్రీడా రంగంలో పెట్టుబడులు పెట్టడం కొత్తేమీ కాదు. ఈ సంస్థకు ఇంగ్లీష్ ప్రీమియర్ లీగ్లో చెల్సీ ఎఫ్సీ, ఎన్ఎఫ్ఎల్లో మయామి డాల్ఫిన్స్ జట్లలో వాటాలు ఉన్నాయి. అంతేకాకుండా, ఇంగ్లాండ్లో జరిగే ‘ది హండ్రెడ్’ లీగ్లోని ట్రెంట్ రాకెట్స్ జట్టుకు కూడా సహ-యజమానిగా ఉంది. మూడుసార్లు ఐపీఎల్ ట్రోఫీ గెలిచిన కేకేఆర్ జట్టులో ఈ మార్పు క్రీడా వర్గాల్లో ఆసక్తిని రేకెత్తిస్తోంది.

